SAAMUNƆ 92 - Bokobaru Bible

Luda sáabukpana

Kámmabogurↄ lɛ̀.

¹ À maa wà n sáabu kpá, Dii, wà lɛ̀ sí wà n tↄ́ bↄ, Luda Musude,

² wà n gbɛ̃kɛɛ tↄ̃kɛ̃ kↄngↄ, wà n náanɛkɛyã o gwãavĩ,

³ wà n táaki lɛ́ kↄ̃n mↄrↄo kↄ̃n kuntigi ↄ́ nnaao.

⁴ N yãkɛnanↄ è ma pↄↄ kɛ nna, Dii, mɛɛ̀ guda dↄ n ↄzĩkɛnanↄa.

⁵ Dii, n yãkɛnanↄ bíta maamaa, n laasuunↄↄ zã̀ à kɛ̀ bíta.

⁶ Yↄ̃nkↄↄ yã pì dↄ̃ro, mìsaidee é fↄ̃ à dↄ̀rↄ dↄ̃ro.

⁷ Baa tó gbɛ̃ zaaanↄ fɛ̀ɛ wà gbã̀ lán sɛ̃̀ bà bensↄ̃ zaakɛrinↄ kaarana è ń píngi, aↄ̃ ziaa nɛ́ kaatɛna yãanasaimɛ.

⁸ Mmↄn sↄ̃ Dii, nɛɛ̀gↄ̃ kú musu gurↄ píngi.

⁹ Ǹ gwa, n ibɛɛnↄↄ e yãaa, zaakɛrinↄↄ e fãakↄ̃a ń píngi.

¹⁰ N ma gba gbãaa lán zùsɛ̃tɛ bà, n nↄ́si maaa kù ma mìa.

¹¹ Ma wɛ́ɛ sì ma wɛ̀tɛrinↄ lɛɛnalɛ, ma swã ma ibɛɛ zaaanↄ wiii mà dↄ.

¹² Gbɛ̃ maaanↄ é gbã lán damina línↄ bà, aↄ̃é kɛ bíta lán Lɛbanↄ sida línↄ bà.

¹³ Aↄ̃ pɛna Dii bɛɛ guu, aↄ̃é gbã wa Luda ua.

¹⁴ Baa kↄ̃n ń zikũkɛɛo aↄ̃égↄ̃ nɛ́ iimɛ, aↄ̃ lá égↄ̃ tɛ́ kɛɛ sí plɛ̀plɛ.

¹⁵ Aↄ̃é be, Dii maa, àmbe wa gbɛ̀si ũ, zaa kee kú à guuro.