1 Baami 22 - Baibo Busansulushi Bwa Libuku Ili

Mikaya mbwaakacenjesha Aabu

¹ Kuswawaawo pakeenda myaaka yotatwe kutabawo nkondo pakati ka bene Isilaeli alimwi abene Silya.

² Sombi mumwaaka watatu uyo mwaami Jeoshafati wa kuJuda wakaya mukubona mwaami Aabu wa kuIsilaeli.

³ Aabu wakeepusha bacinenenene bakwe ayi, “Ceebonshi tatutooya mukubwesa ndabala ya Lamoti ili mucishi ca Gilyadi kuswa mumaansa a mwaami wa kuSilya? Ndabala ilya njesu!”

⁴ Lyalo Aabu wakeepusha Jeoshafati ayi, “Sa teshi uye anebo mukulwana ndabala ya Lamoti.” Jeoshafati wakakumbula ayi, “Ndilibambite na webo walibambila. Bashilumamba bangu abaabo beshikulwanina pamaaki boonse balilibambite.”

⁵ Ono Jeoshafati wakaamba alimwi ayi, “Atutaangune twiipushe Mwaami Lesa.”

⁶ Mpeeke Aabu wakeeta balaluki bakalinga mpashi myaanda yone akubeepusha ayi, “Sa nje nkalwaane ndabala ya Lamoti nabi na sobwe?” Balaluki bakakumbula ayi, “Kamuya mukalwaane. Mwaami Lesa utoomucafwa kwaamba ayi mukome.”

⁷ Sombi Jeoshafati wakeepusha ayi, “Sa taaku mulaluki aumwi ngweenga tweepushilaamo Mwaami Lesa mbwaatooyeeya?”

⁸ Aabu wakakumbula ayi, “Nkwaali womwi wiitwa ayi Mikaya mwanaakwe Imila. Sombi nebo ndimupatite mukwiinga lyoonse taalaluki shintu shibotu pali ndime, sombi sheenka shibiibi.” Jeoshafati wakamukumbula ayi, “Tooelete kwaamba boobo!”

⁹ Lyalo Aabu mwaami wa bene Isilaeli wakeeta wacinenenene wakwe womwi akumwaambila ayi aye akeete Mikaya cakufwambaana.

¹⁰ Bamaami boonse bobilo bakalinga kufwete mingaanjo yabo ya bwaami kabashiite pashuuna sha bwaami, palubansa lwakulupwitaawo kufwaafwi amwinjililo wa ndabala ya Samaliya. Balaluki abo bakalinga kulaluka kunembo lyabo.

¹¹ Mulaluki umwi Sedekiya mwanaakwe Kenaana wakapanga meeca anshimbi akulwiita Aabu ayi, “Mwaami Lesa waamba ayi, ‘Ici nceshi mukalwanisheeko bene Silya akubakoma.’ ”

¹² Balaluki bamwi boonse bakaamba makani ngomunya aya ayi, “Kamuya mukalwane bene Lamoti alimwi mulaakubakoma. Mwaami Lesa ulaakumupa coolwe cakukoma.”

¹³ Paciindi ceenka ico wacinenenene uyo wakalinga kuya mukwiita Mikaya wakamwaambila ayi, “Balaluki bamwi boonse balaluka kale shakuswitilila kwa mwaami, awebo waambe bweenka ubo.”

¹⁴ Sombi Mikaya wakakumbula ayi, “Bweenka mbocibete lushinisho ayi Mwaami Lesa ngumuumi, mbweeke ubo ntoobalwiitabo sheenka nsheshi andwiite!”

¹⁵ Mpeeke mulaluki ndyaakashika mukubonekela kumwaami Aabu, mwaami wakamwiipusha ayi, “Mikaya, sa nebo amwaami Jeoshafati tuye tukalwaane ndabala ya Lamoti nabi sobwe?” Mikaya wakakumbula ayi, “Kamuya mukalwaane! Ee, mulaakwiikoma. Mwaami Lesa ulaakumupa coolwe cakukoma.”

¹⁶ Sombi Aabu wakaamba ayi, “Na utoondwiita cikani muliina lya Mwaami Lesa, amba calushinisho! Ulisuni nkaambe mankanda ongaye pacikani ici?”

¹⁷ Lyalo Mikaya wakwaamba ayi, “Ntoobona bashilumamba bene Isilaeli bapalangene patulundu anga nimbelele shitacite mweembeshi. Ono Mwaami Lesa waamba ayi, ‘Aba bantu tabacite mutanjilili, amubaleeke baye kumishaabo muluumuno.’ ”

¹⁸ Mpomunyaawo Aabu wakaambila Jeoshafati ayi, “Sa nshikwe kukulwiita ayi uyu taalalukiwo shibotu pali ndime? Lyoonse ulalalukabo sheenka shibiibi!”

¹⁹ Mpeeke Mikaya wakatolelela kwaamba ayi, “Ono amunyumfwe makani aya! Ndakabona Mwaami Lesa kaashiite pacuuna ca bwaami kwiculu abaanjelo bakwe boonse kabeemfwi kushinguluka nguwe.

²⁰ Mwaami Lesa wakeepusha ayi, ‘Ngani eshi akacenjeeke Aabu kwaamba ayi akacaikwe kuLamoti?’ Baanjelo bamwi bakaamba cikani comwi, ingayi bamwi bakaamba cimbi

²¹ kushikila mushimu wakesa kunembo lya Mwaami Lesa akwaamba ayi, ‘Ntooya nkamucenjeeke.’

²² Mwaami Lesa wakeepusha ayi, ‘Ulaakumucenjeeka buyani?’ Mushimu wakakumbula ayi, ‘Ndaakuya mukulengesha balaluki bakwe Aabu kwaamba shabubeshi.’ Mwaami Lesa wakaamba ayi, ‘Koya ukamucenjeeke. Ulaakucikonsha.’ ”

²³ Lyalo Mikaya wakamanisha akwaamba ayi, “Mbwaabete makani ubo. Mwaami Lesa waambila balaluki banu ayi bamubeece. Lakwe mwiine wapingula kale ayi mutokwiinda mushinkunka!”

²⁴ Lyalo mulaluki Sedekiya mwanaakwe Kenaana wakaya kuli Mikaya, wamuuma lupaka pameenso akumwiipusha ayi, “Mushimu wa Mwaami Lesa wakaswaawo lili muli ndime akwisa mukwaamba awebo?”

²⁵ Mikaya wakakumbula ayi, “Ulaakwishiba na ukaye mukuyuba mucipinda ca mukati kaŋanda.”

²⁶ Mpeeke mwaami Aabu wakaambila wacinenenene wakwe umwi ayi, “Amucate Mikaya mumutole kuli Amoni, mweendeleshi wa ndabala inene iyi alimwi akuli Joashi mwanaamwaami.

²⁷ Muye mukabalwiite bamubike muntolongo akunoomupa shinkwa amaanshi kushikila ndaakuboola kaancili muumi.”

²⁸ Mikaya wakaamba ayi, “Na mulaakuboola kamuli boomi, nkokwaamba ayi anu Mwaami Lesa taakwe kwaamba muli ndime!” Mpeeke wakatolelela kwaamba ayi, “Ishi nshendaamba mushilabilile noonse!”

Kufwa kwakwe Aabu

²⁹ Mpomunyaawo Aabu mwaami wa bene Isilaeli aJeoshafati mwaami wa bene Juda bakaya mukulwana ndabala ya Lamoti mucishi ca Gilyadi.

³⁰ Aabu wakaambila Jeoshafati ayi, “Twatalika kulwana ntoolilubyalubya, sombi webo ufwale mungaanjo wa bwaami.” Lyalo mwaami wa bene Isilaeli wakalinga kulwana kabatamwishi ayi ngumwaami.

³¹ Ono mwaami wa bene Silya wakaambila bamatanjilili ba bashilumamba balwanina mushikoci bakalinga makumi otatwe abobilo, ayi batayi mukucaya umwi, sombibo mwaami wa bene Isilaeli.

³² Lyalo ndibakabona mwaami Jeoshafati, balo boonse bakayeeya ayi ngomwaami wa bene Isilaeli. Lyalo bapiluluka akuyanda kumucaya. Sombi ndyaakoolobesha,

³³ bakabona ayi teshi mwaami wa bene Isilaeli. Mpeeke bakacileka kumulwana.

³⁴ Nakubi boobo shilumamba umwi mwine Silya wakawaala mufwi ciwaalewaale akuyasa mwaami Aabu pakati kamanungilo a shakufwala shakwe sha nkondo. Wakoolobesha kuli shikweensha cikoci cakwe ayi, “Maawe wanjasa! Piluluka tusweemo munkondo.”

³⁵ Nkondo yakakalala kushikila macolesha. Muciindi ico mwaami Aabu lakwe wakalinga kunootandabetebo mucikoci cakwe kaalangene abene Silya. Bulowa bwakalinga kunooswabo pacilonda cakwe bwakesusha panshi pacikoci. Ingayi macolesha wakafwa.

³⁶ Lisuba ndilyakalinga kuya cipila, cakaambilishikwa kubashilumamba bene Isilaeli ayi, “Womwi awomwi aboolele kundabala yakwe mucishi cine mishaabo!”

³⁷ Munshila iyo mwaami Aabu wakafwa. Lyalo mubili wakwe bakootola kundabala ya Samaliya kuya mukuubika.

³⁸ Cikoci cakwe bakacisansha pacishiba ca muSamaliya uko bafuule nkobakalinga kusambila. Bakabwa bakamyanguta bulowa bwakwe bweenka mbuli bwaakaamba Mwaami Lesa.

³⁹ Shintu shimwi shoonse shakacita mwaami Aabu, kubikaawo ambwaakayaka ŋanda yakwe iyo yakaboteshekwa ameeca a nsofu alimwi amandabala anene oonse ngaakayaka, shililembetwe mulibuku lya buumi bwa bamaami ba bene Isilaeli.

⁴⁰ Aabu wakafwa alimwi Aasiya mwanaakwe ngowakapyana bwaami bwakwe.

Mwaami Jeoshafati wa bene Juda

⁴¹ Mumwaaka wane wa bwaami bwakwe Aabu mwaami wa cishi ca Isilaeli, Jeoshafati mwanaakwe Asa wakaba mwaami wa cishi ca Juda

⁴² kaacite myaaka makumi otatwe ayosanwe. Wakalela muJelusalemu kwamyaaka makumi obilo ayosanwe. Banyina bakalinga mbaAsuba bana babo baShili.

⁴³ Bweenka bwakacita baishi baAsa bataanshi pali nguwe, wakacita shiluleme pameenso a Mwaami Lesa. Sombi misena yakulambililaako ya patulundu taikwe kumwayoolwa. Paceebo ceeco bantu bakatolelela kubenga milambu akutenta tununkila kabotu uko.

⁴⁴ Jeoshafati wakapanga cibusa amwaami wa bene Isilaeli.

⁴⁵ Shintu shimwi shoonse shakacita Jeoshafati, milimo yakwe yakubula boowa ankoondo nshaakalwana, shoonse shililembetwe mulibuku lya buumi bwa bamaami ba bene Juda.

⁴⁶ Wakakusha basankwa bakalinga kucitana bufuule kushipaililo sha bakunsengwe abo bakalinga bacaala ciindi baAsa baishi ndibakamana kulela.

⁴⁷ Cishi ca Edomu tecakalinga kucite mwaami. Cakalinga kulelwa amucafwi wakalinga kusalwa amwaami wa bene Juda.

⁴⁸ Mwaami Jeoshafati wakapanga maato anene akalinga kweenda palweenge ayi aye kucishi ca Ofi kuya mukuleta golodi. Sombi maato ayo taakwe kushika kuOfi mukwiinga akanyonyooka kuEsiyoni Geba.

⁴⁹ Lyalo mwaami Aasiya mwanaakwe Aabu wakasenga Jeoshafati ayi, “Suminisha bantu bangu kunookweenda pamaanshi abantu bako.” Sombi lakwe Jeoshafati wakakaka.

⁵⁰ Jeoshafati wakafwa akubikwa mushuumbwe sha bamaami muNdabala inene yakwe Defedi, lyalo Jeolamu mwanaakwe Jeoshafati wakapyana bwaami bwakwe.

Mwaami Aasiya wa bene Isilaeli

⁵¹ Mumwaaka wa likumi amyaaka yosanwe ayobilo wa bwaami bwakwe Jeoshafati mwaami wa cishi ca Juda, Aasiya mwanaakwe Aabu wakaba mwaami wa cishi ca Isilaeli. Wakalela muSamaliya myaaka yobilo.

⁵² Wakabisha kuMwaami Lesa mukukonkela shakalinga kucita baAabu baishi, baJesebelo banyina alimwi amwaami Jeloboamu uyo wakalengesha bene Isilaeli kubisha.

⁵³ Wakalinga kulambila akusebensela Baali alimwi bweenka bwakacita baishi, alakwe wakasonkomona bukali bwa Mwaami Lesa, Lesa wa bene Isilaeli.