YAASINƆ 21 - Bokobaru Bible

¹ Kína nↄ̀sɛ kú Dii ↄzĩ lán ízɛ bàmɛ, è à liɛ guu kɛ̀ à yezin.

² Baade ègↄ̃ ee a yãkɛna maa, mↄde Dii bé ègↄ̃ ń nↄ̀sɛ dↄ̃.

³ Maakɛna kↄ̃n yãkɛna a zɛ́ao è kɛ Diinɛ dɛ sa'onala.

⁴ Zĩndasɛna lezĩ kↄ̃n ĩadãao è zaakɛrinↄ durun bↄ gupuraaamɛ.

⁵ Aĩadee laasuu è à ká nnamanaa, nↄ̀sɛwãadee è gɛ̃ takaasin.

⁶ Auziki kɛ̀ gbɛ̃ è ɛgɛtona guu é gɛ̃ ĩala à ń kpá gaazi.

⁷ Zaakɛrinↄ pãsĩkɛna é táńyo, zaakɛ aↄ̃è we wà yãzɛdee kɛro.

⁸ Taaride yãkɛna ègↄ̃ dↄ̀rↄ vĩro, taarisaide yãkɛna ègↄ̃ wásawasamɛ.

⁹ Ina kpɛ́ làasin maa dɛ kuuna kpɛ́n lɛdo kↄ̃n nↄ swèedeeola.

¹⁰ Zaakɛri swɛ̃̀ ègↄ̃ kú à zaaaamɛ, è a gbɛ̃daaa wɛ̃nda gwaro.

¹¹ Tó wà wɛ́ɛ tã̀ faboria, yↄ̃nkↄↄ è ↄ̃ndↄ̃ kũmɛ, tó wà kpã̀kɛ̃ ↄ̃ndↄ̃deezi, à dↄ̃na è kaaramɛ.

¹² Ludaa maa, è zaakɛri bɛɛ tàasi kɛ, è zaakɛrinↄ ká kaatɛnan.

¹³ Gbɛ̃ kɛ̀ èe swã kpá wɛ̃ndade wiiiziro, àpi é wii pɛ́ se, gbɛ̃ke é weàlaro.

¹⁴ Gbadana asii guu è pↄfɛ̃ kpáɛ, ↄdↄnkpɛɛgbaa sↄtↄna utan è pↄfɛ̃ mì dɛ.

¹⁵ Yãgↄ̃gↄ̃na a zɛ́a è gbɛ̃ maaa pↄↄ kɛ nna, mↄde è vĩa dada zaakɛrizi.

¹⁶ Gbɛ̃ kɛ̀ pã̀ làakari zɛ́nɛ é si gɛ̀wãadeenↄ tɛ́mɛ.

¹⁷ Gbɛ̃ kɛ̀ nↄ̀sɛ kpà pↄnnakɛnaa é gↄ̃ takaasin, gbɛ̃ kɛ̀ ye wɛ̃ɛzi kↄ̃n nↄ́sio é kɛ auzikidee ũro.

¹⁸ Zaakɛrinↄn gbɛ̃ maaanↄ tↄↄbakpabↄ ũ, Luda è wɛ́ɛ tã náanɛsaideenↄa nↄ̀sɛpuradeenↄ gɛ̃ɛ ũ.

¹⁹ Kuuna gbáan maa dɛ vɛ̃ɛna kↄ̃n nↄ swèede pɛ̃tɛ̃deeola.

²⁰ Pↄ́ble maaa kↄ̃n nↄ́sio ègↄ̃ kaɛna ↄ̃ndↄ̃dee bɛ, mↄde yↄ̃nkↄↄ è a pↄ́ mↄ́mↄ gↄ̃ↄmɛ.

²¹ Gbɛ̃ kɛ̀ è yãzɛdee kↄ̃n gbɛ̃kɛɛo wɛtɛ è wɛ̃̀ndi kↄ̃n yã nnaao kↄ̃n bɛ̀ɛo e.

²² Ɔ̃ndↄ̃dee è lɛ́ɛ gↄ̃sa gbãaanↄ wɛ́tɛa, è zɛkigbãaa kɛ̀ aↄ̃ↄe à náanɛ kɛɛ gboro.

²³ Gbɛ̃ kɛ̀ à a lɛ́ fↄ̃̀ bensↄ̃ à a nɛ́nɛ kũ̀, àmbe è a zĩnda bↄ yãn.

²⁴ Gbɛ̃ kɛ̀ wada kↄ̃n ĩadãnao vĩ tↄ́n fabori, è yã kɛ kↄ̃n zaza bítaomɛ.

²⁵ Mɛadee pↄyezi è à kpá gaazi, kɛ̀ à ↄ gbàrɛ zĩizi yãnzi.

²⁶ Ègↄ̃ kú pↄ́nidɛnan gurↄ sãnda píngi, gbɛ̃ maaa sↄ̃ è gba da nↄ̀sɛo do.

²⁷ Gbɛ̃ zaaa sa'ona Diia nɛ́ tɛ̃̀mɛ, atɛ̃nsa tó èe oo kↄ̃n mↄnafikio.

²⁸ Sèeda ɛgɛdee é gɛ̃ zɛ́a, gbɛ̃ kɛ̀ à tɛ̀ à yãzi é kaatɛ ai gurↄ píngi.

²⁹ Gbɛ̃ zaaa wɛ́ɛ ègↄ̃ pãsĩmɛ, nↄ̀sɛpurade wɛ́ɛ ègↄ̃ tɛ́ a yãkɛnazi.

³⁰ Ɔ̃ndↄ̃ↄ ke wɛ́ɛzɛ̃ɛ ke lɛ́damma, aↄ̃ ke é fↄ̃ à Dii furo.

³¹ Wè sↄ̃ soru kɛ zĩ̀ yãnzimɛ, mↄde Dii bé à zĩ̀blena yã dↄ̃.