1 Bene Kolinto 1 - Baibo Busansulushi Bwa Libuku Ili

¹ Ndime Paulo uyo wakeetwa kweelana akuyanda kwakwe Lesa ayi mbe mutumwi wakwe Klistu Jesu. Ndi amukwabesu Sositenesi.

² Tutoolembela ndimwe nocoonde cakwe Lesa ca muKolinto. Lesa wakamusala kwiinda muli Klistu Jesu alimwi akumwiita ayi mube bantu bakwe pantu pomwi abantu boonse bali kumisena ipusenepusene, abo balemeka Mwaami Jesu Klistu, Mwaami wabo aswebo soonse.

³ Luse aluumuno shibe amwebo kuswa kuli Lesa Ishiwesu aMwaami Jesu Klistu.

Shoolwe muli Klistu

⁴ Lyoonse ndalumba Lesa ceebo ca ndimwe mukwiinga wa luse Lesa ndwaakamutondesha muli Klistu Jesu.

⁵ Ceebo cakuba muli Klistu, Lesa wamupa bubile boonse bwa muMushimu mukwiinga mulishi Makani akwe Lesa alimwi mulakonsha kwaashimika.

⁶ Makani aamba pali Klistu ashimpa muli ndimwe.

⁷ Paceebo ceeco taaku cipo nabi comwi ca Mushimu ncemutacite bulya ndimutoolindilila kupiluka kwa Mwaami Jesu Klistu.

⁸ Ulaakumuyumya kushikila akumamanino kwaamba ayi pabushiku bwakwisa Mwaami wesu Jesu Klistu mukacanike kamutacite kampenda.

⁹ Lesa uyo wakamwiita ayi mube mubwanabwankashi aMwanaakwe Jesu Klistu Mwaami wesu, ulashomeka.

Kulipatula mucoonde

¹⁰ Ono ndamusenga nobamakwesu muliina lya Mwaami wesu Jesu Klistu ayi kamusuminishana mushintu nshemwaamba, patabi kulipatula pakati kanu. Sombi munoonyumfwana camoyo womwi amuyeeyo womwi.

¹¹ Ceebo bamwi bamuŋanda yakwe Kuloyi bakandwiita ayi pali kutanyumfwana pakati kanu.

¹² Ncentokwaamba nceeci, uli woonse pakati kanu ulaamba shaakwe. Umwi ulaamba ayi, “Nebo ndi wakwe Paulo,” umwi ayi, “Nebo ndi wakwe Apolosi,” aumwi ayi, “Ndi wakwe Pita,” alakwe umwi ayi, “Ndi wakwe Klistu.”

¹³ Sa Klistu wabaanikaamo? Sa nguPaulo wakapopwa pamucilingano ceebo ca ndimwe? Nabi sa mwakabombekwa muliina lyakwe Paulo?

¹⁴ Ndalumba Lesa ayi taaku aumwi ngondakabombeka pakati kanu, sombibo Kilisipasi aGayasi.

¹⁵ Aboobo taaku weenga waamba ayi wakabombekwa muliina lyangu.

¹⁶ Ncine ndakabombeka aSitefanasi alimwi abamuŋanda yakwe. Nshintooyeeya ayi ndakabombeka abamwi.

¹⁷ Ceebo Klistu taakwe kuntuma ayi nooya cibombekabo, sombi wakantuma kuya cishimikila Makani Abotu. Nsheelete kwaashimika kweelana abusongo bwa buntu, kuloonda kwaamba ayi nkusu sha lufu lwakwe Klistu pamucilingano inga shayeeyelwa ayi taaku mboshibete.

Klistu nshenkusu abusongo bwakwe Lesa

¹⁸ Makani aamba shalufu lwakwe Klistu pamucilingano taaku mbwaabete kubantu basowekete, sombi kuli ndiswe sotuli munshila yakupulushikwa, ninkusu shakwe Lesa.

¹⁹ Ceebo muMalembo Lesa ulaamba ayi, “Ndaakunyonyoola busongo bwa basongo alimwi ndaakulobya maano abantu bacenjete.”

²⁰ Ino ono uliimfwi pali musongo? Ino uliimfwi pali muntu wiite? Ino uliimfwi pali shikupikishanya sha mucishi ca panshi? Mukwiinga Lesa watondesha kale ayi busongo bwa bantu taaku mbobubete.

²¹ Ceebo Lesa mubusongo bwakwe mwiine wakalengesha kwaamba ayi bantu baalilwe kumwishiba kwiinda mubusongo bwabo. Sombi kwiinda mumakani ngotushimikila ayo bantu ngobabona ayi taaku mbwaabete, Lesa cakamukonda ayi apulushe bashoma kwiinda muli ngawo.

²² BaJuda balisuni kubona shaankamiko abalo baswamashi bakunsengwe balisuni kubona shabusongo.

²³ Sombi swebo tulashimikila shakwe Klistu uyo wakapopwa pamucilingano. KubaJuda makani aya nimfumpu, akwalo kubaswamashi bakunsengwe taaku mbwaabete.

²⁴ Nakubi boobo kubaabo Lesa mbwaakeeta, baJuda nabi baswamashi bakunsengwe, balishi kwaamba ayi Klistu nshenkusu alimwi abusongo bwakwe Lesa.

²⁵ Ceebo ico ciboneka anga nkubula maano kwakwe Lesa cileenda pabusongo bwa bantu, acalo ico ciboneka anga nkubula nkusu kwakwe Lesa cileenda pankusu sha buntu.

²⁶ Nobamakwesu amuyeeye mbomwakalinga, Lesa ndyaakamwiita. Mbaniini pakati kanu abo bakalinga kuboneka basongo kubantu nabi bankusu, nabi bakashalwa kubantu balemekwa.

²⁷ Sombi Lesa wakasala shintu bantu nshebayeeya ayi nshabuluya kwaamba ayi shilenshe nsoni basongo alimwi akusala sheesho shiboneka ayi shililefukite kwaamba ayi shilenshe nsoni abo bacite nkusu.

²⁸ Lesa wakasala bantu bataaku mbobabete, banyanshikwa alimwi batabelengwi, kwaamba ayi abo bantu mbobabona ayi mbalemu, baboneke ayi taaku mbobabete.

²⁹ Paceebo ceeco taaku muntu weenga walisumpula pameenso akwe Lesa.

³⁰ Lesa ngowakalengesha ayi tube muli Klistu Jesu ayi lakwe abe busongo bwesu. Wakatululamika pameenso akwe Lesa, watusalasha akutwaangulula.

³¹ Aboobo kweelana abwaamba Malembo akwe Lesa ayi, “Uyo usuni kulisumpula ulyeelete kulisumpula ceebo ca ceeco Mwaami ncaakacita.”