1 Baami 16 - Baibo Busansulushi Bwa Libuku Ili

¹ Lyalo Mwaami Lesa wakaambila mulaluki Jewu mwanaakwe Anani makani akushinina Baasha ayi,

² “Webo wakalinga muntubo, sombi ndakakulengesha kuba mutanjilili wa bantu bangu bene Isilaeli. Ono alimwi wabisha bweenka bwakacita Jeloboamu akulengesha bantu bangu kubisha. Shibiibi shabo shakasonkomona bukali bwangu.

³ Aboobo ntookunyonyoola webo abamuŋanda yako boonse bweenka mbondakacita Jeloboamu mwanaakwe Nebati.

⁴ Wamuŋanda yako uli woonse weshi akafwite mundabala inene ulaakulikwa kubakabwa, alimwi uyo woonse weshi akafwite muliwesa ulaakulikwa makubi.”

⁵ Shintu shimwi shoonse shakacita Baasha shililembetwe mulibuku lya buumi bwa bamaami ba bene Isilaeli.

⁶ Baasha wakafwa akubikwa mundabala ya Tesa. Lyalo Ela mwanaakwe Baasha ngowakapyana bwaami bwakwe.

⁷ Makani akaswa kuMwaami Lesa akushinina Baasha abamuŋanda yakwe akaambwa kwiinda mumulaluki Jewu mukwiinga wa shibiibi isho nshaakacita kuMwaami Lesa. Wakasonkomona bukali bwa Mwaami Lesa, kuteshibo ceebo ca bubi ubo mbwaakacita mbweeke bwakacita mwaami Jeloboamu, sombi aceebo cakucaya bamuŋanda yakwe Jeloboamu boonse.

Ela mwaami wa bene Isilaeli

⁸ Mumwaaka wamakumi obilo ayosanwe awomwi wa bwaami bwakwe Asa mwaami wa cishi ca Juda, Ela mwanaakwe Baasha wakaba mwaami wa cishi ca Isilaeli. Wakalela muTesa kwamyaaka yobilo.

⁹ Simuli, uyo wakalinga mutanjilili wa bashilumamba musa beshikulwanina mushikoci sha maaki sha mwaami, wakapinga kucaya Ela. Bumwi bushiku muTesa, Ela wakalinga kuya cikolwa muŋanda yakwe Aasa, uyo wakalinga munene paŋanda ya bwaami.

¹⁰ Simuli uyo wakenjila muŋanda, wakacaya Ela, akumupyana pabwaami. Ici cakacitika mumwaaka wamakumi obilo amyaaka yosanwe ayobilo ya bwaami bwakwe Asa mwaami wa mucishi ca Juda.

¹¹ Simuli ndyaakaba mwaami wakacaya bamakwabo Baasha boonse. Taaku musankwa nabi womwi ngwaakashiyaawo, mukwabo nabi mubye.

¹² Mpomunyaawo kweelana amakani akaamba Mwaami Lesa kuli Baasha kwiinda mumulaluki Jewu, Simuli wakacaya boonse bamuŋanda yakwe Baasha.

¹³ Baasha amwanaakwe Ela bakasonkomona bukali bwa Mwaami Lesa, Lesa wa bene Isilaeli mukwiinga wakulambila shibumbwabumbwa alimwi akulengesha bene Isilaeli kubisha.

¹⁴ Shintu shimwi shoonse shakacita Ela shililembetwe mulibuku lya buumi bwa bamaami ba bene Isilaeli.

Simuli mwaami wa bene Isilaeli

¹⁵ Mumwaaka wamakumi obilo amyaaka yosanwe ayobilo wa bwaami bwakwe Asa mwaami wa cishi ca Juda, Simuli wakalela bene Isilaeli muTesa nshiku shili shosanwe ashobilo. Paciindi ico bashilumamba bene Isilaeli bakalinga kulwana mundabala inene ya Gibetoni mucishi ca Filisitiya.

¹⁶ Ndibakanyumfwa ayi Simuli wakalinga kupingila mwaami alimwi ayi wakamucaya, bakanyamuka bushiku ubo mumisumba yabo akwaamba ayi mutanjilili wabo wa nkondo Omuli ono ngomwaami wa bene Isilaeli.

¹⁷ Omuli abashilumamba bakwe bakaswa muGibetoni akuya mukushinguluka ndabala ya Tesa.

¹⁸ Simuli ndyaakabona ayi ndabala inene yawa, wakenjila mucipinda ciyumu ca mukati ka ŋanda ya bwaami akulitentela mumo akufwa.

¹⁹ Ici cakacitika mukwiinga wa shibiibi nshaakacita kuMwaami Lesa. Wakasonkomona bukali bwa Mwaami Lesa bweenka bwakacita Jeloboamu mukubisha kwakwe mwiine akulengesha bene Isilaeli kubisha.

²⁰ Shintu shimwi shoonse shakacita Simuli kubikwaawo ashakupingilana, shililembetwe mulibuku lya buumi bwa bamaami ba bene Isilaeli.

Omuli mwaami wa bene Isilaeli

²¹ Bene Isilaeli bakapansaana. Bamwi bakalinga kusuni kubika Tibini mwanaakwe Ginati pabwaami, ingayi bamwi bakalinga kusuni Omuli.

²² Kumeelelesho abo bakalinga kusuni Omuli bakakoma babyaabo. Tibini wakafwa, lyalo Omuli wakaba mwaami.

²³ Nkokwaamba ayi mumwaaka wamakumi otatwe amwaaka womwi mubwaami bwakwe Asa mwaami wa cishi ca Juda, Omuli wakaba mwaami wa cishi ca Isilaeli. Wakalela kwamyaaka likumi amyaaka yobilo. Pakutaanguna wakalela muTesa kwamyaaka yosanwe awomwi.

²⁴ Kuswawaawo wakoola Kalundu ka Samaliya amaali asilifa ali 6,000 akaswa kumusankwa wakalinga kwiitwa ayi Shema. Omuli wakayaka ndabala akubikako lilinga liyumu akwiitumba ayi Samaliya, ili liina lyakaswa kuli Shema uyo wakalinga mwine kalundu ako.

²⁵ Omuli wakabisha pameenso a Mwaami Lesa kwiinda mbobakabisha boonse bakataanguna kuba baami.

²⁶ Bweenka bwakacita Jeloboamu mwanaakwe Nebati uyo wakalinga mutaanshi pali nguwe, wakasonkomona bukali bwa Mwaami Lesa, Lesa wa bene Isilaeli mukubisha lakwe mwiine akulengesha bantu bene Isilaeli kubisha abalo. Ncakwiila wakatanjilila bantu mukulambila shibumbwabumbwa isho shitaaku mboshibete.

²⁷ Shintu shimwi shoonse shakacita Omuli ashintu shoonse nshaakapanga shililembetwe mulibuku lya buumi bwa bamaami ba bene Isilaeli.

²⁸ Omuli wakafwa akubikwa mundabala ya Samaliya. Lyalo Aabu mwanaakwe musankwa ngowakapyana bwaami bwakwe.

Aabu mwaami wa bene Isilaeli

²⁹ Mumwaaka wamakumi otatwe ayosanwe amyaaka yotatwe ya bwaami bwakwe Asa mwaami wa cishi ca Juda, Aabu mwanaakwe Omuli wakaba mwaami wa cishi ca Isilaeli. Wakalela muSamaliya kwamyaaka makumi obilo amyaaka yobilo.

³⁰ Wakabisha pameenso a Mwaami Lesa kwiinda mbobakabisha boonse bakataanguna kuba baami.

³¹ Taakwe kubishabo mbuli mbwaakabisha Jeloboamu mwanaakwe Nebati, sombi lakwe wakaya amukweeba walutundu wiitwa ayi Jesebelo, mwaana mwanakashi wakwe Etibaala mwaami wa bene Sidoni. Lyalo wakatalika kusebensela Baali akumulambila.

³² Wakayaka ŋanda yakulambililaamo Baali mundabala ya Samaliya. Wakamuyakila acipaililo akucibika muŋanda iyo.

³³ Wakeemika cikoshanyo cakwe Ashela lesa mwanakashi. Wakacita ashimwi shiinji shakusonkomona bukali bwa Mwaami Lesa, Lesa wa bene Isilaeli, kwiinda bamaami boonse bene Isilaeli kuswa kumatalikilo a bwaami.

³⁴ Muciindi ico ndyaakalinga kulela, Iyelo uyo wakaswa kuBetelo wakayakulula ndabala ya Jeliko. Ono kweelana abwakaamba Mwaami Lesa kwiinda muli Joshuwa mwanaakwe Nani, Iyelo ndyaakayaka lwiimbi lwa Jeliko, Abilamu mwanaakwe musankwa wakwiiya wakacaikwa, apalo pakumanishabo kuyaka minjililo, Segubu mwanaakwe musankwa shikeela wakacaikwa.