YAASINƆ 6 - Bokobaru Bible

Fĩa kↄ̃n mɛao kↄ̃n gbɛ̃ntee pãao yã

¹ Ma nɛ́, tó n n gbɛ̃daaa fĩa dì n musu, tó n kpɛ́gaau sɛ̀ gbɛ̃nɛ,

² tó n lɛ́ n ásaru kɛ̀, tó n yã'ona n da yãn,

³ ǹ kɛ lán kɛ̀ bà, ma nɛ́, ǹ lɛ́ bↄ yã pìn, zaakɛ n na n gbɛ̃daaa ↄzĩ. Ǹ gá ǹgↄ̃ zɛzɛ n gbɛ̃daaa pìzi, ǹ agbaa kpánɛ.

⁴ Ǹton tó ii gɛ̃ n wɛ́ɛnlo, ǹton tó n wɛ́ɛbaa tìisi kũro,

⁵ ǹ n zĩnda sía lán gãa è ń kɛ̃ nà, lán bãa è bↄ bàkpakpari ↄzĩ nà.

⁶ Mɛade, ǹ gá zɛ̀nↄ gwa, ǹ a yãkɛna tàasi kɛ, nɛ́ ↄ̃ndↄ̃ kũ.

⁷ À dↄn'aɛdee vĩro, à gbɛ̃nsi ke dii vĩro.

⁸ È kũsãɛ zi di kwɛɛmɛ, è a pↄ́blee kakↄ̃a pↄ́kɛ̃gurↄ.

⁹ Mɛade, nɛ́gↄ̃ daɛna ai bↄrɛmɛ? Bↄrɛn nɛ́ vu iin?

¹⁰ Nɛɛ̀ kámma bo féte nɛɛ̀ ii o féte, nɛɛ̀ daɛ féte ↄkpana n kùsɛa.

¹¹ Takaasi é gɛ̃nzi lán kpãi wɛ́ɛdewɛ bà, pↄ́kɛ̃sãmmana é summa lán gbɛ̃ kɛ̀ gↄ̃kɛbↄ kũna bà.

¹² Gbɛ̃ntee pãa nɛ́ gbɛ̃ zaaamɛ, ègↄ̃ lili oo kↄ̃n ɛgɛɛo da à lɛ́n.

¹³ È yã o kↄ̃n wɛ́ɛo kↄ̃n ↄↄo, è sèeda kɛńnɛ kↄ̃n gbáo.

¹⁴ Mↄnafiki bé à à nↄ̀sɛ pana, yã zaa wàarin ègↄ̃ paa gurↄ píngi.

¹⁵ Beee yãnzin mↄ́nzi é mↄ́a lɛ́zana sai, kaatɛna é gɛ̃zi kãndo, eégↄ̃ fɛɛna vĩro.

¹⁶ Yã mɛ̀n swɛɛdoo kuu kɛ̀ Dii zàn, à kà se swɛɛplaa kɛ̀ dɛnɛ tɛ̃̀ ũ.

¹⁷ Wada, ɛgɛtona, taarisaide dɛna,

¹⁸ yã pãsĩ wàaripana, wãna zaaazi,

¹⁹ sèeda ɛgɛtona kↄ̃n danɛnↄ dↄkↄ̃anao.

Làakarikɛna zinakɛnazi

²⁰ Ma nɛ́, ǹgↄ̃ n de yãdiɛnanↄ kũna, ǹton pã kpá n da yãdannɛziro.

²¹ Ǹgↄ̃ kũna n swɛ̃̀ guu, ǹgↄ̃ dana kã̀mbɛɛ ũ.

²² Eé dↄnnɛ aɛ n táa'ona guu, eé n dãkpa n daɛna guu. Tó n vu, eé lɛ́ damma.

²³ Zaakɛ yãdiɛna pìnↄ nɛ́ fitiamɛ, yãdannɛna pì nɛ́ gupuraamɛ, lɛ́damma kↄ̃n totonao nɛ́ zɛ́ wɛ̃̀ndideemɛ.

²⁴ Eé n sí nↄgbɛ̃ zaaa ↄzĩ, eé n bↄ gbɛ̃ pãnde nↄ yãnnanna'onan.

²⁵ Ǹton à maakɛɛ ni dɛro, ǹton tó à wɛ́ɛkpãntɛ̃daɛnzina n kũro.

²⁶ Kaarua è tó ń gↄ̃ kori, gbɛ̃ pãnde nↄↄ sↄ̃ è ń wɛ̃̀ndi bɛ̀ɛdee kaatɛ.

²⁷ Tó gbɛ̃ tɛ́ sɛ̀ à dà a pↄtɛ, à pↄ́kãsãa é gí tɛ́ kũziↄ́?

²⁸ Tó gbɛ̃ kɛ̀sɛ pɛ̀ɛ tɛ́yↄ̃a, eé gí à kpataziↄ́?

²⁹ Lɛn à dɛ lɛ kↄ̃n gbɛ̃ kɛ̀ gɛ̃̀ a gbɛ̃daaa nↄↄzio, zaakɛ tó à ↄ kɛ̀a, eé bↄ pãro.

³⁰ Tó nↄaa e gbɛ̃ dɛɛ, tó à kpãi ò, wè à yã da pãↄ́?

³¹ Tó wà à kũ̀, eé à fĩa bo lɛo swɛɛplaa, eé pↄ́ kɛ̀ à vĩ a uan kpá píngi.

³² Zinakɛri laasuu vĩro, gbɛ̃ kɛ̀ è beee kɛɛ è a zĩnda kaatɛmɛ.

³³ Gbɛ̃na maa kↄ̃n kpɛbↄnaon à baka ũ, à tↄ́ zaaa é kɛ̃aro.

³⁴ Zaakɛ gↄ̃gbɛ̃ nↄ̀sɛgↄ̃aanↄ bé eé su pↄfɛ̃o, tó èe gɛ̃ɛ booḿma, eé ń wɛ̃nda gwaro.

³⁵ Eé agbaakpabↄ ke síro, baa tó à gba bíta dànɛ, eé weziro.

Lean sinn:

Ceanglaichean taic

Sanasan