1 Baami 4 - Baibo Busansulushi Bwa Libuku Ili

Meena a bacinenenene bakwe Solomoni

¹ Solomoni wakalinga mwaami wa cishi ca Isilaeli coonse.

² Ono bakalinga bacinenenene bakwe mbaaba. Mupailishi wakalinga Asaliya mwanaakwe Sadoki.

³ Balembi bakalinga Eliolepi aAija, bana bakwe Shisha. Shikulemba makani a kubwalo wakalinga Jeoshafati mwanaakwe Ayiludi.

⁴ Mutanjilili wa bashilumamba wakalinga Benaiya mwanaakwe Jeoiyada. Bapailishi bakalinga Sadoki aAbiyata.

⁵ Munene wa beendeleshi mushipansha sha cishi wakalinga Asaliya mwanaakwe Natani. Mupailishi, shikupanda maano mwaami wakalinga Sabudi mwanaakwe Natani.

⁶ Shikweendelesha ŋanda ya bwaami wakalinga Aisha. Shikweendelesha beshikucatwa cibalu wakalinga Adonilamu mwanaakwe Abida.

⁷ Solomoni wakasala beendeleshi likumi abobilo mushipansha sha cishi coonse ca Isilaeli. Aba mulimo wabo wakalinga ngwakuleta shakulya kumwaami abamuŋanda yakwe kuswa mushipansha shabo. Uli woonse wakalinga kuleta shakulya shikwana mweenshi womwi mumwaaka.

⁸ Meena abo ashipansha nshebakalinga kweendelesha ngaaya. Beni Elu wakalinga kweendelesha cishi ca tulundu cakwe Efuleemu.

⁹ Beni Deka wakalinga kweendelesha ndabala inene ya Makasi, Shalibimu, Beti Shemeshi, Eloni aya Beti Anani.

¹⁰ Beni Esedi wakalinga kweendelesha ndabala inene ya Alubotu aya Soko alimwi acishi coonse ca Eefa.

¹¹ Beni Abinadabu, uyo wakalinga kweebete Tafati mwanaakwe Solomoni, wakalinga kweendelesha musena woonse wa Dole.

¹² Baana mwanaakwe Ayiludi wakalinga kweendelesha ndabala inene ya Taanaki aya Megido pantu pomwi amusena woonse wakalinga pafwaafwi andabala ya Beti Shani, pafwaafwi andabala ya Saletani, kumalenge lya ndabala ya Jesiliilu kuya mukushika akundabala inene ya Abelo Mewola alimwi andabala inene ya Jokimeyamu.

¹³ Beni Geba wakalinga kweendelesha ndabala inene ya Lamoti mucishi ca Gilyadi, amishi ya muGilyadi yakalinga ya mukowa wakwe Jeya wamulunyungu lwakwe Manase. Wakalinga kweendelesha amusena wa Agobu mucishi ca Bashani. Mandabala anene ayo oonse akalinga 60. Yomwi ayomwi kaishingulushitwe alubumbu ashisasa sha paminjililo sha nshimbi sha bulonse.

¹⁴ Ainadabu mwanaakwe Ido wakalinga kweendelesha cipansha ca Maanaimu.

¹⁵ Aimaasi uyo wakalinga kweebete Basemati mwanaakwe Solomoni mwanakashi umwi, wakalinga kweendelesha cishi ca bene Nafutali.

¹⁶ Baana mwanaakwe Ushayi wakalinga kweendelesha cishi ca bene Asha andabala ya Biloti.

¹⁷ Jeoshafati mwanaakwe Paluwa wakalinga kweendelesha cishi ca bene Isaka.

¹⁸ Shimeyi mwanaakwe Ela wakalinga kweendelesha cishi ca bene Benjameni.

¹⁹ Geba mwanaakwe Uli wakalinga kweendelesha mucishi ca Gilyadi ico cakalinga kulelwa amwaami Sioni wa bene Amoli alimwi amwaami Ogi wa kuBashani. Ono kuleka baaba bali likumi abobilo, kwakalinga mweendeleshi wa cishi coonse ca Juda.

Kulela kwakwe Solomoni mbokwakaswitilila

²⁰ Bene Juda abene Isilaeli bakafula anga ngumuseese wa kuloombe lwa lweenge. Bakalinga kulya akunwa, alimwi bakalinga kusangalete.

²¹ Solomoni wakalinga kweendelesha shishi shoonse kuswa kuMulonga wa Yufuletisi kuya mukushika kucishi ca Filisitiya kumanyinsa a Ijipiti. Aba boonse bakalinga kusonkela kuli nguwe alimwi wakabeendelesha kwabuumi bwakwe boonse.

²² Shintu shakalinga kusuni Solomoni pabushiku bomwi abomwi ngamalita ali 5,000 a fulaulo upelekete, malita ali 10,000 a busu,

²³ ŋombe likumi shilya shakulya sha mumankubala, ŋombe makumi obilo shilya mweemfu, mbelele mwaanda, kubikaako abakonse, shaambololo, bananja alimwi abayuni beenite.

²⁴ Solomoni wakalinga kulela cishi coonse cakalinga kumbo lya Mulonga wa Yufuletisi kuswa kuTifusa kuya mukushika akundabala inene ya Gasa. Bamaami boonse kumbo lya Yufuletisi bakalinga mumaansaakwe alimwi wakalinga kwikala muluumuno ashishi shakalinga kumushingulukite.

²⁵ Bene Juda abene Isilaeli boonse kuswa kuDani kuya mukushika kuBiyasheba bakalinga kwikala muluumuno kwabuumi bwakwe boonsebo. Mukobo womwi awomwi wakalinga kucite minyansa yakwe ashisamu sha nkuyu.

²⁶ Solomoni wakalinga kucite shipinda sha maaki atinta shikoci shili 4,000 pantu pomwi amaaki amwi ali 12,000.

²⁷ Beendeleshi bakwe bali likumi abobilo, womwi awomwi mumweenshi ngwaakapekwa wakalinga kutumya shakulya kumwaami Solomoni shalinga kuyandika kuli nguwe abaabo boonse mbwaakalinga kulyaabo.

²⁸ Mweendeleshi womwi awomwi wakalinga kutumya cipansha cakwe ca bale abwiisu, sha maaki atinta shikoci shankondo amaaki amwi uko nkoshayandika.

²⁹ Lesa wakapa Solomoni busongo, kunyumfwishisha kwa shintu shoonse alushibo luteelekwa.

³⁰ Solomoni wakalinga kucite busongo kwiinda basongo ba kwicwe nabi basongo bene Ijipiti.

³¹ Wakalinga musongo wiinda bantu boonse. Ee, wakalinga musongo kwiinda Etani mwine Esila, alimwi aEmani, Kaluko aDada bana bakwe Maoli. Impuwo yakwe yakamwaika kushishi shakalinga kushingulukite.

³² Wakapanga tushimpi tuli 3,000 alimwi anyiimbo shili 1,000 akwiindilila.

³³ Wakalinga kwiisha pashisamu, shishango alimwi ashisamu sha sida sha kuLebanoni kushika akumitenga ya Isopu iyo itandabalila kulubumbu. Wakalinga kwiisha apabanyama, bayuni, ntale ashintu sha mushobo uyo alimwi apanswi.

³⁴ Bamaami boonse ba mucishi bakanyumfwa shabusongo bwakwe akutuma bantu ayi baye bamukutike.