1 Baami 19 - Baibo Busansulushi Bwa Libuku Ili

ELIJA PAKALUNDU KA SINAYI

¹ Mwaami Aabu wakaambila mukaakwe Jesebelo shoonse shakacita Elija alimwi mbuli mbwaakacaya balaluki bakwe Baali boonse.

² Aboobo Jesebelo wakatuma nkombe kuli Elija ayi “Na ciilo paciindi ceenka cino nkabule kucita kuli ndiwe mbowakacita balaluki abo, balesa abakancaaye.”

³ Elija wakaloonda akuya kuBiyasheba mucishi ca Juda kwaamba ayi alifuune. Wakatola amusebenshi wakwe. Musebenshi wakaya mukumushiya uko kweenka,

⁴ akweenda mushinso wa bushiku bomwi muluyanga. Mpeeke wakeemikana akwikala mucimfule ca cisamu, lyalo wakayeeya ayi ncibotu akufwabo. Wakapaila ayi, “Ndatentuka noBaami baLesa. Ono amutolebo buumi bwangu. Nebo nshiindi bamashali bangu bakulukulu!”

⁵ Wakoona mucimfule mulya akuya mutulo. Lyalo cakuteengashila munjelo wa Mwaami Lesa wakamubusha akwaamba ayi, “Buka ulye.”

⁶ Wakalangalanga wabona shinkwa womwi wakayokwa pamakalangasha anongo ya maanshi pafwaafwi akumutwi wakwe. Wakalya akunwa akuboolela mutulo alimwi.

⁷ Uyo munjelo wa Mwaami Lesa wakesa alimwi akwaamba lyabili ayi, “Buka ulye kwaamba ayi mushinso utakulaampili.”

⁸ Elija wakabuka walya akunwa. Lyalo cakulya cakamupa nkusu shakweenda nshiku makumi one kuya mukushika kuSinayi kalundu kasalalite.

⁹ Ndyaakashika uko wakenjila mucimfwengo umo mwaakoona bushiku ubo. Mpomunyaawo Mwaami Lesa wakamwaambila cakuteengashila ayi, “Ino utoocitanshi kuno webo Elija?”

¹⁰ Lakwe wakakumbula ayi, “NoBaami baLesa Beshinkusu shoonse, nebo ndasebenselabo ndimwe nweenka. Sombi bene Isilaeli bamwi boonse bapwaya cipangano ncemwakapanga ambabo, bayakulula shipaililo shanu akucaya balaluki banu boonse. Nebo ndime ndacaalaawobo neenka, ono anebo balisuni kuncaya!”

¹¹ Mwaami Lesa wakamwaambila ayi, “Swa uye wiimikane kunembo lyangu peculu lya kalundu.” Lyalo Mwaami Lesa wakaya, weenda pafwaafwi anguwe akutuma muuwo ukali abuumbi uyo wakabaanya kalundu pakati akupasoola mabwe. Sombi Mwaami Lesa taakalinga mumuuwo. Muuwo wakacileka, mpeeke kwakaba citentanshi, sombi Mwaami Lesa taakalinga mucitentanshi.

¹² Ndicakeenda ico citentanshi kwakaba mulilo, sombi Mwaami Lesa taakalinga mumulilo. Kuswa mulilo kwakanyumfwika liswi lyakutepeta.

¹³ Ngayi Elija ndyaakalinyumfwa, wakalifweka cisani ca peculu kumeenso akwe akuswa kuya mukwiimikana pamulyango wa cimfwengo. Liswi lyakaamba kuli Elija ayi, “Ino utoocitanshi kuno webo Elija?”

¹⁴ Lakwe wakakumbula ayi, “NoBaami baLesa Beshinkusu shoonse, nebo ndasebenselabo ndimwe nweenka. Sombi bene Isilaeli bamwi boonse bapwaya cipangano ncemwakapanga ambabo, bapwayoola shipaililo shanu akucaya balaluki banu boonse. Nebo ndime ndacaalaawobo neenka, ono anebo balisuni kuncaya!”

¹⁵ Lyalo Mwaami Lesa wakaamba ayi, “Boolela muluyanga kufwaafwi aDamasikasi akwinjila mundabala. Lyalo unanike Asayelo mafuta a bwaami akumupa bwaami bwa cishi ca Silya.

¹⁶ Waakumana ukananike Jewu mwanaakwe Nimushi akumupa bwaami bwa cishi ca Isilaeli. Kuswawaawo ukaye ukananike Elisha mwanaakwe Shafati mwine Abelo Mewola ayi apyane ndiwe mubulaluki.

¹⁷ Woonse weshi akaloboke kucaikwa kuli Asayelo, ulaakucaikwa aJewu alimwi woonse weshi akaloboke kucaikwa kuli Jewu, ulaakucaikwa aElisha.

¹⁸ Nakubi boobo ndaakushiyaawo bantu bali 7,000 boomi muIsilaeli, abo boonse bashomeka kuli ndime alimwi batana kufukaminaawo Baali nabi kufyontaawo cibumbwabumbwa cakwe.”

Elisha mbwaakeetwa

¹⁹ Elija wakaya wacana Elisha mwanaakwe Shafati kaalima aŋombe. Kwakalinga shipani likumi acomwi panembo lyakwe. Lakwe wakalinga kulima acipani cakweelaako. Elija wakafuula cakufwala cakwe ca peculu akufwalika Elisha.

²⁰ Lyalo Elisha wakashiya ŋombe shakwe akukonkela Elija. Wakaambila Elija ayi, “Amundeeke nje mfyonte bata abama mukubalasha, lyalo ndyeshi nooya amwebo.” Elija wakakumbula ayi, “Cilibo kabotu koya. Sombi wamana kubalasha uboole kuno.”

²¹ Mpomunyaawo Elisha wakaya kubasune bakwe akubacaya. Wakabateleka, majoko ngwaakaba nkuni. Mpeeke wakapa bantu nyama abalo bakalya. Lyalo wakaya, wakonkela Elija akuba mucafwi wakwe.