1 Baami 20 - Baibo Busansulushi Bwa Libuku Ili

Nkondo abene Silya

¹ Paciindi ico Benadadi mwaami wa bene Silya wakabunganya bashilumamba bakwe boonse. Bamaami bamwi bali makumi otatwe abobilo bakesa mukumucafwa amaaki abo ashikoci shabo. Bakashinguluka ndabala ya Samaliya akwiilwana.

² Benadadi wakatuma nkombe mundabala inene iyo kuli Aabu mwaami wa cishi ca Isilaeli yakwaamba ayi, “Baami baBenadadi balisuni ayi

³ mwaabe silifa, golodi, bamakaanu abaabo bashimpite pakati ka bana banu, mumaansaabo.”

⁴ Aabu wakakumbula ayi, “Mulwiite baami bangu baBenadadi ayi ndasumina. Balo inga babwesabo shintu shoonse nsheencite pantu pomwi anebo.”

⁵ Pesule balya bakatola nkombe bakaboola kuli Aabu. Ono bakaletelela ashimwi shakalinga kusuni mwaami Benadadi. Bakaamba ayi, “Ndakamutumina maswi akwaamba ayi mwaabe silifa, golodi, bamakaanu abana banu boonse.

⁶ Ono ciilo paciindi ceenka cino ndaakutuma bacinenenene bangu kwaamba ayi bakalangoole muŋanda yanu amumaanda a bacinenenene banu boonse akubwesa shintu shoonse sheshi bakabone ayi nshibotu.”

⁷ Lyalo mwaami Aabu wakeeta bamaloba boonse mucishi cakwe akubaambila ayi, “Mwaboona muntu uyu utootupilinganya. Wantumina nkombe yakwe yaamba ayi ulisuni bakaangu, bana bangu, silifa yangu alimwi agolodi. Nebo ndasumina shoonse isho.”

⁸ Bamaloba abantu bamwi boonse bakakumbula ayi, “Kutamukutika sobwe. Kuteelesha kusumina ncaatokwaamba napaceyi.”

⁹ Lyalo Aabu wakabakumbula bakaleta nkombe yakwe Benadadi ayi, “Mulwiite baami bangu ayi ndasumina kucita nshebaamba pakataanshi, sombi ayo ngomwaamba mulweendo lwabili ndaakaka.” Mpeeke abo bakaleta nkombe bakaboolela.

¹⁰ Lyalo Benadadi wakatuma aimwi nkombe kuli Aabu yakwaamba ayi, “Ntooleta bashilumamba baanji kwaamba ayi bese banyonyoole ndabala yanu inene akwiipelapela cakubabo lusuko. Balesa bangu bancaaye na mbule kucita cintu ici!”

¹¹ Mwaami Aabu wakakumbula ayi, “Mulwiite baami baBenadadi kwaamba ayi shilumamba mwiine mwiine ulalilumbaishabo na wamana nkondo kuteshi na taana.”

¹² Benadadi wakatambula kukumbula kwakwe Aabu ciindi lakwe abaabo bamaami bamwi mbwaakalinga kucafwanaabo ndibakalinga kunwa mumatente abo. Mpomunyaawo wakaambila bashilumamba bakwe ayi balibambile kuya mukulwana ndabala iyo. Mpeeke abalo bakalibambila.

¹³ Paciindi ceenka ico mulaluki wakaya kuMwaami Aabu akwaamba ayi, “Mwaami Lesa waamba ayi, ‘Utaloondi kufula kwa bashilumamba abo! Ntookupa nkusu shakukoma balwani bako sunu, lyalo ulaakwishiba ayi ndi Mwaami Lesa.’ ”

¹⁴ Aabu wakeepusha ayi, “Ngani ngweshi akatalike kulwana?” Mulaluki wakakumbula ayi, “Mwaami Lesa utokwaamba ayi bashilumamba bacikula bwangu abo batootanjililwa abeendeleshi ba mushipansha sha cishi cako mbweshi baye batalike.” Lyalo mwaami wakeepusha ayi, “Ngani weshi abe mutanjilili wa bashilumamba abo beene beene?” Mulaluki wakakumbula ayi, “Ndimwe.”

¹⁵ Mpeeke mwaami Aabu wakeeta bashilumamba bacikula bwangu abo bakalinga kutanjililwa abeendeleshi. Bashilumamba abo bakalinga 232. Mpeeke wakeeta bashilumamba bamwi bene Isilaeli abo bakalinga 7,000.

¹⁶ Kulwana kwakatalika ciindi lisuba ndilyakashika pakati ka mutwi. Paciindi ico Benadadi abamaami abo mbwaakalinga kucafwanaabo bakalinga makumi otatwe aobilo ndibakalinga kucikolwa mumatente abo.

¹⁷ Bashilumamba bacikula bwangu bakataanguna kuya. Mpeeke beshikusensa Benadadi mbwaakalinga atuma bakaboola mukuluula ayi bashilumamba baashika kuswa muSamaliya.

¹⁸ Wakaambilisha ayi, “Mubaleete kabali boomi, tacicite mulandu nabi batoosa mukulwana nabi na batoosa caluumuno.”

¹⁹ Bashilumamba bacikula bwangu mbobakatanjila, kuboolaawo mbashilumamba bene Isilaeli.

²⁰ Womwi awomwi wakacaya muntu wakalinga kulwanaakwe. Mpomunyaawo bene Silya bakaloonda akucica, abalo bene Isilaeli bakabakonkela anga ninsuki. Sombi nacibi boobo lakwe Benadadi wakaloboka paliaki pantu pomwi abamwi bashilumamba beshikulwanina pamaaki.

²¹ Mwaami Aabu wakanyamuka akunyonyoola maaki ashikoci. Wakakoma bene Silya boonse.

²² Lyalo mulaluki wakaya kumwaami Aabu akumwaamba ayi, “Amuboolele mukalibambile kwiinda waawa mukwiinga mwaami wa bene Silya ulaakwisa alimwi mukulwana mwakali paciindi ceenka cino.”

Bene Silya mbobakesa lwabili mukulwana

²³ Ono bacinenenene bakwe Benadadi bakaamba ayi, “Balesa ba bene Isilaeli mba mumalundu. Nceceeco ncebakatukomena. Tulyeelete kubakoma na tukalwanine mushinyika.

²⁴ Ono amucite bobulya. Amukusheewo bamaami abo bali makumi otatwe abobilo pabutanjilili bwa nkondo, mubikeewo bamatanjilili ba bashilumamba.

²⁵ Mwiite bashilumamba baanji bweenka mbobakalinga balya bakafwa. Aalo maaki afule kubikaawo ashikoci. Lyalo tulaakukonsha kulwana abene Isilaeli mushinyika akubakoma.” Mwaami Benadadi wakasumina nshebakamwaambila.

²⁶ Ciindi cakulwana ndicakashika, wakeeta bashilumamba bakwe akuyaabo kundabala ya Afeki mukulwana abene Isilaeli.

²⁷ Bene Isilaeli abalo bakalibambila. Bakanyamuka kuya mukulindila bene Silya akuyaka misumba mumakoto obilo. Bene Isilaeli bakaboneka anga ntutanga tobilo twa mpongo kubene Silya abo bakalingabo poonse poonse mushinyika!

²⁸ Lyalo mulaluki wakaya kumwaami Aabu akumwaambila ayi, “Mwaami Lesa waamba ayi, ‘Mukwiinga bene Silya batokwaamba ayi nebo ndi lesa wa mutulundu nshiishi lesa wa mushinyika, ntookupa nkusu shakukoma bashilumamba babo baanji kwaamba ayi webo abantu bako mwishibe ayi ndime Mwaami Lesa.’ ”

²⁹ Bene Silya alimwi abene Isilaeli bakalinga kulindililabo mumisumba yabo iyo yakalinga kulangene kwanshiku shosanwe ashobilo. Lyalo pabushiku bwasanu ashobilo bakatalika kulwana. Mpeeke bene Isilaeli bakacaya bashilumamba bene Silya bali 100,000.

³⁰ Bakapuluka bakacicila mundabala ya Afeki uko baanji baanji nkobakalimbwa alubumbu lwa mundabala. Bakalimbwa bakalinga 27,000. Benadadi lakwe wakacicila mundabala akuya mukuyuba mucipinda ca mukati ca ŋanda.

³¹ Bacinenenene bakwe bakesa kuli nguwe akwaamba ayi, “Twanyumfwa ayi bamaami bene Isilaeli balicite nkumbu. Amutusuminishe tuye kumwaami wa bene Isilaeli katufwete amasaka mumakome alimwi akwaanga ntambo munshingo. Mpashi inga wamulekelela mwebo kwaamba ayi atamucaayi.”

³² Lyalo bakafwala masaka antaambo munshingo akuya kumwaami Aabu akwaamba ayi, “Musebenshi wanu Benadadi wamusenga ayi mutamucaayi.” Aabu wakakumbula ayi, “Sa ngumuumi abobulya? Cabota! Ngumukwesu!”

³³ Bacinenenene bakwe Benadadi bakalinga kulangilisha citondesho cibotu. Ono Aabu ndyaakaamba ayi, “Ngumukwesu,” liswi ilyo bakalicata cakufwambaana akwaamba ayi, “Bweenka mbomwaamba ayi Benadadi ngumukwabanu!” Lyalo Aabu wakaamba ayi, “Amumulete kuno.” Benadadi ndyaakashika Aabu wakatantaakwe mucikoci.

³⁴ Mpeeke Benadadi wakaambila Aabu ayi, “Ndaakumubooshesha mandabala oonse bata ngobakalinga babwesa kuswa kuli baishiwanu. Lyalo mwebo inga mwaliyakila mishika muDamasikasi bweenka mbobakacita bata muSamaliya.” Aabu wakakumbula ayi, “Ceebo ca maswi ayo ngomwaamba, ntoomwaangulula.” Wakapanganaakwe cibusa akumuleka waya.

Mulaluki mbwaakashingana Aabu

³⁵ Ono kwiinda mukutumwa kuMwaami Lesa, umwi pakati ka balaluki wakaambila mulalukinyina ayi, “Ngume!” Sombi lakwe wakakaka.

³⁶ Lyalo wakamwaambila ayi, “Ono mukwiinga wakakaka caamba Mwaami Lesa, waswabo waano nkalamu itookuluma.” Ncakwiila ingayi asweewobo, nkalamu yakesa yamuluma akumucaya.

³⁷ Mpeeke mulaluki uyo wakaya kumuntu aumwi akwaamba ayi, “Ngume!” Musankwa uyo wakamuuma cankusu akumucisa.

³⁸ Mulaluki uyo wakaanga kumeenso shisani kwaamba ayi alilubyelubye. Wakaya weemikana munshila kaalindilila mwaami wa bene Isilaeli kwiinda.

³⁹ Mwaami ndyaakalinga kwiinda, mulaluki wakoolobesha ayi, “Nomulemekwa, nebo ndakalinga munkondo ilyo shilumamba umwi ndyaakaleta shilumamba wakacatwa busha akumpa. Wakandwiita ayi, ‘Muntu uyu umulaame. Na aloboke, webo ulaakucaikwa nabi kulipila maali asilifa ali shuulu shotatwe.’

⁴⁰ Ono ndindakeelilwa kucita shintu shimwi, muntu uyo wakaloboka.” Mwaami wakakumbula ayi, “Waamba mboceelete kuba. Webo ulyeelete kulipila nkongole iyo.”

⁴¹ Mpomunyaawo mulaluki uyo wakaangulula cakalinga pameenso akwe. Mpomunyaawo mwaami wakamwishiba ayi ngumulaluki.

⁴² Mpeeke mulaluki wakaambila mwaami ayi, “Mwaami Lesa waamba ayi, ‘Mukwiinga wakaleka muntu ngondakakwaambila ayi ukamucaaye kuloboka, webo bulya utoolipila buumi bwako. Abalo bashilumamba bako batoonyonyoolwa ceebo cakuleka bashilumamba bakwe kuloboka.’ ”

⁴³ Mwaami wa bene Isilaeli wakaya kumishaabo kuSamaliya kaalisukeme alimwi kaaungumene abuumbi.