1 Baami 11 - Baibo Busansulushi Bwa Libuku Ili

Solomoni abakaakwe

¹ Mwaami Solomoni wakalinga kusuni banakashi baanji baswamashi. Peculu lya mwanaakwe Falawo mwaami wa kuIjipiti, wakeeba banakashi bene Iti, Moabu, Amoni, Edomu alimwi abene Sidoni.

² Wakabeeba nakubi kwaamba ayi Mwaami Lesa wakakasha bene Isilaeli kweebana abaswamashi kuloondesha kwaamba ayi inga balengesha bene Isilaeli kulambila balesa bamwi.

³ Solomoni wakeeba banaabaami bali 700 alimwi wakalinga kucite bakasuwa bali 300. Banakashi abo bakamulengesha kwaamba ayi ashiye nshila yakwe Lesa.

⁴ Paciindi ndyaakacembela bakamulengesha kulambila balesa beensu. Taakalinga kulemeka Mwaami Lesa, Lesa wakwe mbuli bwakalinga kucita Defedi ishi.

⁵ Wakalinga kulambila Ashitaloti lesa mwanakashi wa bene Sidoni alimwi aMoleki lesa wa bene Amoni ulensha bunya.

⁶ Wakabisha kuli Lesa alimwi taakalinga kushomeka kuli nguwe cakumaninina mbuli bwakalinga Defedi ishi.

⁷ Pakalundu, kwicwe lya Jelusalemu wakayaka musena wakulambililawo Kemoshi lesa wa bene Moabu ulensha bunya amusena wakulambililawo Moleki lesa wa bene Amoni ulensha bunya.

⁸ Kuswawaawo wakayaka misena yakulambililaako ya patulundu uko bamakaakwe baswamashi boonse nkobakalinga kutentela tununkila kabotu akupa milambu kubalesa babo.

⁹ Mwaami Lesa wakakalalila Solomoni mukwiinga moyo wakwe wakaswaako kuMwaami Lesa, Lesa wa bene Isilaeli uyo wakaboneka kuli nguwe mankanda obilo.

¹⁰ Nabi wakamukasha kulambila balesa bamwi, Solomoni taakwe kunyumfwila milawo yakwe Lesa.

¹¹ Aboobo Mwaami Lesa wakaambila Solomoni ayi, “Ono mukwiinga wapwaya kashanga cipangano ncendakapanga awebo akusuula milasho yangu yoonse, ntooshomesha ayi ntookunyaya bwaami bwako akubupa wacinenenene wako womwi.

¹² Nakubi boobo ceebo cakwe Defedi iso, teshi ncite boobo paciindi cino webo koociliiwo. Sombi ndaakucicita paciindi ico mwanaako aakunoolela.

¹³ Teshi nkamunyaaye bulelo boonse, sombi ndaakumushiila mukowa womwi ceebo ca musebenshi wangu Defedi alimwi aJelusalemu ndabala inene njendakasala ayi njaangu.”

Balwani bakwe Solomoni

¹⁴ Paciindi ico Mwaami Lesa wakalengesha Adadi wa kumukowa wa bwaami bwine Edomu kwaamba ayi abukile Solomoni.

¹⁵ Kalekale paciindi ico Defedi ndyaakalinga kulwana abene Edomu, Joabu mutanjilili wa bashilumamba wakaya mukufukila bene Isilaeli bakacaikwa, wakacaya basankwa boonse bene Edomu.

¹⁶ Joabu abashilumamba bakwe bakekala uko kweenka myeenshi yosanwe awomwi, kushikila ciindi ndibakacaya basankwa bene Edomu boonse.

¹⁷ Sombi Adadi abasebenshi ba baishi bene Edomu bakalobokela kuIjipiti. Paciindi ico Adadi wakalingabo mwanike.

¹⁸ Bakanyamuka kuswa kucishi ca Midyani kuya mukushika kuPalani, uko nkobakakumanya basankwa mbobakayaabo. Lyalo bakeenda kuya mukushika kuIjipiti akuya mukubonana aFalawo mwaami wa kuIjipiti. Mpeeke mwaami uyo wakapa Adadi musena wakwikalaamo, ŋanda alimwi ashakulya.

¹⁹ Falawo wakasunisha Adadi cakwaamba ayi wakamupa mulamu wakwe, nankashi yakwe Tapenesi mukaakwe, ayi eebe.

²⁰ Mwanakashi uyo wakashalila Adadi mwaana musankwa wiitwa ayi Genubati. Genubati uyo wakalelwa aTapenesi muka Falawo muŋanda ya bwaami umo mwakalinga kwikala abaana ba mwaami basankwa.

²¹ Lyalo Adadi ndyaakalinga muIjipiti, wakanyumfwa ayi Defedi wakafwa alimwi ayi Joabu mutanjilili wabashilumamba alakwe wakafwa. Mpeeke wakaambila Falawo ayi, “Amunsuminishe mboolele kumisheesu.”

²² Mpomunyaawo mwaami wakeepusha ayi, “Cabica nciinshi? Sa kuli ncendaalilwa kukupa? Sa ncoosunini kuboolela kumishaanu ico?” Adadi wakakumbula mwaami ayi, “Sobwe, amundeekebo mboolele.” Lyalo wakaboolela kucishi cine mishaabo.

²³ Lesa wakalengesha Lesoni mwanaakwe Eliyada ayi alakwe abukile Solomoni. Lesoni wakaloboka kumwaami wakwe, Adadesa mwaami wa kuSoba.

²⁴ Wakaba munene wa beshishimfulunganya. Ishi shakacitika Defedi ndyaakakoma Adadesa alimwi akucaya bene Silya abo bakalinga kunyumfwanaakwe. Lesoni abantu bakwe bakaya mukwikala kuDamasikasi uko bantu bakwe nkobakaya mukumupa bwaami bwa cishi ca Silya.

²⁵ Lesoni wakalinga kupatene abene Isilaeli ciindi Solomoni kacili muumi kwiilika pamapensho akalinga kulengeshekwa aAdadi.

Kushomesha kwakwe Lesa kuli Jeloboamu

²⁶ Kwakalinga muntu aumwi wakalinga wabukila mwaami Solomoni. Muntu uyo wakalinga Jeloboamu mwanaakwe Nebati womwi pakati ka bacinenenene bakwe Solomoni. Jeloboamu wakalinga kuswa kuSeleda mucishi ca bene Efuleemu. Banyina bakalinga baSeluya abo bakalinga bamukalubinje.

²⁷ Cikani ici mbulya mbocakatalika. Solomoni wakalinga kubika bulongo mukweelanya kwicwe lya Jelusalemu akushinkashinka lubumbu lwa ndabala inene.

²⁸ Jeloboamu wakalinga musankwa ushimpite. Solomoni wakabona kwaamba ayi Jeloboamu wakalinga kusebensa ankusu. Aboobo wakamubika kukweendelesha beshicibalu boonse mucishi ca bene Manase alimwi abene Efuleemu.

²⁹ Bumwi bushiku Jeloboamu wakalinga kuya bweendeenda kuswa kuJelusalemu, wakakumanya Aija mulaluki kaaswa kuShilo eenka, mucishi citacite shisamu kaafwete amungaanjo upya.

³⁰ Lyalo Aija wakafuula mungaanjo wakwe uyo ngwaakalinga kufwete. Mpeeke wakaukwamuna mushipansha likumi ashobilo.

³¹ Mpomunyaawo wakaambila Jeloboamu ayi, “Bwesawo shipansha shili likumi shibe shaako mukwiinga Mwaami Lesa, Lesa wa bene Isilaeli waamba pali ndiwe ayi, ‘Ntoonyaya Solomoni bwaami akubika mikowa ili likumi mumaansaako.

³² Solomoni ulaakusunga mukowa womwi ceebo ca musebenshi wangu Defedi alimwi aceebo ca ndabala ya Jelusalemu iyo njendakasala ayi njaangu mucishi coonse ca Isilaeli.

³³ Ntoocita boobo mukwiinga Solomoni wansuula alimwi akulambila balesa beensu. Nkokwaamba ayi Ashitaloti lesa mwanakashi wa kuSidoni, Kemoshi lesa wa kuMoabu alimwi aMoleki lesa wa kuAmoni. Solomoni wankaka, wabisha alimwi taakwe kusunga milawo yangu amilasho mbuli bwakalinga kucita Defedi ishi.

³⁴ Sombi teshi nkabwese bwaami boonse bwakwe Solomoni, sombi ndaakumuleka ayi anoocili mwaami kwabuumi bwakwe boonse ceebo ca musebenshi wangu Defedi uyo ngondakasala. Lakwe wakalinga kukonkela milawo amilasho yangu.

³⁵ Ndaakunyaya mwanaakwe Solomoni musankwa bwaami akubika mikowa likumi mumaansaako.

³⁶ Sombi ndaakupa mwanaakwe Solomoni mukowa womwi kwaamba ayi nkabeewo awamulunyungu lwa musebenshi wangu Defedi uyo weshi akanoolela ndabala ya Jelusalemu iyo njendakasala ayi mweshi banoonambilila.

³⁷ Jeloboamu, ndaakukulengesha kuba mwaami wa bene Isilaeli alimwi ulaakulela musena uli woonsebo ngoonsuni.

³⁸ Na ukanoonyumfwila camoyo woonse akukonkela milawo yangu alimwi akunsangalasha mukucita kweelana amilasho yangu bweenka bwaakacita Defedi musebenshi wangu, ndaakuba awebo kwalyoonse. Ndaakukupa bwaami bwa bene Isilaeli akulengesha bamulunyungu lwako kupyana bwaami bwako bweenka mbondakacita pali Defedi.

³⁹ Ceebo cakubisha kwakwe Solomoni ndaakupa mulandu bamulunyungu lwakwe Defedi, sombi kutaamba ayi kwanshiku shoonse, sobwe.’ ”

⁴⁰ Paceebo ceeco Solomoni wakalinga kusuni kucaya Jeloboamu. Sombi lakwe wakacicila kuli Shishaki mwaami wa kuIjipiti akwikala uko kushikila Solomoni ndyaakafwa.

Kufwa kwakwe Solomoni

⁴¹ Shintu shimwi shoonse shaakacita Solomoni ashabusongo bwakwe boonse shakalembwa mulibuku lya buumi bwakwe Solomoni.

⁴² Wakalinga mwaami muJelusalemu wa cishi coonse ca bene Isilaeli kwamyaaka ili makumi one.

⁴³ Wakafwa akubikwa muNdabala yakwe Defedi, lyalo Leoboamu mwanaakwe musankwa ngowakapyana bwaami bwakwe.