ZIA YÃ 7 - Bokobaru Bible

Sèedakɛna Luda zↄ̀blerinↄa

¹ Beee gbɛra ma malaika gↄ̃ↄn siigↄ̃ↄnↄ è zɛzɛ anduna gooda siigↄ̃ↄnↄa, aↄ̃ baade a gooda ĩa kũna, lɛ ĩa tón vu tↄↄtɛ ke ísiaa ke lí kearo yãnzi.

² Ben ma malaika pãnde è, à bↄ̀ à fɛ̀ɛ ↄfãntɛ̃bↄɛ kpa, à Luda Wɛ̃̀ndide sèedakɛbↄ kũna. À lɛ́ gbãaa zù malaika gↄ̃ↄn siigↄ̃ↄ kɛ̀ wà ń gbá zɛ́ aↄ̃ tↄↄtɛ kↄ̃n ísiaao yaka pìnↄzi

³ à bè: Àton tↄↄtɛ ke ísiaa ke línↄ yakaro ai wà sèeda kɛ wa Luda zↄ̀blerinↄ mì'aɛnↄa.

⁴ Ben wà gbɛ̃ kɛ̀ wà sèeda pì kɛ̀ḿmanↄ lɛ́ òmɛ, aↄ̃ gↄ̃ↄn bↄrↄ baswɛɛplaa awɛɛsiigↄ̃mɛ. Aↄ̃ bↄ̀ Isaraili bori píngi guu:

⁵ Yuda boriinↄ gↄ̃ↄn bↄrↄ kuri awɛɛplaa, Rubɛni boriinↄ gↄ̃ↄn bↄrↄ kuri awɛɛplaa, Gada boriinↄ gↄ̃ↄn bↄrↄ kuri awɛɛplaa,

⁶ Asa boriinↄ gↄ̃ↄn bↄrↄ kuri awɛɛplaa, Nafatali boriinↄ gↄ̃ↄn bↄrↄ kuri awɛɛplaa, Manase boriinↄ gↄ̃ↄn bↄrↄ kuri awɛɛplaa,

⁷ Simɛↄ boriinↄ gↄ̃ↄn bↄrↄ kuri awɛɛplaa, Levi boriinↄ gↄ̃ↄn bↄrↄ kuri awɛɛplaa, Isaka boriinↄ gↄ̃ↄn bↄrↄ kuri awɛɛplaa,

⁸ Zɛbuluni boriinↄ gↄ̃ↄn bↄrↄ kuri awɛɛplaa, Yusufu boriinↄ gↄ̃ↄn bↄrↄ kuri awɛɛplaa, Bɛyãmi boriinↄ gↄ̃ↄn bↄrↄ kuri awɛɛplaa.

Bori píngi kakↄ̃ana ludambɛ

⁹ Beee gbɛra ma gbɛ̃nↄ è paripari, weé fↄ̃ wà ń lɛ́ dↄ̃ro. Aↄ̃ bↄ̀ bùsu píngi guu, bori píngi guu, gbɛ̃ píngi guu, boriyã píngi guu. Aↄ̃ↄ zɛzɛna kíblekita kↄ̃n Sãnɛ Bↄ̀rↄo aɛ. Aↄ̃ↄ utagyaba puraa dadana, kpakpa lánↄↄ nana ń ↄzĩ.

¹⁰ Aↄ̃ↄe wii gbãaa lɛɛ wèe bee: Mìsina è bↄ wa Luda kɛ̀ vɛ̃ɛna kìtaa kↄ̃n Sãnɛ Bↄ̀rↄo kiiamɛ.

¹¹ Malaikanↄↄ zɛzɛna wà lìga kìta kↄ̃n gbɛ̃nsinↄ kↄ̃n pↄ́ bɛ̃ɛ mɛ̀n siigↄ̃ↄnↄzi ń píngi, ben aↄ̃ kùɛkuɛ kìta pì aɛ wà dↄnzi kɛ̀ Ludanɛ

¹² wà bè: Aami! Wa Luda bé à tↄ́ vĩ kↄ̃n gakuio kↄ̃n ↄ̃ndↄ̃ↄo kↄ̃n sáabuo kↄ̃n bɛ̀ɛo kↄ̃n ikoo kↄ̃n gbãaao gurↄ píngi. Aami!

¹³ Ben gbɛ̃nsi pìnↄ doke ma la à bè: Dénↄn gyabapuradari kɛ̀nↄ ũu? Aↄ̃ bↄ̀ mámɛ?

¹⁴ Ma bènɛ: Baa, ḿbe ń dↄ̃. Ben à bèmɛ: Gbɛ̃ kɛ̀ aↄ̃ bↄ̀ wɛ́ɛtãmma bíta guunↄmɛ. Aↄ̃ ń utagyaba pìnↄ pìpi Sãnɛ Bↄ̀rↄ aru guu à pura kũ̀.

¹⁵ Beee yãnzin aↄ̃ↄ kú Luda kìta aɛzĩzi, aↄ̃ↄe dↄↄzi a kpɛ́n fãantɛ̃ kↄ̃n gwãavĩo. Gbɛ̃ kɛ̀ vɛ̃ɛna kìtaa pì é a kuta kúńla.

¹⁶ Nↄaa ke ímii é ń dɛ zikiro, ↄfãntɛ̃ é ń lɛ́ro, guu é wãḿmaro,

¹⁷ zaakɛ Sãnɛ Bↄ̀rↄ kɛ̀ kú kìta pì gura súusu é kɛ ń Dã̀ri ũ, eé dↄńnɛ aɛ ai í wɛ̃̀ndide bↄkiia, Luda é gbasa à ń wɛ́ɛ'i gogońnɛ píngi.