1 Baami 13 - Baibo Busansulushi Bwa Libuku Ili

¹ Ono Mwaami Lesa wakatuma mulaluki kuswa kucishi ca Juda kuya kuBetelo. Wakashika ciindi Jeloboamu ndyaakeemikana kucipaililo kwaamba ayi abenge mulambu uyo.

² Kukonkela mulawo ngwaakaamba Mwaami Lesa, mulaluki wakanyansha cipaililo ico ayi, “Ocipaililo, ocipaililo, Mwaami Lesa waamba ayi, ‘Kulaakushalwa mwaana uyo weshi akeetwe ayi Josiya mulunyungu lwakwe Defedi. Pali ndiwe ulaakucailawo bapailishi abo basebensela kumisena yakulambililaako ya patulundu akubenga milambu pali ndiwe alimwi ulaakutenta shifuwa sha bantu pali ndiwe.’ ”

³ Lyalo mulaluki uyo wakatolelela akwaamba ayi, “Ici cipaililo cilaakuwa akumwayuluka. Ayalo milota ili pali ncico ilaakupalangana. Lyalo ulaakwishiba ayi Mwaami Lesa ngowaamba kwiinda muli ndime.”

⁴ Mwaami Jeloboamu ndyaakanyumfwa boobo, wakamutondeka munwe kwaamba ayi, “Amucate musankwa ulya!” Mpomunyaawo lyaansa lya mwaami uyo lyakayumabo nta cakwaalilwa kuliboosha mboliba lyoonse.

⁵ Cakufwambaana cipaililo cakamwayuluka, milota yoonse yakapalangana, mbweeke mulaluki mbwaakaamba muliina lya Mwaami Lesa.

⁶ Mwaami Jeloboamu wakaambila mulaluki ayi, “Ndakusenga mpailileeko kuMwaami Lesa wako kwaamba ayi alengeshe lyaansa lyangu kuba kabotu!” Mpeeke mulaluki wakapaila kuMwaami Lesa, lyalo lyaansa lya mwaami lyakaba kabotu.

⁷ Mpeeke mwaami wakaambila mulaluki ayi, “Katiya kuŋanda yangu uye ulyeeko cakulya. Ntookupa cilambu ceebo ca ceeci ncewacita.”

⁸ Mulaluki wakakumbula ayi, “Nabi mwampa musa wa bubile bwanu, inga nshikoonshi kuya amwebo, kulya nabi kunwa amwebo cili coonse.

⁹ Mwaami Lesa wankonkomesha ayi ntali cakulya nabi kunwa cili coonse alimwi ayi pakuboola kumushi nteendi nshila yomwi yeenka njendeshitaamo.”

¹⁰ Aboobo taakwe kwiinda nshila yeenka njaakaleta, sombi wakeenda imbi.

Mulaluki mucembele wa kuBetelo

¹¹ Paciindi ico kwakalinga mulaluki mucembele wakalinga kwikala muBetelo. Bana bakwe bakesa bamulwiita cakacita mulaluki wa kuBetelo mucishi ca Juda bushiku bweenka ubo alimwi ancaakaambila mwaami Jeloboamu.

¹² Mulaluki mucembele uyo wakabeepusha ayi, “Njili nshila njaatola ndyaalinga kuya?” Bakamulwiita nshila iyo.

¹³ Mpomunyaawo wakabaambila ayi bamubikile cakwikalaawo pambongolo yakwe. Bakacita ubo. Mpeeke wakanyamuka

¹⁴ kuya cicinsha mulaluki wa kuJuda. Wakamucana kaashiite munshi lya cisamu ca mubanga. Lyalo mucembele uyo wakamwiipusha ayi, “Sa ndiwe mulaluki uswa kucishi ca Juda?” Musankwa uyo wakakumbula ayi “Ee, ndime.”

¹⁵ Mulaluki mucembele wakaamba ayi, “Katiya kumisheesu tukalye.”

¹⁶ Sombi mulaluki wa kuJuda wakakumbula ayi, “Nshikoonshi kuya amwebo kumishaanu alimwi teshi ndye nabi kunwa cili coonse kuno awebo

¹⁷ mukwiinga Mwaami Lesa wankonkomesha ayi ntali cakulya nabi kunwa cili coonse alimwi ayi pakuboola kumushi nteendi nshila yomwi yeenka njendeshitaamo.”

¹⁸ Lyalo mulaluki mucembele wa kuBetelo wakamulwiita ayi, “Anebo ndi mulaluki bweenka mbuli ndiwe. Mwaami Lesa wantumina munjelo uyo wesa mukundwiita ayi nkutole kumisheesu akuya mukukubamba kabotu.” Nakubi boobo mulaluki mucembele ulya wakalinga kubecabo.

¹⁹ Lyalo mulaluki wa kuJuda wakaya kumishaabo mulaluki mucembele mukulya akunwa maanshi anguwe.

²⁰ Ndibakalinga kulya, liswi lya Mwaami Lesa lyakanyumfwika kumulaluki mucembele.

²¹ Mpeeke wakaamba muliswi lya peculu kumulaluki wa kuJuda ayi, “Mwaami Lesa waamba ayi tookwe kucita mbuli mbwaakakukonkomesha.

²² Waboola akulya akunwa maanshi mumusena ngwaakakukasha kulitaamo. Paceebo ceeci webo utoocaikwa, alimwi mubili wako teshi ukabikwe kushuumbwe sha bamuŋanda yako.”

²³ Ndibakamanisha kulya, mulaluki mucembele wakabikila wa kuJuda cakwikalaawo pambongolo.

²⁴ Lyalo mulaluki uyo wakanyamuka akuya. Munshila wakakumana ankalamu iyo yakamucaya. Mubili wakwe wakalinga kukungubete munshila. Mbongolo yakwe ankalamu shakalinga kwiimfwi pafwaafwi amubili.

²⁵ Bamwi bantu bakalinga kwiinda munshila umo bakabona mubili wakwe ankalamu kaiimfwi pafwaafwi. Bantu abo bakaya kuBetelo akuluula ncebakabona.

²⁶ Mulaluki mucembele ndyaakanyumfwa cikani ico wakaamba ayi, “Uyo ngumulaluki utakwe kunyumfwila kukonkomesha kwa Mwaami Lesa! Mwaami Lesa watuma nkalamu yakwisa mukumuluma akumucaya, bweenka mbwaakaamba ayi ulaakucita.”

²⁷ Lyalo wakaambila bana bakwe basankwa ayi, “Amubike cakwikalaawo pambongolo yangu.” Abalo bakacita ubo.

²⁸ Mpeeke wakanyamuka akuya mukucana mubili wa mulaluki kookungubete munshila. Mbongolo ankalamu ashalo shakalinga kwiimfwi pafwaafwi amubili. Nkalamu taikwe kulyaawo mubili nabi kulumaawo mbongolo, sobwe.

²⁹ Mulaluki mucembele wakabwesa mubili uyo, waubika pambongolo yakwe akuutola kuBetelo kuya mukulila akuubika mucuumbwe.

³⁰ Wakamubika mucuumbwe cakwe mwiine. Mulaluki uyo abana bakwe bakamulila akwaamba ayi, “Maawe mukwesu, maawe mukwesu!”

³¹ Ndibakamana kumubika, mulaluki uyo wakalwiita bana bakwe ayi, “Anebo ndaakufwa, mukambike mucuumbwe ceenka ici. Mukabike mubili wangu lubamba awaakwe.

³² Ceebo maswi ngaakaamba pacipaililo ca kuBetelo akumisena yoonse yakulambililaako ya patulundu mumandabala a muSamaliya, ayo Mwaami Lesa ngwaakamutuma, alaakucitika cancinencine.”

Mulandu unene ngwaakabisha Joloboamu

³³ Ono Jeloboamu Mwaami wa Isilaeli taakwe kushiya nshila shakwe sha bubi. Wakatolelela kusala bapailishi kuswa kumikowabo ya bantu ayi banoosebensela kushipaililo isho nshaakayaka. Wakalinga kubika mubupailishi kulilabo uli woonse usuni.

³⁴ Cibiibi ici kulubasu lwakwe cakaleta kunyonyooka kunene pakati ka bamulunyungu lwakwe.