1 Baami 18 - Baibo Busansulushi Bwa Libuku Ili

Elija abalaluki bakwe Baali

¹ Ndipakeenda ciindi, mumwaaka watatu wa cilanga, Mwaami Lesa wakaambila Elija ayi, “Koya ulishiishe kumwaami Aabu, lyalo ndaakutuma mfula.”

² Mpomunyaawo Elija wakanyamuka. Paciindi ico nsala mucishi ca Samaliya yakalinga yakalala.

³ Aboobo Aabu wakeeta Obadiya, uyo wakalinga munene kuŋanda ya bwaami. Ono Obadiya uyo wakalinga kulambila abuumbi Mwaami Lesa.

⁴ Paciindi Jesebelo ndyaakalinga kucaya balaluki ba Mwaami Lesa, Obadiya wakashisa balaluki bakalinga mwaanda mushimfwengo shobilo. Mucimfwengo comwi amomwi kamuli bantu makumi osanwe, osanwe. Balaluki abo wakalinga kubapa shakulya amaanshi.

⁵ Obadiya ndyaakashika, Aabu wakamwaambila ayi, “Tiya tukabone mutuntupu amuya mulonga moonse kwaamba ayi tubone na inga twakacanaawo bwiisu buunji bwakwaamba ayi maaki ashifubwa shili anga nimbongolo shitafwi kunsala. Mpashi teshi tukacaye shifubwa shesu nabi comwi.”

⁶ Lyalo bakaabana cishi. Aabu wakalanga kumwi, alakwe Obadiya kumbi.

⁷ Obadiya ndyaakalinga kuya bweenda, wakakumanya Elija. Wakamwishiba, mpeeke wakafukama panembo lyakwe, akwiipusha ayi, “Sa ncakwiila ndimwe nkambo?”

⁸ Elija wakakumbula ayi, “Ee, ndime. Ono koya ukalwiite mwaami wako ayi Elija ndamucana.”

⁹ Obadiya wakakumbula ayi, “Ino ndabishanshi nemusebenshi wanu cakungaba mumaansa a mwaami Aabu ayi ancaaye?

¹⁰ Kweelana ambocibete lushinisho ayi Mwaami Lesa, Lesa wanu ngumuumi, mbweeke ubo mwaami Aabu walema kumulangoola mushishi shoonse sha pacishi ca panshi cino. Na mwaami wa cishi ico nceenga weepusha wakaka, uyo mwaami ulyeelete kushomesha cakulumbila ayi tamumo mucishi cakwe.

¹¹ Ono mutoondwiita ayi nebo nje nkalwiite mwaami wangu ayi mwebo muli kokuno?

¹² Ino na cicanike kwaamba ayi mushimu wa Mwaami Lesa wamutola kumusena utashibikitwe ndaswaawobo? Ono na ndwiite mwaami Aabu ayi muli kokuno, sombi abule kumucanaako, ncakwiila ulaakuncaya. Amwiibaluke kwaamba ayi nebo nemusebenshi wanu ndi muntu ulambila Mwaami Lesa abuumbi kuswabo kubwanike bwangu.

¹³ Sa tamukwe kunyumfwaawo ayi Jesebelo ndyaakalinga kucaya balaluki ba Mwaami Lesa ndakashisa bakalinga mwaanda mushimfwengo, mumakoto obilo, nkokwaamba ayi mucimfwengo comwi acomwi kamuli bantu makumi osanwe? Sa tamukwe kunyumfwaawo ayi ndakalinga kubapa shakulya amaanshi?

¹⁴ Ino inga mwandwiita buyani ayi nje nkalwiite mwaami ayi mwebo muli kokuno? Nebo utooncaya!”

¹⁵ Elija wakakumbula ayi, “Kweelana ambocibete lushinisho ayi Mwaami Lesa Shinkusu shoonse, uyo ngoonsebensela ngumuumi, mbweeke ubo sunu ntoolishisha kumwaami Aabu.”

¹⁶ Aboobo Obadiya wakaya kumwaami Aabu akumulwiita, alakwe Aabu wakanyamuka akuya mukukumanya Elija.

¹⁷ Ndyaakamubona Aabu wakaamba ayi, “Ndakucana sunu, webo noocita shifulunganya mucishi ca Isilaeli coonse!”

¹⁸ Lyalo Elija wakakumbula ayi, “Nshiciti shifulunganya nebo, mwebo ndimwe abamuŋanda ya baishiwanu. Mutookaka kunyumfwila milasho ya Mwaami Lesa akunoolambila shibumbwabumbwa shakwe Baali.

¹⁹ Ono amwiite bene Isilaeli boonse kwaamba ayi tukumane kuKalundu ka Kamelo. Mulete abalaluki bakwe Baali bali 450 alimwi abalaluki bali 400 bakwe Ashela lesa mwanakashi abo balya abaJesebelo bayoosha ba kubwalo.”

²⁰ Aboobo mwaami Aabu wakeeta bantu boonse ba muIsilaeli pantu pomwi abalaluki abo kwaamba ayi bakumane kuKalundu ka Kamelo.

²¹ Elija wakaya kubantu akwaamba ayi, “Ino mutootola ciindi cilaamfu buyani kwaamba ayi musale ca maano? Na Mwaami Lesa ngoLesa walushinisho, kamumulambila, sombi na Baali ngoLesa kamumulambila!” Bantu boonse taakuuwo ncebakaamba.

²² Mpeeke Elija wakaamba ayi, “Nebo ndi mulaluki wa Mwaami Lesa uyo wacaalaawo, sombi pali balaluki bakwe Baali bali 450.

²³ Amulete bacende bobilo. Muleke balaluki bakwe Baali babwese womwi, bamucaaye, batimboole shipimpitapimpita, bashibike pankuni, kutanyasha mulilo. Anebo ntoocita mushobo ngomunya uyo amucende umwi.

²⁴ Lyalo muleke balaluki bakwe Baali bapaile kuli lesa wabo, anebo ntoopaila kuMwaami Lesa. Uyo eshi atume mulilo, ingayi ngoLesa mwiine.” Bantu boonse bakaamba ayi, “Mwaamba kabotu.”

²⁵ Mpomunyaawo Elija wakaambila balaluki bakwe Baali ayi, “Bulya mbocaboneka ayi mwebo muli baanji inga mwabwesa mucende mutaangune kumubamba. Mupaile kuli lesa wanu, sombi mutabikiwo mulilo.”

²⁶ Lyalo bakabwesa mucende uyo wakaletwa kuli mbabo, bakamubamba. Mpeeke bakatalika kupaila kuli Baali kushikila lisuba ndilyakashika pakati ka mutwi. Bakalinga koolobesha ayi, “NobaBaali mutukumbule!” Bakalinga kushana kabashinguluka cipaililo ncebakayaka. Sombi taakuuwo cakacitika. Baali taakwe kubakumbulaawo.

²⁷ Lisuba ndilyakashika pakati ka mutwi Elija wakatalika kubaseka ayi, “Kamooloma pakupaila! Sa te ngulesa? Ndabona miyeeyo yamushisha palaale nabi mpashi waya mukulicafwa kulubasu. Mpashi waya palweendo! Ndabona woona, mulyeelete mumubuushe!”

²⁸ Mpeeke balaluki bakapaila cakooloma, alimwi akulinengoola shibeshi amipeeni kweelana akwishibila kwabo, tibili bulowa bwakatalika kuswa.

²⁹ Bakalinga koolobesha kushikila macolesha ciindi cakubenga mulambu, sombi taaku cintu cakacitika, kwakalingabo tontolo.

³⁰ Lyalo Elija wakaambila bantu ayi, “Amusene pafwaafwi anebo.” Mpeeke bakasena. Elija wakatalika kubamba cipaililo ca Mwaami Lesa ico cakalinga camwayululwa.

³¹ Wakabwesa mabwe ali likumi aobilo. Lyomwi alyomwi kaliimikanina mukowa womwi wa bamulunyungu lwakwe Jakobo, musankwa uyo Lesa ngwaakapa liina lya Isilaeli.

³² Wakayaka cipaililo cakulambililaawo Mwaami Lesa amabwe ayo. Wakakaba cilindi mweela ceelete kwisula maanshi akwana mpashi malita ali 14.

³³ Lyalo wakabika nkuni peculu lya cipaililo. Wakatimboola mucende shipimpitapimpita akushibika pankuni. Lyalo wakabaambila ayi, “Amubike maanshi mumingomo yone akwaatila pamulambu ankuuni.” Abalo bakacita bweenka ubo.

³⁴ Mpeeke wakabaambila ayi, “Amucite mbomunya ubo alimwi.” Abalo bakacicita. Mpomunyaawo wakabaambila ayi, “Amuboosheewo.” Abalo bakabooshaawo.

³⁵ Maanshi akatalika kukunka peculu pacipaililo kakunkila mucilindi akucisusha.

³⁶ Paciindi cakubenga mulambu wa macolesha, mulaluki Elija wakaya kucipaililo akupaila ayi, “NoBaami baLesa, baLesa bakwe Abulaamu, Isaki alimwi aJakobo, amulitondeshe ayi ndimwe baLesa ba bene Isilaeli alimwi ayi ndi musebenshi wanu. Amutondeshe alimwi ayi ndabamba shoonse ishi ceebo mwebo nobeene mwandwiita.

³⁷ Amunkumbule noBaami baLesa, amunkumbule kwaamba ayi aba bantu boonse beshibe ayi mwebo noBaami baLesa muli baLesa bancinencine alimwi ayi mwebo mutoobaboosha kuli ndimwe.”

³⁸ Lyalo peenka apo Mwaami Lesa wakatuma mulilo panshi. Wakatenta mulambu, nkuni, mabwe abulongo akuyuminisha maanshi oonse akalinga mucilindi.

³⁹ Bantu ndibakabona shoonse ishi, bakaliwaala panshi akwaamba ayi, “Mwaami Lesa ngoLesa! Mwaami Lesa ngoLesa!”

⁴⁰ Mpomunyaawo Elija wakabaambila ayi, “Amubacaate balaluki bakwe Baali boonse. Mutasuminishi ayi umwi aye!” Bantu bakabacata boonse. Mpeeke Elija wakabatola kuMulonga wa Kishoni akubacaya boonse uko.

Kumana kwa cilanga

⁴¹ Paciindi ico Elija wakaambila mwaami Aabu ayi, “Ono kamuya mulye, ndanyuumfwa mfula yaluluma.”

⁴² Aboobo Aabu wakaya mukulya. Elija lakwe wakatanta Kalundu ka Kamelo, waya wafukama amutwi wakwe waubika mukati ka mabelo.

⁴³ Lyalo Elija wakaambila musebenshi wakwe ayi, “Koya ulange cakulweenge.” Musebenshi uyo wakaya walangaako akwaamba ayi, “Taakuuwo ncendabona.” Mankanda osanwe aobilo Elija wakaambila musebenshi wakwe ayi, “Koya, ulangeeko.”

⁴⁴ Palinkanda lyasanu alyobilo musankwa uyo wakaboolela akwaamba ayi, “Ndaboona kakumbi kaniini kalibo anga ndyaansa lya muntu katooswa kulweenge.” Mpomunyaawo Elija wakaambila musebenshi wakwe ayi, “Koya waambile mwaami Aabu ayi atante bwangu mucikoci aye kuŋanda yakwe mfula itamushinkili.”

⁴⁵ Paciindi ico mwiculu mwakashinkabo makumbi ashiya mbi, muuwo wakatalika kupuupa alimwi mfuula yakatalika kupokomoka. Aabu wakatanta cikoci cakwe akuya kuJesiliilu.

⁴⁶ Nkusu sha Mwaami Lesa shakesa pali Elija wakapinka shakufwala shakwe mubukome akucica cakushiyaamo Aabu kuya mukushika kuJesiliilu.