ZIA YÃ 4 - Bokobaru Bible

Dↄnzikɛna Ludanɛ zaa musu

¹ Beee gbɛra ma zɛ́ è wɛ̃na ludambɛ. Ben ma kòto kɛ̀ má mà káaku lán kãkãki'ↄ bà mà dↄ à bè: Ǹ mↄ́ kɛ̀, mɛ́ yã kɛ̀ eé mↄ́ beee gbɛraa ↄdↄannɛ.

² Gwe gↄ̃ↄ Luda Nini mↄ̀ma, ben ma kíblekita è ludambɛ gwe, gbɛ̃kee vɛ̃ɛa.

³ Gbɛ̃ kɛ̀ vɛ̃ɛna pì e tɛ́ kɛɛ lán gbɛ̀ bɛ̀ɛdee kɛ̀ wè be dayamↄ bà kesↄ̃ kaanɛlia. Ludambɛfɛ̃ɛdaa liga kìta pìzi, à í dɛ lán lá'i taka bà lán ɛmɛradi bà.

⁴ Kíblekita mɛ̀n baro awɛɛsiigↄ̃ↄnↄↄ ligazi, gbɛ̃nsi gↄ̃ↄn baro awɛɛsiigↄ̃ↄnↄↄ vɛ̃ɛvɛ̃ɛna báa pìnↄa. Aↄ̃ pↄ́ puraa dadana, aↄ̃ vura fùra kukuna.

⁵ Lou e pii èe bↄↄ kìta pì kiia, èe pũtãa èe vĩi. Fitia nana kìta pì aɛ mɛ̀n swɛɛplaa, aↄ̃mbe Luda Nini mɛ̀n swɛɛplaaanↄ ũ.

⁶ Dígi kú kìta pì aɛ lán ísiaa bà, èe tɛ́ kɛɛ lán gbɛ̀digi bà. Pↄ́ bɛ̃ɛ mɛ̀n siigↄ̃ↄnↄↄ liga kìta pìzi kĩikĩi. Wɛ́ɛ fĩfĩḿma kpɛɛ kↄ̃n aɛo.

⁷ Pↄ́ bɛ̃ɛ pìnↄ káakupↄ dɛ lán músu bà, à plaadee dɛ lán zùswaree bà, à aagↄ̃dee uu dɛ lán gbɛ̃ntee uu bà, à siigↄ̃dee dɛ lán kúu kɛ̀ èe vĩaa bà.

⁸ Pↄ́ bɛ̃ɛ mɛ̀n siigↄ̃ↄ pìnↄ baade dɛ̀bɛ vĩ mɛ̀n swɛɛdodo. Wɛ́ɛ fĩfĩ ń dɛ̀bɛ pìnↄa à guu kↄ̃n à kpɛɛo. Fãantɛ̃ kↄ̃n gwãavĩo aↄ̃ègↄ̃ bee yãana sai: Kúadona, kúadona, kúadona, Dii Luda Gbãapingide. Ń kuu yã, ń kuu tia, bensↄ̃ nɛ́ɛ suu.

⁹ Gurↄↄ kɛ̀ pↄ́ bɛ̃ɛ mɛ̀n siigↄ̃ↄ pìnↄ gbɛ̃ kɛ̀ vɛ̃ɛna kìtaa kɛ̀ ègↄ̃ kuu gurↄ píngi pì tↄ́ kpà, aↄ̃ bɛ̀ɛ lìnɛ aↄ̃ à sáabu kpà,

¹⁰ gbɛ̃nsi gↄ̃ↄn baro awɛɛsiigↄ̃ↄ pìnↄ è daɛdaɛ à aɛ wà dↄnzi kɛnɛ, aↄ̃è ń fùra gogo wà káɛ kìta pì aɛ aↄ̃ be:

¹¹ Dii wa Luda, n ka wà n tↄ́ kpá, wà bɛ̀ɛ kↄ̃n gbãaao dↄ̃nnɛ, zaakɛ n pↄ́ píngi kɛ̀, aↄ̃ kɛna kↄ̃n ń kuunao nɛ́ n pↄyezinamɛ.