1 Bene Kolinto 10 - Baibo Busansulushi Bwa Libuku Ili

Shakacitikila bene Isilaeli shicenjeshe bashomi

¹ Nobamakwesu ndisuni kwaamba ayi mwiibaluke shakacitikila bamashali besu bakulukulu. Boonse bakafunwa alikumbi alimwi boonse bakasubuka Lweenge Lusalala.

² Aboobo bakabombekwa mulikumbi amulweenge kwaamba ayi babe womwi aMose.

³ Boonse bakalya cakulya comwi ca mushimu,

⁴ akunwa cakunwa comwi ca mushimu ceebo bakalinga kunwa maanshi akalinga kuswa mumwaandami wa mushimu ngobakalinga kweendaawo. Mwaandami uyo wakalinga nguKlistu.

⁵ Nakubi boobo baanji pakati kabo tabakwe kukondelesha Lesa, aboobo bakafwa muluyanga.

⁶ Ono shintu shoonse ishi nshitondesho kuli ndiswe shakutucenjesha kwaamba ayi tutasuni shintu shibiibi mbuli mbobakacita balo.

⁷ Tutabi bantu balambila shibumbwabumbwa bweenka bwakalinga kucita bamwi pakati kabo. Kweelana abwaamba Malembo akwe Lesa ayi, “Bantu bamwi bakekala panshi ayi balye akunwa, ono kusekelela kwabo kwakaba kwakunsengwe.”

⁸ Tutaciti bufuule bweenka bwakacita bamwi pakati kabo. Balo ndibakacita boobo, bantu bali shuulu makumi obilo ashotatwe bakafwa bushiku bomwi.

⁹ Tatweelete kusunka Mwaami Lesa bweenka bwakacita bamwi pakati kabo akucaikwa kunsoka.

¹⁰ Tatweelete kunootongooka bweenka bwakacita bamwi pakati kabo, alimwi bakacaikwa amunjelo unyonyoola.

¹¹ Shoonse shintu ishi shakacitika kuli mbabo kwaamba ayi shibe shitondesho kubantu bamwi. Shakalembwa alimwi kwaamba ayi shitucenjeshe sotushiite muciindi cino meelelesho a cishi ca panshi ndyaali pafwaafwi.

¹² Ono uyo woonse uyeeya kwaamba ayi ngumuyumu mulushomo, acenjele ayi atawi.

¹³ Masunko amushikila taapusene amasunko ashikila bantu bamwi boonse. Sombi Lesa ulashomeka alimwi inga taamulekeli mumasunko ngomutakoonshi kukoma. Sombi na mwasuunkwa, Lesa ulamupa nshila yakuleyelamo masunko ayo kwaamba ayi mwaakoome.

¹⁴ Ono aboobo nobamakwesu amusoonoke kukulambila shibumbwabumbwa.

¹⁵ Ntoomwaambila mbuli mbotwaambila basongo, amuyeeyeshe makani ngondamulwiita.

¹⁶ Sa te nditunwita munkomeshi iyo njetulumba kuli Lesa, tulabaana bulowa bwakwe Klistu? Nditulya shinkwa uyo ngotukomoona, sa te tulabaana mubili wakwe Klistu?

¹⁷ Ono ceebo cakwaamba ayi shinkwa ngomwibo, soonse natufuuli, tuli mubili womwi ceebo tulabaana shinkwa womwi.

¹⁸ Amuyeeye bucita bene Isilaeli, abo balyaako shipo shipekwa kuli Lesa pacipaililo. Sa tababi lubasu mukulambila Lesa?

¹⁹ Sa ntokwaamba ayi shipekwa kucibumbwabumbwa nabi cibumbwabumbwa ciine kuli mboshibete?

²⁰ Sobwe, sombi ntokwaamba ayi shipo shipekwa pashipaililo sha bakunsengwe shilapekwa kubashikaswa kuteshi kuli Lesa. Ono nebo nshisuni kwaamba ayi mwebo munoocatana abashikaswa.

²¹ Tamukoonshi kunwita munkomeshi ya Mwaami Jesu aya bashikaswa. Ncakwiila tamukoonshi kulita patebulu ya Mwaami alimwi aya bashikaswa.

²² Sa tutooyanda kukalasha Mwaami? Nabi sa tulicite nkusu kwiinda nguwe?

Lwaanguluko lwa bashomi

²³ Bamwi balaamba ayi, “Shintu shoonse shilasuminishikwa.” Sombi teshi kwaamba ayi shintu shoonse nshibotu. “Shintu shoonse shilasuminishikwa,” sombi teshi shoonse shicafwa.

²⁴ Taaku muntu weelete kuyandoolabo shimukondelesha, sombi shikondelesha babye.

²⁵ Mulyaangulukite kulya nyama ili yoonse yuulishikwa mumishika ya nyama cakuteepusha, mukucana kwaamba ayi moyo ulamupensha.

²⁶ Mbuli Malembo akwe Lesa mbwaamba ayi, “Cishi ca panshi ashoonse shiliimo nsha Mwaami Lesa.”

²⁷ Na wakunsengwe wakwiitila cakulya, awebo wayanda kulyaakwe, ulye cakulya cili coonse nceshi akupe cakuteepushaawo kwaamba ayi moyo utakakupenshi.

²⁸ Sombi na umwi muntu wakwaambila ayi, “Cakulya ici cakalinga capekwa kushibumbwabumbwa,” utacili ceebo ca wooyo wakulwiita alimwi acakupenshekwa amoyo.

²⁹ Apa ntokwaamba moyo wa muntu umwi uyo kuteshi ndimwe, sobwe. Umwi inga weepusha ayi, “Ino ono sa nkokwaamba ayi ndeke lwaanguluko lwangu ceebo ca moyo wa muntu umwi kupenshekwa?

³⁰ Na nebo ndalumba Lesa pacakulya, muntu umwi inga wantongooka buyani pacakulya ico nceenga ndalumbilaawo Lesa?”

³¹ Ono aboobo kulilabo ncemutoocita, kulya nabi kunwa, amushiciite shoonse mukupa bulemu kuli Lesa.

³² Bwikaalo bwanu butabi mfumpu kubaJuda, baswamashi bakunsengwe nabibo kucoonde cakwe Lesa.

³³ Amucite kweelana ambooncita. Nebo ndeelesha kukondelesha bantu boonse mushintu nsheencita. Nshiyandoolibo sheesho shikonda ndime nemwiine, sombi shikonda boonse kwaamba ayi abalo bapulushikwe.