1 Baami 15 - Baibo Busansulushi Bwa Libuku Ili

Abija mwaami wa bene Juda

¹ Mumwaaka walikumi ayosanwe amyaaka yotatwe ya bwaami bwakwe Jeloboamu mucishi ca Isilaeli, Abija wakaba mwaami wa cishi ca Juda.

² Wakalela kwamyaaka yotatwe muJelusalemu. Banyina bakalinga baMaaka, bana babo baAbisalomu.

³ Abija wakacita shibiibi sheenka baishi nshebakacita. Taakalinga kushomeka cakumaninina kuMwaami Lesa, Lesa wakwe mbuli bwakalinga kucita Defedi mushali wakwe mukulukulu.

⁴ Sombi ceebo cakwe Defedi, Mwaami Lesa, Lesa wakwe wakapa Abija mwaana musankwa ayi apyane bwaami bwakwe muJelusalemu akulama kabotu Jelusalemu.

⁵ Mwaami Lesa wakacita boobo mukwiinga Defedi wakacita shakamukonda alimwi taakwe kupwayaawo milawo yakwe, kulekabo cikani cakwe Uliya mwine Iti.

⁶ Inkondo iyo yakatalika ciindi cakwe Leoboamu alimwi acakwe Jeloboamu yakatolelelabo amuciindi coonse cakwe Abija.

⁷ Shintu shimwi shoonse shakacita Abija shililembetwe mulibuku lya buumi bwa bamaami ba bene Juda.

⁸ Abija wakafwa akubikwa muNdabala inene yakwe Defedi. Lyalo Asa mwanaakwe musankwa ngowakapyana bwaami bwakwe.

Asa mwaami wa bene Juda

⁹ Mumwaaka wamakumi obilo wa bwaami bwakwe Jeloboamu mucishi ca Isilaeli, Asa wakaba mwaami wa cishi ca Juda.

¹⁰ Wakalela myaaka makumi one awomwi muJelusalemu. Bankambiyakwe banakashi bakalinga baMaaka bana babo baAbisalomu.

¹¹ Asa wakacita shakakonda Mwaami Lesa mbuli bwakalinga kucita Defedi mushali wakwe mukulukulu.

¹² Wakatandaanya basankwa bakalinga kucitana bufuule kushipaililo bakunsengwe kuswa mucishi cakwe. Wakalobya ashibumbwabumbwa isho abo mbwaakapyana nshebakalinga babumba.

¹³ Wakakusha bankambiyakwe banakashi baMaaka pacuuna cabo kuŋanda ya kubwalo mukwiinga bakalinga bapanga cikoshanyo cilensha bunya cakwe lesa mwanakashi Ashela. Asa wakacitimbula akucitenta muCinyika ca Kidiloni.

¹⁴ Nacibi kwaamba ayi Asa taakwe kunyonyoola misena yoonse yakulambililaako ya patulundu, wakalinga kushomeka kuMwaami Lesa mubuumi bwakwe boonse.

¹⁵ Wakabika shintu shoonse baishi nshebakabenga kuli Lesa ayi shilisalalite muŊanda yakwe Lesa. Wakabikaamo ashintu sha golodi asilifa isho nshaakabenga lakwe mwiine kuli Lesa.

¹⁶ Asa mwaami wa bene Juda alimwi aBaasha mwaami wa bene Isilaeli bakalinga mbeshikulwanabo muciindi coonse cakulela kwabo.

¹⁷ Baasha ndyaakalwana abene Juda, wakayaka lilinga kushinguluka ndabala ya Lama akubika bashilumamba muli njiyo kwaamba ayi taaku muntu weenga wenjila nabi kuswa mucishi ca bene Juda.

¹⁸ Mpeeke mwaami Asa wakabwesa silifa alimwi agolodi shoonse isho shakacaala muŊanda yakwe Lesa alimwi amuŋanda ya bwaami washituma mumaansa a bacinenenene bakwe kuDamasikasi. Wakashituma kuli Benadadi mwaami wa bene Silya mwanaakwe Tabilimoni alimwi wakalinga ngumushikulu kuli Esioni. Ono shakaya ankoombe yakwaamba ayi,

¹⁹ “Atupangane bushicibusa bweenka bamashali besu mbobakacita. Silifa alimwi agolodi iyo ncipo kuli ndimwe. Ono amucileeke kunyumfwana amwaami Baasha mwine Isilaeli kwaamba ayi akushe bashilumamba bakwe mucishi cangu.”

²⁰ Mwaami Benadadi wakasumina shaakaamba Asa akutuma bashilumamba abamatanjilili babo ayi baye balwane mandabala anene a mucishi ca Isilaeli. Bakakoma Ijoni, Dani, Abelo Beti Maaka, musena uli kufwaafwi aLweenge lwa Galili alimwi acishi coonse cakwe Nafutali.

²¹ Mwaami Baasha ndyaakanyumfwa shakacitika wakacileka kuyaka lilinga kushinguluka ndabala ya Lama akuya kuTesa.

²² Lyalo mwaami Asa wakatuma nkombe mucishi coonse ca Juda iyo yakalinga kwaamba ayi muntu womwi awomwi, kwakubula ucaala, aye mukucafwa kunyamuna mabwe amapulanga ayo mwaami Baasha ngwaakalinga kuyakisha kuLama. Shintu ishi Asa wakashisebensesha kumulimo wa mushobo womwi kuMisipa aGeba mandabala ali mucishi ca bene Benjameni.

²³ Shintu shimwi shoonse shakacita Asa kubikaawo amicito yakubula boowa amandabala ayo ngaakayakila malinga, shililembetwe mulibuku lya buumi bwa bamaami ba bene Juda. Sombi kubucembele wakalemana myeendo kubulwashi bwa kushimpanta.

²⁴ Mwaami Asa wakafwa akubikwa kushuumbwe sha bamaami muNdabala inene yakwe Defedi. Lyalo Jeoshafati mwanaakwe wakapyana bwaami bwakwe.

Nadabu mwaami wa bene Isilaeli

²⁵ Mumwaaka wabili wa bwaami bwakwe Asa mwaami wa cishi ca Juda, Nadabu mwanaakwe Jeloboamu wakaba mwaami wa cishi ca Isilaeli. Wakalela kwamyaaka yobilo.

²⁶ Alakwe wakabishisha Mwaami Lesa bweenka bwaakacita baishi akutanjilila bene Isilaeli mucibiibi.

²⁷ Baasha mwanaakwe Aija, mumukowa wakwe Isaka, wakapingila Nadabu akumucaya, lakwe abashilumamba bakwe ndibakalinga kulwana mundabala inene ya Gibetoni mucishi ca bene Filisiti.

²⁸ Ici cakacitika mumwaaka watatu wa bwaami bwakwe Asa mucishi ca Juda. Mpomunyaawo Baasha wakapyana bwaami bwakwe Nadabu mucishi ca Isilaeli.

²⁹ Lyalo cakufwambaana wakatalika kucaya boonse bamuŋanda yakwe Jeloboamu. Kweelana abwakaamba Mwaami Lesa kwiinda mumusebenshi wakwe, mulaluki Aija wa kuShilo, boonse bamuŋanda yakwe Jeloboamu bakacaikwa. Taaku nabi womwi wakacaalaawo.

³⁰ Ici cakacitika mukwiinga Jeloboamu wakasonkomona bukali bwa Mwaami Lesa, Lesa wa bene Isilaeli kwiinda mushibiibi isho nshaakacita akulengesha bene Isilaeli bamwi boonse kushicita.

³¹ Shintu shimwi shoonse shakacita Nadabu shililembetwe mulibuku lya buumi bwa bamaami ba bene Isilaeli.

³² Asa mwaami wa bene Juda alimwi aBaasha mwaami wa bene Isilaeli bakalinga mbeshikulwanabo muciindi coonse cakulela kwabo.

Baasha mwaami wa bene Isilaeli

³³ Mumwaaka watatu wa bwaami bwakwe Asa mwaami wa cishi ca Juda, Baasha mwanaakwe Aija wakaba mwaami wa cishi coonse ca Isilaeli. Wakalela muTesa kwamyaaka makumi obilo amyaaka yone.

³⁴ Alakwe wakabishisha Mwaami Lesa bweenka mbwaakacita mwaami Jeloboamu akutanjilila bene Isilaeli mucibiibi.