1 Baami 14 - Baibo Busansulushi Bwa Libuku Ili

Abija mwanaakwe Jeloboamu mbwaakafwa

¹ Paciindi ico Abija mwanaakwe Jeloboamu wakaciswa.

² Jeloboamu wakaambila mukaakwe ayi, “Lilubyelubye kwaamba ayi kubule muntu ukwishiba. Lyalo uye kuShilo uko kwikala mulaluki Aija uyo wakaambila ndime ayi ndaakuba mwaami wa bene Isilaeli.

³ Umutolele shinkwa likumi, ashinkwa ubotu wamise alimwi akangomo ka buuci. Umwiipushe ceshi cikacitike kumwaneesu, ulaakukulwiita.”

⁴ Mpeeke wakaya kuŋanda yakwe Aija muShilo. Aija wakapofola ceebo cakucembela.

⁵ Mwaami Lesa wakamwaambila ayi mukaakwe Jeloboamu utoosa mukumwiipusha pamwanaakwe mulwashi. Mwaami Lesa wakalwiitila limwi Aija shakwaamba. Lyalo mukaakwe Jeloboamu ndyaakashika, wakalilubyalubya!

⁶ Sombi Aija ndyaakanyumfwa ayi wesa kumulyango wakaamba ayi, “Amunjile ndishi kwaamba ayi ndimwe bamuka Jeloboamu. Ino nceebonshi mutoolilubyalubya? Ndicite makani abiibi akumulwiita.

⁷ Muye mubalwiite baJeloboamu ayi Mwaami Lesa, Lesa wa bene Isilaeli waamba kuli mbabo ayi, ‘Ndakakusala pakati ka bantu bangu akukulengesha ayi ube mwaami wa bene Isilaeli.

⁸ Ndakanyaya bamulunyungu lwakwe Defedi bwaami akupa ndiwe. Sombi webo tookwe kushomeka mbuli musebenshi wangu Defedi, uyo wakalinga kunyumfwila cakumaninina alimwi wakalinga kucita nshendaamba asheeshobo sheenka nshendamusuminisha.

⁹ Webo weendaawo kucita shibiibi pabaabo bakalela webo kootana kuba mwaami. Wankaaka alimwi wasonkomona bukali bwangu kwiinda mukupanga shibumbwabumbwa, balesa ba golodi ayi unoolambila.

¹⁰ Paceebo ceeci ntooleta mapensho aanji pabamulunyungu lwako akucaya bamulunyungu lwako basankwa boonse banike abamanene. Ndaakutandaanya bamuŋanda yako boonse. Balaakupyeelwa anga ngamafumba.

¹¹ Wamuŋanda yako uli woonse weshi akafwite mundabala inene ulaakulikwa kubakabwa, alimwi uyo woonse weshi akafwite muliwesa ulaakulikwa makubi. Ubo nebo neMwaami Lesa mbondaamba!’ ”

¹² Aija wakatolelela kulwiita mukaakwe Jeloboamu ayi, “Ono amuboolele kuŋanda kumishaanu. Ono mwanjilabo mundabala ine mishaanu mwanaanu utoofwa.

¹³ Bene Isilaeli boonse balaakumulila akumufukila. Uyu ngomwanaakwe Jeloboamu eenkabo weshi akaliilwe kabotu mukwiinga ngomwaana wakakonda Mwaami Lesa, Lesa wa bene Isilaeli.

¹⁴ Mwaami Lesa ulaakubika mwaami pabene Isilaeli uyo weshi akamanishe bamulunyungu lwakwe Jeloboamu. Ncakwiila teshi kalekale, ndyoonoonobo ndyeshi akacicite ico.

¹⁵ Mwaami Lesa ulaakupensha bantu bene Isilaeli alimwi balaakunootutuma anga nditete lili mukalonga. Ulaakukusha bene Isilaeli mucishi ici cibotu ico ncaakapa bamashali babo bakulukulu, alimwi ulaakubapalanganya kwiindilila Mulonga wa Yufuletisi. Ulaakucita boobo mukwiinga bakasonkomona bukali bwakwe kwiinda mukupanga shikoshanyo sha lesa mwanakashi Ashela.

¹⁶ Mwaami Lesa ulaakusuula bene Isilaeli boonse mukwiinga wa kubisha kwakwe Jeloboamu uyo wakalengesha bene Isilaeli kubisha.”

¹⁷ Mukaakwe Jeloboamu wakaboolela kuTesa. Paciindi ndyaakashikabo kumishaabo, mwaana wakafwa.

¹⁸ Lyalo bene Isilaeli bakamulila mwaana uyo akumufukila, bweenka bwakaamba Mwaami Lesa kwiinda mumusebenshi wakwe mulaluki Aija.

Kufwa kwakwe Jeloboamu

¹⁹ Shintu shoonse shakacita Jeloboamu, mbuli nkondo isho nshaakalwana, mbwaakalinga kulela, shoonse shakalembwa mulibuku lya buumi bwa bamaami ba bene Isilaeli.

²⁰ Jeloboamu wakalinga mwaami wa bene Isilaeli kwamyaaka ili makumi obilo ayobilo. Wakafwa akubikwa. Nadabu mwanaakwe musankwa ngowakapyana bwaami bwakwe.

Leoboamu mwaami wa bene Juda

²¹ Leoboamu mwanaakwe Solomoni wakalinga kucite myaaka makumi one amwaaka womwi ndyaakaba mwaami wa cishi ca Juda. Wakalela kwamyaaka ili likumi ayosanwe alimwi ayobilo muJelusalemu, musena uyo Mwaami Lesa ngwaakasala mucishi ca Isilaeli coonse ayi anoolambililwaako. Banyina Leoboamu bakalinga ba Naama bakaswa kuAmoni.

²² Bene Juda bakabishisha Mwaami Lesa akusonkomona bukali bwakwe kwiinda bwakacita bamashali babo bakulukulu.

²³ Bakayaka misena yakulambililaako ya patulundu, bakeemikaawo amabwe akuyakawo shikoshanyo shakwe Ashela lesa mwanakashi kwaamba ayi kabalambila patulundu amunshaashisamu shicite shimfule shibotu.

²⁴ Cakabica kwiindilila ncakwaamba ayi, kwakalinga basankwa bakalinga kucitana bufuule pamisena njebakalinga kulambililaawo. Bene Juda bakalinga kucita shintu shoonse shipusenepusene shilensha nsoni shakalinga kucita bantu abo Mwaami Lesa mbwaakatandaamo ciindi bene Isilaeli ndibakalinga kuya cinjila mucishi ico.

²⁵ Mumwaaka wasanu wa bwaami bwakwe Leoboamu, mwaami Shishaki wa kuIjipiti wakesa mukulwana bene Jelusalemu.

²⁶ Wakabwesa shintu shamakwebo shoonse sha muŊanda yakwe Lesa alimwi amuŋanda ya mwaami, pantu pomwi amayawo a golodi ayo Solomoni ngaakapanga.

²⁷ Mukuboosheshaawo, mwaami Leoboamu wakapanga mayawo amwi a bulonse akwaabika mumaansa a bamatanjilili ba beshikulindilila kuminjililo ya kuŋanda ya bwaami.

²⁸ Lyoonse mwaami na utooya kuŊanda yakwe Lesa beshikulindilila bakalinga kwaanyamuna. Lyalo na wamanisha bakalinga kwaaboosha muŋanda ya beshikulindilila.

²⁹ Shintu shimwi shoonse shakacita Leoboamu shililembetwe mulibuku lya buumi bwa bamaami ba bene Juda.

³⁰ Muciindi coonse ico mwaami Leoboamu amwaami Jeloboamu bakalingabo mbeshikulwana.

³¹ Leoboamu wakafwa akubikwa kushuumbwe sha bamaami muNdabala inene yakwe Defedi. Banyina bakalinga ba Naama bakaswa kuAmoni. Lyalo Abija mwanaakwe wakapyana bwaami bwakwe.