1 Baami 12 - Baibo Busansulushi Bwa Libuku Ili

Bwaami mbobwakabaanikamo shipansha shobilo

¹ Ono Leoboamu wakaya kuShekemu uko bantu boonse ba kumatwa lya Isilaeli nkubakabungana ayi bamupe bwaami.

² Lyalo Jeloboamu mwanaakwe Nebati uyo wakalinga waya kuIjipiti kuloonda mwaami Solomoni, wakanyumfwa makani aya. Mpeeke wakaboola kuswa kuIjipiti.

³ Bantu ba kumatwa lya Isilaeli bakatuma nkombe yakumwiita akuya pantu pomwi kuli Leoboamu akumwaambila ayi,

⁴ “Baishiwanu baSolomoni bakalinga kutulela calunkutwe akutupa mikuli ilemu abuumbi. Na mwebo muubye mikuli iyo akunootulela kabotu, swebo tutooba bantu banu.”

⁵ Mpomunyaawo Leoboamu wakakumbula ayi, “Mukaboole paakwiinda nshiku shotatwe. Ndaakumukumbula.” Lyalo abalo bakaya.

⁶ Lyalo mwaami Leoboamu wakeepusha baabo bakalinga kupanda maano Solomoni ishi ayi, “Ino mumiyeeyo yanu bantu aba inga ndabakumbula ayinshi?”

⁷ Balo bakakumbula ayi, “Na mulisuni kusebensela bantu aba kabotu, mulyeelete kubakumbula kabotu. Lyalo balaakunooshomeka kuli ndimwe lyoonse.”

⁸ Ono lakwe wakasuula makani akaamba bamaloba akuya kubanikenyina abo mbwaakakulaabo alimwi mbobaabo bakalinga beshikumupandaako maano.

⁹ Wakabeepusha ayi, “Amumpandeeko maano. Ino bantu aba baŋambila ayi, ‘Muubye mikuli yesu,’ inga ndabakumbula ayinshi?”

¹⁰ Balo bakakumbula ayi, “Bantu abo mukabakumbule ayi, ‘Kanyansa kangu nkanene kwiinda bukome bwa bata!’

¹¹ Mubalwiite alimwi ayi, ‘Bata bakamupa mikuli ilemu, ono nebo ndaakwiindilishaawo apo. Bakalinga kumuumisha musako, sombi nebo ndaakunoomuumisha mutatula!’ ”

¹² Ndipakeenda nshiku shotatwe Jeloboamu abantu boonse bakaboolela kumwaami Leoboamu, bweenka mbwaakalinga wabaambila.

¹³ Lakwe mwaami wakasuula makani akaamba bamaloba balya akwaamba shishipite kubantu abo

¹⁴ mbuli mbobakalinga bamulwiita banikenyina. Wakaamba ayi, “Bata bakamupa mikuli ilemu, ono nebo ndaakwiindilishaawo apo. Bakalinga kumuumisha musako, sombi nebo ndaakunoomuumisha mutatula!”

¹⁵ Cakacitika boobo kweelana akuyanda kwa Mwaami Lesa kwaamba ayi nshaakaambila Jeloboamu mwanaakwe Nebati kwiinda muli Aija mulaluki wa kuShilo, shicitike cancinencine. Nceceeco mwaami Leoboamu ncaatakwe kubikila maano kubantu.

¹⁶ Bantu ndibakabona kwaamba ayi mwaami teshi abanyumfwile, bakoolobesha ayi, “Taaku ceesu kuli Defedi, Tatubeteeko lubasu kumwanaakwe Jese! Nobene Isilaeli amuboolele kumaanda anu! Amuleke wamulunyungu lwakwe Defedi alibonene!” Munshila iyi bene Isilaeli bakakaka Leoboamu kuba mwaami wabo.

¹⁷ Nakubi boobo bene Isilaeli abo bakalinga kwikala mucishi ca Juda, wakabalela.

¹⁸ Mwaami Leoboamu wakatuma Adonilamu, uyo wakalinga kweendelesha bacibalu, kuya kubene Isilaeli. Sombi balo bakamuuma mabwe akumucaya. Leoboamu ndyaakabona boobo, wakacica akutanta mucikoci cakwe akulobokela kuJelusalemu.

¹⁹ Kuswabo bushiku ubo bene Isilaeli ba mubulelo bwakumatwa bakalinga kupatene abamulunyungu lwakwe Defedi.

²⁰ Bene Isilaeli ndibakanyumfwa ayi Jeloboamu wakaboola kuswa kuIjipiti, bakamutamba kulibungano lyabo akumupa bwaami pabene Isilaeli. Bamumukowa wakwe Juda beenka mbobakacaala mubulelo bwa bamulunyungu lwakwe Defedi.

Kulaluka kwakwe Shemaya

²¹ Ono Leoboamu ndyaakashika muJelusalemu, wakabunganya bashilumamba bali 180,000 kuswa mumukowa wa bene Juda awa bene Benjameni. Wakalinga kusuni kuya mukulwana mikowa ya bene Isilaeli ya kumatwa kwaamba ayi abooshe bwaami bwakwe pamikowa iyo.

²² Sombi Lesa wakaambila mulaluki Shemaya ayi

²³ ape maswi aya kuli Leoboamu mwanaakwe Solomoni mwaami wa bene Juda akubantu boonse bene Juda abene Benjameni ayi,

²⁴ “Mutalwani bamakwabanu, ee, bene Isilaelinyinaanu. Kamuya kumishaanu noonsebo. Ico cacitika mukuyanda kwangu.” Lyalo boonse bakanyumfwila shakaamba Mwaami Lesa akuya mwabo mwabo.

Jeloboamu mbwaakakusha maano kumwaami Lesa

²⁵ Mwaami Jeloboamu mwine Isilaeli wakayaka lilinga kundabala ya Shekemu mucishi ca tulundu ca Efuleemu akwikalaako ciindi ciniini. Lyalo wakaswaako akuya mukuyaka lilinga kundabala ya Penuwelo.

²⁶ Mpeeke Jeloboamu wakalyaamboosha mumoyo wakwe ayi, “Ndabona bwaami bulaakuboolela kubamulunyungu lwakwe Defedi.

²⁷ Na bantu bangu banoociya mukubenga milambu kuŊanda ya Mwaami Lesa mundabala ya Jelusalemu, inga basandukila kuli Leoboamu mwaami wa bene Juda. Aboobo inga bancaya akuboolela mubwaami bwakwe.”

²⁸ Ndyaakamana kuyeeya pacikani ici, wakabumba bacende baana ba golodi bobilo. Lyalo wakaamba kubantu bakwe ayi, “Mwakalinga kupenga kunooya kuJelusalemu mukulambila. Nobene Isilaeli, ono mbaaba balesa bakamukusha muIjipiti!”

²⁹ Wakabika mucende mwaana wa golodi umwi mundabala ya Betelo aumwi mundabala ya Dani.

³⁰ Lyalo bantu bakabisha, pakuya mukulambila kuBetelo akuDani.

³¹ Jeloboamu wakayaka misena yakulambililaako peculu patulundu. Wakasala abapailishi bateshi bamumukowa wa bene Lefi.

Kulambila kuBetelo mbokwakakashikwa

³² Jeloboamu alakwe wakabika bushiku bwalikumi ashosanwe mumweenshi wasanu ayotatwe ayi mbwakusekelela bweenka mbocakalinga kucitika muJuda. Wakalinga kubenga milambu mundabala ya Betelo kubacende baana ba golodi abo mbwaakabumba. KuBetelo wakabikaako bapailishi ayi basebensele kumisena yakulambililaako ya patulundu njaakayaka.

³³ Ono pabushiku bwalikumi ashosanwe bwa mweenshi wasanu ayotatwe, ubo bushiku mwiine mbwaakasala, wakaya kuBetelo akubenga mulambu pacipaililo mukusekelela bushiku ubu mbwaakabambila bene Isilaeli.