YAASINƆ 5 - Bokobaru Bible

Làakarikɛna kaaruazi

¹ Ma nɛ́, ǹ làakari dↄ ma dↄ̃naa, ǹ swã kpá ǹ ma ↄ̃ndↄ̃ yã ma,

² lɛ ǹgↄ̃ kú n làakaria, dↄ̃na yã égↄ̃ kú n lɛ́n.

³ Kaarua yã'ona ègↄ̃ nna lán zↄ́ bàmɛ, è ń gáɛ kↄ̃n lɛ́nnaao,

⁴ mↄde zãazãa è kɛńnɛ kyã̀kyã lán sɛwɛɛ bà, à lɛ́ nna lán fɛ̃ɛda kpaplaplaaa bà.

⁵ À zɛ́ è mì pɛ́ńyo gaaa, è si kↄ̃n gbɛ̃ kɛ̀ aↄ̃ↄ tɛ́zinↄo gɛ̀wãan.

⁶ È laasuu lɛ́ wɛ̃̀ndi zɛ́aro, à dↄ̃ a kɛ̃ zɛ́ pìaro.

⁷ Ma nɛ́, ǹ swã kpá ma yãzi sa, ǹton kpɛɛ li ma lɛ́dammanɛro.

⁸ Ǹ pã nↄgbɛ̃ beee takanɛ zã̀azã, ǹton sↄ̃ à bɛ gãalɛziro,

⁹ lɛ n bɛ̀ɛ tón gↄ̃ gbɛ̃ pãndenↄnɛro, lɛ ǹton n wɛ̃̀ndi kpá gbɛ̃ pãsĩnↄaro,

¹⁰ lɛ n auzikinↄ tón gↄ̃ danↄnɛro, lɛ n zĩ àre tón gↄ̃ ua pãnde deenↄnɛro.

¹¹ Nɛ́gↄ̃ mboo n gurↄ yãanaa, nɛ́ yãyã n gbãaa é yãa.

¹² Nɛ́ be: Ma gi lɛ́dammazi fá! Ma dↄkɛna totonao bé à tò.

¹³ Mɛ́ɛ lɛ́dammarinↄ yã'onnɛna maro, mɛ́ɛ swã kpá ma yãdannɛrinↄziro.

¹⁴ Féte bé à gↄ̃̀ kɛ̀ mɛ́ kpɛ bↄ anduna píngi wáa.

¹⁵ Ǹ n zĩnda orozã í mi, ǹ zɛ kↄ̃n n zĩnda lↄ̀gↄ'io.

¹⁶ N í kwɛɛna bàazi maaro. N í fãna gãalɛ zɛ́ vĩro.

¹⁷ Ǹ tó àgↄ̃ dɛ n naↄ̃ pↄ́ ũ ado, àtongↄ̃ dɛ gbɛ̃ pãnde pↄ́ ũro.

¹⁸ Luda aubarika da n íbↄkii pìn, ǹ pↄnnaa kɛ kↄ̃n n gↄ̃kparɛkɛgurↄ nↄↄo.

¹⁹ N gã yenzidee! N gbikyao maaa! Ǹ tó à bↄ̃̀ndagana gↄ̃ kɛɛnnɛ nna, ǹ a yenzi ni dɛ lán guu e dↄↄ nà.

²⁰ Ma nɛ́, bↄ́yãnzin nɛ́ kaarua ni dɛzi? Bↄ́yãnzin nɛ́ bↄ̃̀nda gá kↄ̃n gbɛ̃ pãnde nↄↄozi?

²¹ Gbɛ̃ntee yãkɛna kee utɛna Diinɛro, ègↄ̃ zɛ́ kɛ̀ à sɛ̀ dↄ̃ píngi.

²² Zaakɛri taari è bà kpákpanɛ, à durun è à kũ.

²³ À lɛ́dammamasai é a kpá gaazi, à yↄ̃nkↄkɛ bíta é à sãsã.