1 Baami 2 - Baibo Busansulushi Bwa Libuku Ili

Milasho yakweelaako yakwe Defedi

¹ Defedi ndyaakalinga pafwaafwi kufwa, wakeeta Solomoni mwanaakwe musankwa ayi amupe milasho yakweelaako.

² Wakaamba ayi, “Lufu lwangu luli pafwaafwi. Shimpa akuyumya moyo.

³ Kocita cakulwiita Mwaami Lesa wako. Kokonkela nshila shakwe, milawo amilasho yakwe mbuli mboshilembetwe muMilawo yakwe Mose. Ucite boobo kwaamba ayi kuli koonse kweshi ukaye ukaswitilile mushintu shoonse nshoocita.

⁴ Na umunyumfwile, Mwaami Lesa ulaakucita kweelana ambwaakashomesha. Wakashomesha ayi bamulunyungu lwangu inga balela bene Isilaeli kulilabo na bashomeka mukukonkela milawo yakwe camoyo woonse alimwi abuumi bwabo.

⁵ “Cimwi cikani nci. Uliingashite ncaakacita Joabu mwanaakwe Seluiya kuli ndime ndyaakacaya bamatanjilili bobilo ba bashilumamba bene Isilaeli, Abina mwanaakwe Na alimwi aAmasa mwanaakwe Jeta. Uliingashite mbuli mbwaakabacaya muciindi ca luumuno mukuboosha cishole pamfwa nshibakalengesha muciindi ca nkondo. Wakacaya bantu batacite mulandu. Ono nebo ndime ncite mulandu paceeco ncaakacita. Aboobo shoonse shamulandu uyo shilisukeme ndime.

⁶ Webo ulishi cakucita. Utakamuleeki ayi afwe lufubo.

⁷ “Sombi bana bakwe Basilayi wa kuGilyadi ukabafwite nkumbu akubalama kabotu mukwiinga bakantondesha nkumbu ndindakalinga kucica mukwanu Abisalomu.

⁸ “Kuli Shimeyi mwanaakwe Gela, uswa kundabala ya Bayulimu mucishi cakwe Benjameni. Wakanshingana abuumbi bushiku ndindakaya kuMaanaimu, sombi ndyaakankumanya kuMulonga wa Joodani, ndakashomesha cakulumbila muliina lya Mwaami Lesa ayi teshi nkamucayeewo.

⁹ Sombi utakamulekibo. Ulishi cakucita, ulyeelete kubona ayi uyu muntu wacaikwa.”

Kufwa kwakwe Defedi

¹⁰ Defedi wakafwa akubikwa mundabala inene ya Jelusalemu.

¹¹ Wakalinga mwaami wa bene Isilaeli myaaka makumi one. Wakalela myaaka yosanwe ayobilo mucishi ca Ebuloni alimwi amyaaka makumi otatwe amyaaka yotatwe muJelusalemu.

¹² Solomoni ngowakapyana bwaami bwa baishi baDefedi alimwi buleelo bwakwe bwakashimpa.

Kufwa kwakwe Adonija

¹³ Lyalo Adonija, uyo wakalinga kucite banyina baAgiti, wakaya kuli Batisheba banyina Solomoni. Batisheba wakeepusha ayi, “Sa wamfwakashishabo na kuli mboweenda?” Alakwe wakakumbula ayi, “Ndamufwakashishabo.”

¹⁴ Mpeeke wakeelikaawo ayi, “Sombi ndicite acakusenga.” Batisheba wakamwiipusha ayi, “Nciinshi ico?”

¹⁵ Adonija wakakumbula ayi, “Mulishi kwaamba ayi nebo ndakalinga kweelete kuba mwaami alimwi bantu boonse muIsilaeli mbobakalinga kuyeeya ubo. Sombi cacitika ncimbi, mwanike wangu ngowakaba mwaami mukwiinga nkuyanda kwa Mwaami Lesa.

¹⁶ Ono nebo ndicite cakusenga. Ndapapaata mutankakili.” Batisheba wakeepusha ayi, “Anu nciinshi ico?”

¹⁷ Adonija wakakumbula ayi, “Ndaseenga ayi musengeleeko kumwaami Solomoni kwaamba ayi njebe Abishagi, mwanakashi mwine Shunemu. Ndishi kwaamba ayi mbomuli ndimwe teshi amukasheewo.”

¹⁸ Batisheba wakakumbula ayi, “Cilibo kabotu, ntookwaambililaako kumwaami.”

¹⁹ Mpeeke Batisheba wakaya kumwaami Solomoni mukwaambililaako Adonija. Mwaami wakanyamuka akwansha banyina akubakotamina mukubapa bulemu. Lyalo wakekala pacuuna ca bwaami akutumisha cuuna cimwi cabwaami ayi acise apo banyina mpobakekala kulubasu lwakwe Solomoni lwalulyo.

²⁰ Mpeeke Batisheba wakaamba ayi, “Ndicite kusenga kuniini kuli ndimwe. Ndapapaata mutankakili.” Mwaami wakeepusha ayi, “Nciinshi maa? Amwaambebo teshi mukakileewo.”

²¹ Batisheba wakaamba ayi, “Amusuminishe Adonija mukwabanu kwaamba ayi eebe Abishagi.”

²² Mwaami Solomoni wakeepusha ayi, “Nceebonshi mulisuni kwaamba ayi nsuminishe Adonija kweeba Abishagi? Sa te kunembo inga mwamusengela acuuna ca bwaami? Kuteelabo waawo, Adonija ngumunene wangu, alimwi Abiyata mupailishi aJoabu mwanaakwe Suluiya bali kulubasu lwakwe.”

²³ Mpeeke Solomoni wakashomesha cakulumbila muliina lya Mwaami Lesa ayi, “Lesa aancaaye na mbule kulengesha Adonija kulipila buumi bwakwe pakusenga kwakwe uku!

²⁴ Mwaami Lesa wakambika pabwaami bwa bata baDefedi akushomesha kupa bwaami ubo kubamulunyungu lwangu. Ono kweelana ambocibete lushinisho kwaamba ayi Mwaami Lesa ngumuumi, ntooshomesha cakulumbila ayi Adonija utoocaikwa sunu lyeenka!”

²⁵ Lyalo Mwaami Solomoni wakaambila Benaiya mwanaakwe Jeoiyada uyo wakaya wacaya Adonija.

Abiyata aJoabu mbobakapekwa milandu

²⁶ Mwaami Solomoni wakaambila Abiyata mupailishi ayi, “Koya kumushi wine mishaanu kuAnatoti. Walinga kweelete kufwa, sombi teshi nkucaaye bulya mukwiinga Libokoshi lya Cipangano lya Mwaami Lesa Shinkusu shoonse lyakalinga mumaansaako ndiwakalinga abata baDefedi, alimwi wakapenga pantu pomwi ambabo mumapensho abo oonse.”

²⁷ Mpeeke Solomoni wakakusha Abiyata pamulimo wa bupailishi bwa Mwaami Lesa. Ico cakalengesha maswi akaamba Mwaami Lesa kuShilo pamupailishi Eli abamulunyungu lwakwe, kucitika cancinencine.

²⁸ Joabu, uyo wakalinga kulubasu lwakwe Adonija kuteshi kuli Abusalomu, ndyaakanyumfwa shakacitika, wakacicila kuTente ya Cipangano akucata mumakonko a cipaililo aboneka anga ngameeca.

²⁹ Makani ndyaakashika kumwaami Solomoni ayi Joabu wacicila kuTente ya Cipangano alimwi ayi uli kucipaililo, Solomoni wakatuma muntu kuli Joabu mukwiipusha ayi, “Ino wacicilanshi kucipaililo.” Joabu wakakumbula ayi, “Ndacicila kuMwaami Lesa mukwiinga ntooloonda mwaami Solomoni.” Lyalo mwaami Solomoni wakatuma Benaiya ayi aye amucaaye.

³⁰ Wakaya kuTente ya Cipangano akwaambila Joabu ayi, “Mwaami Solomoni waamba ayi usweemo umo.” Joabu wakakumbula ayi, “Tau, nebo ntoofwitabo mweenka muno.” Benaiya wakaboolela kumwaami Solomoni akumulwiita shakaamba Joabu.

³¹ Solomoni wakamwaambila ayi, “Ucite bweenka bwaamba Joabu. Umucaaye akumufukila. Lyalo nebo abamulunyungu lwa bata taaku umwi weshi akanoocili mumulandu ceebo ca bantu mbwaakacaya batacite mulandu.

³² Mwaami Lesa utooboosha cishole kuli Joabu ceebo cakucaya uko nkwaakacita cakutashibisha mwaami Defedi. Joabu wakacaya basankwa bobilo abo bakalinga kuyandika kwiinda nguwe. Meena abo nguAbina mwanaakwe Na, mutanjilili wa bashilumamba bene Isilaeli alimwi aAmasa mwanaakwe Jeta, mutanjilili wa bashilumamba bene Juda.

³³ Mulandu wakucaya uyo aukalilile pali Joabu abamulunyungu lwakwe boonse kwalyoonse alyoonse. Sombi Mwaami Lesa ulaakupa coolwe kubamulunyungu lwakwe Defedi abo beshi banookala pacuuna ca bwaami lyoonsebo.”

³⁴ Aboobo Benaiya wakaya kuTente ya Cipangano akucaya Joabu. Bakamubika mucishi cine mishaabo ca liwesa.

³⁵ Mpeeke mwaami Solomoni wakabika Benaiya mwanaakwe Jeoiyada mumusena wakwe Joabu kuba mutanjilili wa bashilumamba. Mpeeke wakabika Sadoki kuba mupailishi pamusena wakwe Abiyata.

Kufwa kwakwe Shimeyi

³⁶ Kuswawaawo mwaami Solomoni wakatuma nkombe kuli Shimeyi ayi, “Liyakile ŋanda muno muJelusalemu. Unookala muno, sombi tooelete kuswaamo akuya kumwi kuli koonse.

³⁷ Bushiku mbweshi ukasweemo akwiindilila Cinyika ca Kidiloni, ncakwiila ulaakufwa. Ncakwiila mulandu wa lufu lwako ulaakuba pali ndiwe omwiine.”

³⁸ Shimeyi wakakumbula ayi, “Ndanyumfwa nomulemekwa. Ndaakucita ncemwaamba.” Lyalo wakekala kuJelusalemu kwaciindi cilaamfu.

³⁹ Myaaka yotatwe ndiyakeenda, basha bobilo bakwe Shimeyi bakalobokela kuli Akishi mwanaakwe Maaka, mwaami wa kuGati. Shimeyi ndyaakanyumfwa ayi basha bakwe bali kuGati,

⁴⁰ wakatanta pambongolo yakwe akuya kuli Akishi kuGati mukuyandoola basha bakwe. Basha abo wakabacana akubaboosha kumishaabo.

⁴¹ Ingayi Solomoni anyumfwe Shimeyi mbwaakacita,

⁴² wakatuma nkombe yakumwiita akumwaambila ayi, “Ndakalengesha ayi ushomeshe cakulumbila muliina lya Mwaami Lesa kutaswaamo muJelusalemu muno. Ncakwiila ndakakucenjesha ayi bushiku mbweshi ukasweemo, ulaakufwa. Ono sa tookwe kusumina akwaamba ayi ulaakucita ncendakaamba?

⁴³ Ono ceebonshi webo wakapwaya cipangano cako akutanyumfwila ncendakaamba?

⁴⁴ Ulishi shibiibi shoonse nshewakacitila bata baDefedi. Ono Lesa utooboosha cishole pashibiibi isho.

⁴⁵ Sombi nebo ulaakumpa coolwe alimwi buleelo bwakwe Defedi bunanoolibo mbwalibwe lyoonse alyoonse.”

⁴⁶ Lyalo mwaami wakaambila Benaiya mwanaakwe Jeoiyada kuya mukumucaya Shimeyi, alakwe wakacita ubo. Ono buleelo boonse bwakaba mumaansaakwe Solomoni.