1 Baami 21 - Baibo Busansulushi Bwa Libuku Ili

Muunda wa minyansa wakwe Naboti

¹ Ono kwakalinga musankwa umwi wakalinga kwiitwa ayi Naboti mwine Jesiliilu. Musankwa uyo wakalinga kucite muunda pafwaafwi aŋanda yakwe Aabu mwaami wa bene Samaliya.

² Bumwi bushiku Aabu wakaambila Naboti ayi, “Mpebo muunda wako wa minyansa mukwiinga uli pafwaafwi aŋanda yangu. Ndisuni kwaamba ayi nkashangeemo bucisa. Ndaakukupa muunda wa minyansa wiindaawo kubota pamuunda wako. Ono na koosuni inga wangulisha pamweelo uli woonse ngoosuni.”

³ Sombi Naboti wakakumbula ayi, “Muunda uyu ndakashiilwabo kubamashali bangu bakulukulu alimwi Mwaami Lesa atansuminishi kwaamba ayi mupe muunda uyu!”

⁴ Lyalo Aabu wakaya kumishaabo kaalisukeme alimwi kaaungumene abuumbi. Wakakalala abuumbi pamakani ayo Naboti mwine Jesiliilu ngaakaamba kuli nguwe. Wakashika woona pabulo bwakwe, walanga kulubumbu akukaka kulya.

⁵ Jesebelo mukaakwe wakaya kuli nguwe akumwiipusha ayi, “Ino mwoongumana buyani? Ino mwakakilanshi kulya?”

⁶ Wakakumbula ayi, “Ceebo ca sheesho shankumbula Naboti mwine Jesiliilu. Ndalinga ndamwaambila ayi ngule muunda wakwe wa minyansa nabi kumupetaamo muunda umwi. Sombi lakwe wakaka shoonse!”

⁷ Mpomunyaawo Jesebelo mukaakwe wakaamba ayi, “Sa mwebo tamushi baami ba cishi ca Isilaeli? Amubuke, musangalale akulya! Nebo ntoomubwesela muunda wa minyansa wakwe Naboti mwine Jesiliilu.”

⁸ Mpeeke Jesebelo wakalemba makalata wabikaawo aliina lyakwe Aabu, wacala akalamatila wa mwaami akutumina bamaloba abacinenenene bene Jesiliilu.

⁹ Munkalata yomwi yomwi wakalembaamo ayi, “Amubambe bushiku bwakulikasha kulya. Kuswawaawo mukeete bantu boonse akupa Naboti cuuna ca bulemu.

¹⁰ Mubike basankwa beshishimfulunganya bobilo kwikala kabalangene anguwe kwaamba ayi bamubekeshe ayi wakashingana Mwaami Lesa alimwi amwaami wa cishi. Lyalo mumukusheewo akumutola kunsengwe lya ndabala mukumuuma mabwe akumucaya.”

¹¹ Bamaloba bacinenenene bene Jesiliilu bakacita bweenka bwakabalwiita Jesebelo mumakalata.

¹² Bakasala bushiku bwakulikasha kulya, bakeeta bantu boonse akwikalika Naboti pacuuna ca bulemu.

¹³ Lyalo basankwa beshishimfulunganya bobilo abo bakekala kabalangene anguwe akumubekesha ayi wakashingana Mwaami Lesa alimwi amwaami wa cishi. Lyalo bakamukusha mundabala akumucaya kumabwe.

¹⁴ Lyalo nkombe yakatumwa kuli Jesebelo ayi, “Naboti twamucaya amabwe.”

¹⁵ Mpomunyaawo Jesebelo ndyaakatambulabo makani akwaamba ayi Naboti mwine Jesiliilu wacaikwa amabwe wakalwiita Aabu ayi, “Naboti ulifwite. Ono kamuya mukabwese muunda wakwe wa minyansa uyo ngwaakalinga akaka kumuulisha.”

¹⁶ Paciindi ceenka ico Aabu wakaya mukubwesa muunda uyo ayi ube waakwe.

¹⁷ Mpomunyaawo Mwaami Lesa wakaambila Elija mulaluki mwine Tishibe ayi,

¹⁸ “Koya kumwaami Aabu wa kuSamaliya. Utooya umucane mumuunda wa minyansa wakwe Naboti. Ulisuni kuubwesa ayi ube waakwe.

¹⁹ Uye umwaambile ayi Mwaami Lesa waamba ayi, ‘Ndiwamana kucaya muntu uyo, sa ulisuni kubwesa amuunda wakwe?’ Lyalo umulwiite ayi, ‘Pamusena apo peenka bakabwa mpobakamyangutila bulowa bwakwe Naboti, awebo bulowa bwako mpweshi bakabumyangutile.’ ”

²⁰ Lyalo Aabu ndyaakabona Elija wakaamba ayi, “Sa te wancanikisha kale omulwani wangu?” Elija wakakumbula ayi, “Ee, ndamucana, mwebo nomucilibengetebo kukucita shintu shibiibi pameenso a Mwaami Lesa.

²¹ Aboobo Mwaami Lesa wakwaambila ayi, ‘Ndaakuleta shinkunka pali ndiwe. Ndaakukunyonyoola pantu pomwi abana bako basankwa boonse, bamanene abanike.

²² Bamuŋanda yako balaakuba anga mbamuŋanda ya mwaami Jeloboamu mwanaakwe Nebati alimwi anga mbamuŋanda ya mwaami Baasha mwanaakwe Aija, mukwiinga webo wasonkomona bukali bwangu mukulengesha bene Isilaeli kubisha.’

²³ Ono pali Jesebelo, Mwaami Lesa waamba ayi, ‘Bakabwa balaakulya mubili wakwe mundabala ya Jesiliilu.’

²⁴ Wamuŋanda yako uli woonse weshi akafwite mundabala inene ulaakulikwa kubakabwa, alimwi uyo woonse weshi akafwite muliwesa ulaakulikwa makubi.”

²⁵ Takuna kubawo kale muntu wakalibenga kucita shintu shibiibi pameenso a Mwaami Lesa mbuli aAabu. Wakalinga kucita boobo kwiinda mukulwiitikwa kuli Jesebelo mukaakwe.

²⁶ Aabu wakacita shibiibi shilensha nsoni pakunoolambila shibumbwabumbwa mbuli mbobakalinga kucita bene Amoli abo mwaami Lesa mbwaakatanda mucishi, bene Isilaeli ndibakalingabo kwinjilaamo.

²⁷ Ono Elija ndyaakamana kwaamba, Aabu wakakwamoona shakufwala shakwe akufwala masaka. Wakalikasha kulya akutalika koonabo mumasaka alimwi kaaenda kaaungumene alimwi cabuumba.

²⁸ Lyalo Mwaami Lesa wakaambila Elija mulaluki ayi,

²⁹ “Sa wamubona Aabu mbwaalyungumika kuli ndime? Ono mbwaacita bobulya, teshi nkalete shinkunka isho kaacili muumi. Ndaakushileta ciindi mwanaakwe aakunoolela.”