1 Baami 17 - Baibo Busansulushi Bwa Libuku Ili

Elija acilanga

¹ Ono mulaluki wakalinga kwiitwa ayi Elija, wa mundabala ya Tishibe mucishi ca Gilyadi, wakaambila mwaami Aabu ayi, “Kweelana ambocibete lushinisho ayi Mwaami Lesa, Lesa wa bene Isilaeli uyo ngoonsebensela ngumuumi, ntoomwaambila ayi teshi kukabewo mume nabi mfula kwamyaaka ili yobilo nabi yotatwe kushikila nkaambe ayi kube boobo.”

² Lyalo Lesa wakaambila Elija ayi,

³ “Swaawo pamusena uno uye kwicwe, ukayube kuKalonga ka Keliti kwicwe lya Joodani.

⁴ MuKalonga aka mweshi ukanoonwa maanshi alimwi ndalwiita bacikwangala ayi banookupa shakulya kweenka uko.”

⁵ Elija wakanyumfwila shakaamba Mwaami Lesa akuya mukwikala kuKalonga ka Keliti kwicwe lya Joodani.

⁶ Wakalinga kunwa maanshi akalinga kuswa muKalonga ka Keliti alimwi abalo bacikwangala bakalinga kuleta shinkwa anyama lyoonse macuunsa amacolesha.

⁷ Ndipakeenda ciindi kalonga ako kakayuma mukwiinga tekwakalinga mfula.

Elija amukalubinje wa kuSalefati

⁸ Lyalo Mwaami Lesa wakaambila Elija ayi,

⁹ “Ono koya kundabala ya Salefati kufwaafwi aSidoni, ukekale nkuko. Ndaambila mukalubinje ayi anookupa cakulya uko.”

¹⁰ Aboobo Elija wakaya kuSalefati. Ndyaakashika pamwinjililo wa ndabala wakabona mukalubinje katepa nkuni. Wakamwaambila ayi, “Ntoosengako tumaanshi twakunwa.”

¹¹ Ciindi ndyaakaya mukwaaleta, wakoolobesha alimwi ayi, “Ndapapaata mundeteleewo akashinkwa.”

¹² Lakwe wakakumbula ayi, “Kweelana ambocibete lushinisho ayi Mwaami Lesa, Lesa wanu ngumuumi, mbweeke ubo nshiciteewo shinkwa. Ndicitebo tufulaulo tuniini mumbale atufuta twa olifi munkomeshi. Ndesa kokuno mukutepa nkuni akutola kuŋanda mukuteleka tuniini uto twakulya nebo amwanaangu. Ico nceshi cibe cakulya cesu cakweelaako, lyalo tulaakufwa kunsala.”

¹³ Elija wakamwaambila ayi, “Mutalisukami, kamuya muteleke cakulya canu. Sombi mutaangune kumpangila kashinkwa kaniini akundetela. Lyalo ndyeshi mubambe shakulya shanu mwebo amwanaanu.

¹⁴ Mukwiinga Mwaami Lesa, Lesa wa bene Isilaeli waamba ayi, ‘Mbale teshi ikabule fulaulo nabi nkomeshi kumana mafuta kushikila bushiku nebo neMwaami Lesa ndyeshi nkantume mfula.’ ”

¹⁵ Mpeeke mukalubinje uyo wakaya mukucita mbuli mbwaakamulwiita Elija. Lyalo boonse botatwe bakaba ashakulya sha nshiku shiinji.

¹⁶ Fulaulo tookwe kumanaawo mumbale aalo mafuta taakwe kumanaawo munkomeshi kweelana abwakashomesha Mwaami Lesa kwiinda muli Elija.

¹⁷ Mukuya kwanshiku mwaana wa mukalubinje wakaciswa. Bulwashi bwakwe bwakalinga kuya cicatisha kushikila wafwa.

¹⁸ Mpomunyaawo mukalubinje uyo wakaambila Elija ayi, “Omuntu wakwe Lesa, nciinshi ncewacitila bobulya? Sa wesa kokuno mukwiibalusha Lesa shibiibi shangu isho nshendakacita akulengesha mwanaangu kufwa?”

¹⁹ Lyalo Elija wakamukumbula ayi, “Amumpe mwaana uyo.” Elija wakanyamuna mwaana uyo kuswa mumaansa a banyina, wamutola mucipinda ca peculu umo mwaakalinga kwikala akumooneka pabulo.

²⁰ Lyalo wakapaila cakoolobesha ayi, “NoBaami baLesa, baLesa bangu, nciinshi ncemwacitila mukalubinje uyo cintu ciyoosha ca mushobo uyo? Walinga kundela camoyo womwi, ono mwacaya mwanaakwe!”

²¹ Lyalo Elija wakatandabala mankanda otatwe pamwaana akunoopaila ayi, “NoBaami baLesa, baLesa bangu, amubushe mwaana uyu!”

²² Mpomunyaawo Mwaami Lesa wakakumbula mupailo wakwe Elija. Mwaana wakatalika kuyoya, mpeeke wakaba kabotu.

²³ Elija wakanyamuna mwaana akumutola mucipinda ca panshi. Lyalo wakamuboosha kuli banyina akubaambila ayi, “Amubone mwanaanu ngumuumi!”

²⁴ Mpeeke mukalubinje uyo wakakumbula ayi, “Ono ndashiiba ayi uli muntu wakwe Lesa alimwi ayi Mwaami Lesa ulaambila muli ndiwe!”