1 Baami 9 - Baibo Busansulushi Bwa Libuku Ili

Mwaami Lesa mbwaakaboneka kuli Solomoni lwabili

¹ Lyalo mwaami Solomoni ndyaakamanisha kuyaka Ŋanda yakwe Lesa aŋanda ya bwaami alimwi ashimwi shaakalinga kusuni kuyaka,

² Mwaami Lesa wakaboneka kuli nguwe alimwi, bweenka mbwaakamubonekela kuGibyoni.

³ Mwaami Lesa wakaamba ayi, “Ndanyuumfwa mupailo wako akusenga kwako. Ndasalasha ŋanda iyi njewanjakila ayi ibe musena umo mweshi noolambililwa lyoonse. Ndanooilama akwiitabilila lyoonsebo.

⁴ Na ukanoonsebensela cakushomeka alimwi cakubula kampenda mubuumi bwako mbuli iso Defedi, alimwi na ukanookonkela milawo yangu akucita shoonse nshendakwaambila,

⁵ ndaakucita kweelana ambondakashomesha iso Defedi ndindakamulwiita ayi bene Isilaeli bananoolelwabo abamulunyungu lwakwe lyoonse.

⁶ Sombi na webo nabi bamulunyungu bako bakacileeke kunyumfwila ee, kucileka kukonkela milawo amilasho njindakakupa nabi kutalika kulambila balesa bamwi,

⁷ lyalo bene Isilaeli ndaakubatanda mucishi ncendakabapa. Ndaakufutatila Ŋanda iyo njendasalasha kwaamba ayi noolambililwaamo. Bantu kuli koonse balaakuseka bene Isilaeli akubabona ayi taaku mbobabete.

⁸ Iyi Ŋanda yangu ilaakuba litongo alimwi muntu woonse weshi akeendileeko ulaakukankamana abuumbi cakufwa aboowa akwiipusha ayi, ‘Ceebonshi Mwaami Lesa wakacita bobulya cishi ici aŊanda yakwe iyi?’

⁹ Bantu balaakunookumbula ayi, ‘Mukwiinga bakafutatila Mwaami Lesa, Lesa wabo uyo wakakusha bamashali babo bakulukulu kuswa muIjipiti. Bakatalika kulemeka balesa bamwi akubalambila. Nceceeco Mwaami Lesa ncaalengeshela ayi kunyonyooka uku kucitike pali mbabo.’ ”

Solomoni mbwaakasuminishanya Ailamu

¹⁰ Solomoni cakamutolela myaaka makumi obilo kuyaka Ŋanda yakwe Lesa alimwi aŋanda yakwe ya bwaami.

¹¹ Ilamu mwaami wa kuTaya wakapa Solomoni shisamu shoonse sha sida, paini, alimwi agolodi woonse wakalinga kusuniki mumulimo uyo. Lyalo ndyaakaumanisha, wakapa mwaami Ilamu mandabala makumi obilo akalinga mucishi ca Galili.

¹² Ilamu wakaya mukubona mandabala ayo, sombi taakwe kumukonda.

¹³ Aboobo wakaambila Solomoni ayi, “Mukwaabo, sa ngomandabala ngweenga wampa aya?” Paceebo ceeci musena uyo abobulya uleetwa ayi Kabulu.

¹⁴ Golodi Ilamu ngwaatuma kuli Solomoni woonse wakakwanisha makilogilamu ali 4,000 akuya peculu.

Shimwi Solomoni nshaakacita

¹⁵ Mwaami Solomoni wakasebensesha bantu bacibalu kuyaka Ŋanda yakwe Lesa alimwi aŋanda ya bwaami, kuleta bulongo bwa kweelanishisha kwicwe lya ndabala inene, alimwi akuyaka lubumbu lwa ndabala iyo ya Jelusalemu. Wakabasebensesha akukuyaka ndabala inene ya Asoli, Megido aya Gesa.

¹⁶ Kalekale mwaami wa kuIjipiti wakalwana bantu ba muGesa akubakoma. Wakacaya bene Kenani boonse bakalinga kwikalaamo akutenta ndabala iyo. Kuswawaawo wakapa ndabala iyo kumwanaakwe mwanakashi ndyaakeebwa kumwaami Solomoni.

¹⁷ Lyalo Solomoni wakeeyakulula. Kwiinda mukusebensesha bantu bacibalu, Solomoni wakayakulula Beti Oloni wa munkunamo,

¹⁸ Baalati, aTama ndabala ya muluyanga lwa Juda.

¹⁹ Wakayakulula mandabala anene uko shakulya nkoshakalinga kusungwa alimwi akooko kwakalinga kusungwa maaki ashikoci shakwe. Kuswawaawo wakayaka shoonse shaakalinga kusuni muJelusalemu, muLebanoni akumwi koonse mucishi cakwe.

^20-21 Bantu Solomoni mbwaakasebensesha kucibalu mbene Kenani abo bene Isilaeli mbobatakwe kucaya paciindi ndibakabwesa cishi cabo. Aba bakalinga bene Amoli, bene Iti, bene Pelisi, bene Ifi alimwi abene Jebusi. Bamulunyungu lwa bantu aba bacili basha abobulya.

²² Solomoni taakwe kwaalulaawo busha bene Isilaeli. Sombi bakalinga kubabo bashilumamba, bacinenenene, bamatanjilili ba bashilumamba, bamatanjilili ba bashilumamba ba kushikoci sha maaki abaabo beshikweensha maaki akwela shikoci.

²³ Kwakalinga bacinenenene bali 550 bakalinga kutanjilila bantu bacibalu mumisena mwakalinga milimo yakwe Solomoni yakuyaka.

²⁴ Lyalo mwanaakwe Falawo mwanakashi ndyaakaswa muNdabala inene yakwe Defedi kuya mukwikala kuŋanda Solomoni njaakamuyakila, Solomoni wakaleta bulongo akweelanishisha kwicwe lya ndabala inene.

²⁵ Mankanda otatwe mumwaaka Solomoni wakalinga kubenga milambu yakutenta alimwi amilambu ya bwanabwankashi pacipaililo ico ncaakayakila Mwaami Lesa. Wakalinga kutentela Mwaami Lesa atununkila kabotu. Wakamana kuyaka Ŋanda yakwe Lesa.

²⁶ Mwaami Solomoni wakapanga amaato kuEsiyoni Geba, ndabala iyo ili kufwaafwi aElati, muloombe lwa Lweenge Lusalala, mucishi ca Edomu.

²⁷ Mwaami Ilamu wakatuma bantu bakwe bacishi shamulweenge kuya mukusebensela pantu pomwi abantu bakwe Solomoni.

²⁸ Bakeenda kuya kucishi ca Ofi, akuleta makilogilamu ali 14,000 a golodi kumwaami Solomoni.