1 Baami 8 - Baibo Busansulushi Bwa Libuku Ili

Libokoshi lya Cipangano mbolyakaletwa kuŋanda yakwe Lesa

¹ Lyalo kuJelusalemu mwaami Solomoni wakeeta bamaloba bamatanjilili ba mikowa aba shipani ba bene Isilaeli kuleta Libokoshi lya Cipangano kuŊanda yakwe Lesa kuswa kuSiyoni, mundabala yakwe Defedi.

² Boonse bakabungana muciindi cakusekelela kwa Shimpaka mumweenshi wasanu ayobilo uyo wakalinga kwiitwa ayi Etanimu.

³ Bamatanjilili boonse ndibakabungana bapailishi bakanyamuna Libokoshi lya Cipangano

⁴ akulitola kuŊanda yakwe Lesa. Bene Lefi alimwi abapailishi abalo bakanyamuna Tente ya Cipangano ashitabatisho sha moomo shoonse akushitola muŊanda yakwe Lesa.

⁵ Mwaami Solomoni abene Isilaeli boonse bakabungana kunembo lya Libokoshi lya Cipangano akubenga mbelele aŋombe shiinji shitabelengeki.

⁶ Lyalo bapailishi bakanyamuna Libokoshi lya Cipangano akulitola muŊanda yakwe Lesa akulibika muMusena Usalalite Wiindaawo muunshi lya mapapaminwa a bakelebu.

⁷ Mapapaminwa a bakelebu abo akafwekelela Libokoshi ili alimwi ashisamu nshebakalinga kulinyamushaako.

⁸ Kweela kwa shisamu shakunyamwisha kwakalinga kukonsha kuboneka kumuntu uli woonse weenga weemikana kunembo kwiine kwa Musena Usalalite Wiindaawo kuleka lubasu lumwi luli loonse. Ishi shisamu mposhili abobulya.

⁹ Mukati muLibokoshi lya Cipangano mwakalingabo mabwe obilo apampamene alya Mose ngaakabikaamo kuKalundu ka Sinayi, Lesa ndyaakapanga cipangano abene Isilaeli palya ndibakalinga kuswa kuIjipiti.

¹⁰ Bapailishi ndibakalinga kuswa muŊanda yakwe Lesa mwakesula likumbi cakuteengashila.

¹¹ Likumbi ilyo lyakalinga kubengeshima kumumuni wa bulemu bwa Mwaami Lesa. Aboobo bapailishi bakaalilwa kuboolela mukati kuya mukucita milimo yabo.

¹² Lyalo Solomoni wakapaila ayi, “NoBaami baLesa, mwakaamba ayi munanooli mulikumbi lishiya.

¹³ Ono ndayaka Ŋanda yanu ibotu abuumbi, musena uyo ngomweelete kwikalaamo kwamuyayaya.”

Shakaamba Solomoni kubantu

¹⁴ Bantu ndibakalinga kwiimfwi, mwaami Solomoni wakasanduluka walanga nkobakalinga kubete. Mpeeke wakabasengela shoolwe kuswa kuli Lesa.

¹⁵ Wakaamba ayi, “Aalumbaishikwe Mwaami Lesa, Lesa wa bene Isilaeli! Wacita kweelana ambwaakashomesha bata baDefedi ndyaakaamba ayi,

¹⁶ ‘Kuswa bushiku ndindakakusha bantu bangu muIjipiti, nshina kusalaawo ndabala imwi mucishi coonse ca Isilaeli umo mweenga mwayakilwa ŋanda yangu ayi munoonambililaamo. Sombi ndakasalabo ndiwe Defedi ayi ulele bantu bangu.’ ”

¹⁷ Solomoni wakatolelela akwaamba ayi, “Bata baDefedi bakalinga babamba muyeeyo wakuyaka Ŋanda yakwe Lesa yakulambililaamo Mwaami Lesa, Lesa wa bene Isilaeli.

¹⁸ Sombi Mwaami Lesa wakaambila bata ayi, ‘Wakalulika kubamba muyeeyo wakunjakila ŋanda,

¹⁹ nakubi boobo teshi ukeeyaake webo. Mwanaako, ee, mwaana wakushala omwiine, ngweshi akayake Ŋanda yangu iyo.’

²⁰ “Mboobulya ono Mwaami Lesa wakacita kweelana ambwaakashomesha. Ndakapyana bwaami bwa bata baDefedi pabene Isilaeli alimwi ndakayaka ŋanda yakulambililaamo Mwaami Lesa, Lesa wa bene Isilaeli.

²¹ Ndakabamba amusena muŊanda yakwe Lesa wakubikaawo Libokoshi lya Cipangano ilyo licite mabwe a cipangano ico Lesa ncaakapanga abamashali besu bakulukulu ndyaakabakusha muIjipiti.”

Mupailo wakwe Solomoni

²² Mpeeke bantu boonse kababweneeko, Solomoni wakaya weemikana kunembo lya cipaililo akunyamuna maansa

²³ wapaila ayi, “NoBaami baLesa, baLesa ba bene Isilaeli, taaku lesa uli mbuli ndimwe mwiculu nabi pacishi ca panshi! Mwebo mulacita kweelana acipangano ncemwapanga abantu banu, akubabonesha lusuno lwanu na bekala mukunyumfwila ndimwe camoyo woonse.

²⁴ Mwakacita kweelana ambomwakashomesha bata baDefedi basebenshi banu. Sunu makani oonse ngomwakashomesha acitika cancinencine.

²⁵ Ono bulya noBaami baLesa, baLesa ba bene Isilaeli, ndaseenga kwaamba ayi mucite acalo cimwi cilya ncemwakashomesha bata ndimwakabaambila ayi bamaami ba bene Isilaeli lyoonse bananooli bamulunyungu lwabo kulilabo na kabamunyumfwila cakukonkotanya mbweeke mbobakalinga kucita balo.

²⁶ Mbweeke ubo nobaLesa ba bene Isilaeli, amushicite cancinencine shoonse isho nshemwakashomesha bata baDefedi basebenshi banu.

²⁷ “Ono sa cilaamba ayi mwebo nobaLesa ndushinisho inga mwekala mucishi ca panshi? Sobwe, nabibo liculu lyaceyabo kulaale kwaamba ayi mwebo mukonshe kwikalaamo. Ino ono ŋanda njendamuyakila yakomena cabuyani kwaamba ayi mwebo mwikaaleemo?

²⁸ NoBaami baLesa, baLesa bangu, nebo ndi musebenshi wanu. Amunyumfwe mupailo wangu akusuminisha ncentoosenga sunu.

²⁹ Kamulama Ŋanda yanu iyi mashiku amalumwi, kulama musena uyo ngomwakasala ayi tunoomulambililaamo. Kamunyumfwila na ndalanga kuŊanda yanu pakupaila.

³⁰ Kamunyumfwila mipailo yangu aya bantu banu bene Isilaeli na balanga kuŋanda yanu pakupaila. Amutukutike kwiculu uko nkomwikala akutulekelela shibiibi shesu.

³¹ “Na muntu wabekeshekwa ayi wabishila mubye akuletwa kucipaililo canu muŊanda yanu muno mukushomesha cakulumbila ayi taacite mulandu,

³² noBaami baLesa, amunyumfwe kwiculu uko akoombolosha basebenshi banu. Amupe mulandu uyo ulubite kweelana ambwaaelete akuleka wooyo utacite mulandu.

³³ “Na bantu banu bene Isilaeli bakomwa kubalwani mukwiinga bamubishisha, ono besa kuli ndimwe mukumulambila muŊanda yanu akupaila cakulibombya ayi mubalekelele,

³⁴ amubanyumfwile uko kwiculu. Amulekelele shibiibi sha bantu banu, akubaboosha mucishi ico ncemwakapa bamashali besu bakulukulu.

³⁵ “Na mfuula mweecata ceebo bantu banu bamubishisha, ono na basanduka kuswa kushibiibi shabo akulanga kuŊanda yanu alimwi bapaila cakulibombya kuli ndimwe,

³⁶ amubakutike uko kwiculu. Amulekelele shibiibi sha mwaami asha bantu banu bene Isilaeli. Amubaiishe kucita shiluleme. Lyalo, noBaami baLesa amutume mfula mucishi canu ico ncemwakapa bantu banu ayi ncabo kwalyoonse alyoonse.

³⁷ “Na muli nsala mucishi, mwaalu, nabi shishango shayuma kumuuwo ulungula na kulikwa kucisoshi, na bantu banu balwanikwa kubalwani babo, nabi na kwaba malwashi apusenepusene pakati kabo,

³⁸ amukutike mipailo yabo. Na bamwi pakati ka bantu banu bene Isilaeli, kwiinda mukupya myoyo, batandabika maansa kulansha kuŊanda yanu pakupaila,

³⁹ amukutike mipailo yabo. Amubakutike kwiculu uko nkomwikala, mubalekelele alimwi akubacafwa. Mwebo nweenka ndimwe mwishi miyeeyo ya bantu. Amucitile muntu womwi awomwi mbuli mbwaaelete

⁴⁰ kwaamba ayi bantu banu banoomunyumfwila lyoonse ndibekala mucishi ico ncemwakapa bamashali besu bakulukulu.

⁴¹ “Na muswamashi uyo ukala kucishi cakulaale wanyumfwa impuwo yanu, ono wesa mukulambila muŊanda yanu

⁴² mukwiinga bantu balaakunyumfwa mpuwo yanu ashintu shinene isho nshemwakacita kubantu banu,

⁴³ amukutike mipailo yakwe. Amumukutike kwiculu uko nkomwikala akucita sheesho nshaasenga kwaamba ayi bantu ba mucishi ca panshi bamwishiibe akunoomunyumfwila bweenka mbuli bene Isilaeli mbobacita. Lyalo balaakwishiba ayi Ŋanda yanu iyi njendakayaka ngomusena uko mwebo nkomweelete kulambililwa.

⁴⁴ “Na mwaambila bantu banu kuya mukulwana balwani babo, na kuli koonse nkweenga kababete bapaila kuli ndimwe, kabalangite ndabala inene iyi njemwakasala, aŊanda yanu njendakamuyakila,

⁴⁵ amukutike mipailo yabo. Amubakutike kwiculu uko akubalengesha kukoma.

⁴⁶ “Ono na bantu banu bamubishisha ceebo taaku muntu nabi womwi utabishi, lyalo mubukali bwanu mwalengesha ayi bakomwe akutolwa busha kucishi cimwi, nabi cishi ico kacili kulaale,

⁴⁷ amukutike mipailo ya bantu banu. Na kucishi uko kweenka nkweenga kababete basanduka kuswa kushibiibi shabo akupaila kuli ndimwe, kabalyaambilila shibiibi shabo shoonse, noBaami baLesa amukutike mipailo yabo.

⁴⁸ Na basanduka camoyo woonse kuswa kushibiibi shabo mucishi ico cabusha akupaila kabalangite kucishi cino ncemwakapa bamashali besu bakulukulu, ndabala ino njemwakasala alimwi aŊanda yanu iyo njendakamuyakila,

⁴⁹ amukutike mipailo yabo. Amubakutike kwiculu uko nkomwikala akubanyumfwila nkumbu.

⁵⁰ Mubalekelele shibiibi shabo shoonse abwaashu bwabo kuli ndimwe. Amulengeshe balwani babo kubeendelesha cankumbu.

⁵¹ Aba mbantu banu abo mbomwakakusha muIjipiti, mulya muli anga mumulilo usungulula mabwe.

⁵² “NoBaami baLesa Beshinkusu shoonse, kamubanyumfwila nkumbu bantu banu bene Isilaeli amwaami wabo. Amukutike mipailo yabo kulilabo na basenga lucafwo kuswa kuli ndimwe.

⁵³ Mwakabasala pakati ka bantu bamwi boonse kwaamba ayi babe bantu banu, bweenka mbuli mbomwakabalwiita kwiinda muli Mose musebenshi wanu, ndimwakakusha bamashali besu bakulukulu kuswa mucishi ca Ijipiti.”

Mupailo wakweelaako

⁵⁴ Solomoni ndyaakamanisha kupaila kuMwaami Lesa, wakanyamuka kunembo lya cipaililo, uko nkwaakalinga kufukeme kaatambikite maansa mwiculu.

⁵⁵ Muliswi lya peculu wakasenga shoolwe kuswa kuli Lesa ayi shibe pabantu boonse bakalinga waawo. Wakaamba ayi,

⁵⁶ “Aalumbaishikwe Mwaami Lesa uyo wakalengesha luumuno pabantu bakwe kweelana ambwaakashomesha. Wacita kweelana akushomesha kwakwe koonse uko nkwaakashiya kwiinda muli Mose musebenshi wakwe.

⁵⁷ Mwaami Lesa, Lesa wesu aabe aswebo bweenka mbwaakalinga abamashali besu bakulukulu. Atatushiyi cisuukila nabi kutusuula.

⁵⁸ Aatulengeshe kuba bantu banyumfwila nguwe lyoonse kwaamba ayi tunookala mbuli mbwaasuni akukonkela milawo amilasho yoonse njaakapa bashali besu bakulukulu.

⁵⁹ Mwaami Lesa, Lesa wesu aaingashile mupailo uyu ashasengwa shoonse. Aanyumfwile nkumbu bene Isilaeli amwaami wabo lyoonse kweelana ashiyandika kuli mbabo bushiku abushiku.

⁶⁰ Paceebo ceeco mishobo yoonse ya mucishi ca panshi ilaakwishiba ayi Mwaami Lesa eenkabo ngoLesa, taaku aumwi.

⁶¹ Nobantu bakwe Lesa, amushomeke kuMwaami Lesa lyoonse akukonkela milawo amilasho yakwe yoonse, mbuli mbomucita bulya.”

Kubengwa kwa ŋanda yakwe Lesa

⁶² Lyalo mwaami Solomoni abantu abo mbwaakalingaabo bakabenga milambu kuMwaami Lesa.

⁶³ Wakabenga milambu ya ŋombe shili 22,000 ambelele shili 120,000 ayi njimilambu ya bwanabwankashi. Munshila iyi mwaami abantu boonse bakabenga Ŋanda yakwe Lesa kuli nguwe.

⁶⁴ Bushiku ubu bweenka wakasalasha musena wa pakati ka lubansa lwa Ŋanda yakwe Lesa wakalinga kunembo lya njiyo. Lyalo wakabengelaako milambu yakuntenta aya banyama bakabumbulu. Wakabenga ashipo sha fulaulo alimwi amafuta a banyama ayi njimilambu ya bwanabwankashi. Wakacita boobo mukwiinga cipaililo cakapangwa abulonse cakaceya kwaamba ayi babengelewo milambu yoonse iyi.

⁶⁵ KuŊanda yakwe Lesa uko, Solomoni abantu boonse bene Isilaeli bakaba akusekelela kwa Shimpaka kwanshiku shili shosanwe ashobilo. Kwakalinga bantu baanji bakaswa kulaale mbuli kumwinjililo wa kuAmati kumatwa akumanyinsa a Ijipiti kumalenge.

⁶⁶ Pabushiku bwasanu ashotatwe Solomoni wakabapalanganya. Boonse bakamulumba akuboolela mwabo mwabo kabasangalete mukwiinga wa shoolwe Mwaami Lesa nshaakapa Defedi musebenshi wakwe alimwi abantu bakwe boonse bene isilaeli.