1 Baami 1 - Baibo Busansulushi Bwa Libuku Ili

Mwaami Defedi ndyaakacembela

¹ Mwaami Defedi wakacembela abuumbi paciindi ici cakwaamba ayi nabi basebenshi bakwe bamufweka manduumba, taakalinga kukasaalilwaawo.

² Lyalo bacinenenene bakwe bakaamba ayi, “Nomulemekwa amutusuminishe tumuyandweete mulindu ngweshi munookalaakwe alimwi weshi anoomulama kabotu. Unanokoona pafwaafwi amwebo kwaamba ayi anomulungushaako.”

³ Aboobo bakayandoola mulindu mubotu mucishi coonse ca Isilaeli, mpeeke mundabala ya Shunemu bakacana mulindu wiitwa ayi Abishagi akumutola kumwaami.

⁴ Mulindu uyo wakalinga mubotu abuumbi. Wakasebensela mwaami akumubamba kabotu, sombi mwaami taakwe kukumanaakwe.

Adonija mbwaakalipa bwaami

⁵ Ono Adonija mwanaakwe Defedi aAgiti wakalisumpula akwaamba ayi, “Ntooba mwaami.” Mpeeke wakabamba shikoci sha nkondo amaaki alimwi abashilumamba bali makumi osanwe ayi banooya bucica kunembo lyakwe.

⁶ Defedi ishi taakwe kumupilinganya mukumwiipusha ayi, “Ino utoocitilanshi bobulya?” Adonija wakalinga musankwa mubotu ciwa abuumbi alimwi ngowakalinga kukonkela Abusalomu mukushalwa.

⁷ Mpeeke Adonija wakanyumfwana aJoabu mwanaamwanakashi wiitwa ayi Seluiya alimwi aBiyata mupailishi. Abalo bakasumina kumucafwa mucikani ico.

⁸ Sombi Sadoki mupailishi, Benaiya mwanaakwe Jeoiyada, Natani mulaluki, Shimeyi, Leyi alimwi abeshikulindilila Defedi tebakalinga kulubasu lwakwe.

⁹ Bushiku bumwi Adonija wakabenga mulambu wa mbelele abacende alimwi aboombe beenite kuLibwe lya Nsoka pafwaafwi akantupu ka Eni Logelo. Wakatamba baana basankwa bamwi ba mwaami Defedi pantu pomwi abacinenenene bakwe Defedi ba muJuda kukusekelela uko.

¹⁰ Sombi taakwe kutambawo Solomoni mukwabo uteshi walifumo lyomwi, Natani mulaluki, Benaiya nabi beshikulindilila mwaami.

Solomoni mbwaakapekwa bwaami

¹¹ Mpeeke Natani wakaya kuli Batisheba, banyina Solomoni, akumwiipusha ayi, “Sa mwanyuumfwa ayi Adonija mwanaakwe Agiti walibika pabwaami alimwi baami besu baDefedi taaku ncebeshi?

¹² Ono na mulisuni kupulusha buumi bwanu abwakwe Solomoni mwanaanu, ntoomulwiitakobo ayi

¹³ muye kubaami baDefedi mukabeepushe ayi, ‘Nomulemekwa, sa tamukwe kunshomesha cakulumbila nemusebenshi wanu ayi Solomoni mwanaangu ngweshi akabe mwaami? Ono ceebonshi Adonija waba mwaami?’

¹⁴ Lyalo mwebo kamucaamba abaami, anebo ntoonjila akusuminisha nceshi mwaambe.”

¹⁵ Mpeeke Batisheba wakaya mukubona mwaami mucipinda mwaakalinga koona. Mwaami wakalinga kucembelete abuumbi. Abishagi mulindu ulya wakaswa kuShunemu ngowakalinga kumulama.

¹⁶ Batisheba wakafukama kunembo lya mwaami. Lyalo mwaami wakamwiipusha ayi, “Ino kwaba buyani?”

¹⁷ Lakwe wakakumbula ayi, “Nomulemekwa, mwakanshomesha cakulumbila nemusebenshi wanu muliina lyakwe Lesa wanu ayi Solomoni mwanaangu ngweshi akabe mwaami kuswa ndimwe.

¹⁸ Sombi Adonija waba kale mwaami alimwi mwebo nkambo nobaami bangu taaku ncemwishi.

¹⁹ Wabenga mulambu wa bacende baanji, mbelele, alimwi aboombe beenite. Watamba bana banu basankwa, Abiyata mupailishi alimwi aJoabu mutanjilili wa bashilumamba banu kuya mukusekelela. Sombi taakwe kutambawo Solomoni mwanaanu.

²⁰ Nomulemekwa, bene Isilaeli boonse batoolindila kunyumfwa kuli ndimwe kubalwiita wooyo weelete kuba mwaami kuswa ndimwe.

²¹ Na mubule kucita boobo, mwaakufwa nebo aSolomoni mwanaangu balaakutulwana.”

²² Kaacaambaabo, Natani mulaluki wakashika kuŋanda ya mwaami.

²³ Mwaami wakalwiitikwa ayi mulaluki wesa. Lyalo Natani wakenjila akufukama cakushisha ciwa panshi.

²⁴ Lyalo wakaamba ayi, “Nkambo nobaami bangu, sa mwaambilisha ayi Adonija utooba mwaami kuswa ndimwe?

²⁵ Sunu bulya waya mukubenga bacende baanji, mbelele shiinji alimwi aboombe beenite. Watamba bana banu basankwa, Abiyata mupailishi alimwi aJoabu mutanjilili wa bashilumamba banu. Bulya batoosekelela akoolobesha ayi, ‘Eekale ciindi cilaamfu mwaami Adonija!’

²⁶ Sombi nebo, nkambo, Sadoki mupailishi, Benaiya mwanaakwe Jeoiyada nabibo Solomoni mwanaanu taakwe kututambaawo.

²⁷ Sa mwebo nomulemekwa mwasuminisha shoonse ishi cakutalwiitaawo bacinenenene banu, uyo utooba mwaami kuswa ndimwe?”

²⁸ Mwaami Defedi wakaamba ayi, “Ambila Batisheba ayi ese mukati muno” Lyalo Batisheba wakesa weemikana kunembo lya mwaami.

²⁹ Mpeeke wakamwaambila ayi, “Ntookulwiita calushinisho pameenso akwe Mwaami muumi, uyo wamfuna mumapensho angu oonse

³⁰ ayi sunu ntoocita kweelana ambondakashomesha cakulumbila kuli ndiwe muliina lya Mwaami Lesa, Lesa wa bene Isilaeli, ayi mwanaako musankwa Solomoni ulaakuba shikupyana bwaami bwangu.”

³¹ Lyalo Batisheba wakafukama cakushisha ciwa panshi akwaamba ayi, “Nkambo nobaami bangu kamubukila buumi kwalyoonse alyoonse!”

³² Mpomunyaawo mwaami Defedi wakatuma nkombe ayi Sadoki mupailishi, Natani mulaluki, alimwi Benaiya mwanaakwe Jeoiyada bese. Ndibakenjila,

³³ wakabalwiita ayi, “Amubwese bacinenenene bangu, mutantike Solomoni mwanaangu pambongolo yabwaami, mumushindikile kushika kukantupu ka Giwoni.

³⁴ Lyalo uko Sadoki alimwi aNatani baye bananike Solomoni mafuta ayi abe mwaami wa bene Isilaeli. Kuswawaawo balishe lupeenga akoolobesha ayi ‘Eekale ciindi cilaamfu mwaami Solomoni!’

³⁵ Mumukonkele pakuboola kwisa kokuno mukwikala pacuuna cangu ca bwaami. Lakwe ngweshi atole musena wangu wa bwaami mukwiinga nebo ngondakasala kwaamba ayi akabe muleli wa bene Isilaeli awa bene Juda.”

³⁶ Benaiya wakakumbula ayi, “Citoocitwa bweenka ubo, alimwi Mwaami Lesa, Lesa wanu aasuminishe ayi cibe boobo.

³⁷ Mwaami Lesa aabe aSolomoni bweenka mbwaakalinga amwebo nkambo nobaami, kwaamba ayi buleli bwakwe bwiindeewo kusumpuka pabwaanu.”

³⁸ Aboobo Sadoki, Natani, Benaiya alimwi abeshikulindilila mwaami bakabika Solomoni pacifubwa cakwe Defedi cili anga nimbongolo akumushindikila kukantupu ka Giwoni.

³⁹ Sadoki wakabwesa musaashi mwakalinga mafuta a olifi ngaakakusha kuTente ya Cipangano akunanika Solomoni. Bakalisha lupeenga, bantu boonse bakoolobesha ayi, “Eekale ciindi cilaamfu mwaami Solomoni!”

⁴⁰ Lyalo boonse bakaboolaakwe kabaya coolobesha pesule cakusangalala akulisha mitoolilo anshi yakatenkaana.

⁴¹ Adonija abaabo mbwaakatamba bakanyumfwa ciyobeyobe ndibakalinga kuya cimanisha kusekelela kwabo. Joabu ndyaakanyumfwa kulila kwa lupeenga wakeepusha ayi, “Ino ciyobeyobe coonse ico mundabala inene ncanshi?”

⁴² Kaatana kumana akwaamba, Jonasani mwanaakwe Abiyata mupailishi wakashika. Adonija wakaamba ayi, “Njila muno. Webo uli muntu kabotu. Ndishi kwaamba ayi waleta makani abotu.”

⁴³ Jonasani wakakumbula ayi, “Taaku ashibotu shindaleta, sobwe. Mwaami wesu Defedi wabika Solomoni pabwaami.

⁴⁴ Wakatuma Sadoki, Natani, Benaiya alimwi abeshikulindilila mwaami kumushindikila. Bakamutantika pacifubwa ca mwaami cili anga nimbongolo.

⁴⁵ Lyalo Sadoki mupailishi aNatani mulaluki bakamunanika mafuta ayi abe mwaami kukantupu ka Giwoni. Lyalo baya mundabala kuya coolobesha cakusangalala. Ono bantu basamwa. Nceceeco ciyobeyobe ncemwanyumfwa.

⁴⁶ Kwiilika waawo Solomoni wekala apacuuna cabwaami.

⁴⁷ Abalo bacinenenene ba mwaami baya kumwaami wesu Defedi mukumulumba akwaamba ayi, ‘Lesa wanu alengeshe Solomoni kuya mpuwo kwiinda ndimwe alimwi buleli bwakwe bwiindeewo pabwaanu kusumpuka.’ Lyalo mwaami Defedi wakakotama pabulo bwakwe walambila Lesa

⁴⁸ akupaila ayi, ‘Atulumbaishe Mwaami Lesa, Lesa wa bene Isilaeli, uyo sunu walengesha wamulunyungu lwangu kuba shikupyana bwaami bwangu akulengesha ayi ici cicitike mumeenso angu kaancili muumi!’ ”

⁴⁹ Lyalo abo Adonija mbwaakatamba bakaloonda. Mpeeke boonse bakanyamuka akupalangana.

⁵⁰ Adonija mukuloonda Solomoni, wakaya kuTente ya Cipangano akucata kumakonko a cipaililo aboneka anga ngameeca.

⁵¹ Mwaami Solomoni wakalwiitikwa ayi Adonija utooloonda nguwe alimwi ayi wacatilila kumakonko a cipaililo akwaamba ayi, “Kutaanguna, ndisuni mwaami Solomoni ashomeshe cakulumbila ayi teshi akancaaye.”

⁵² Solomoni wakakumbula ayi, “Na ngumuntu mubombu taaku nabi mususu womwi mumutwi wakwe weshi ukatumunwe, sombi na ngutaalala ulaakucaikwa.”

⁵³ Mpeeke mwaami Solomoni wakatuma basankwa baya baselusha Adonija kuswa pacipaililo. Adonija wakaya wafukama kunembo lya mwaami alakwe mwaami wakaamba ayi, “Koya kuŋanda yako.”