SAAMUNƆ 9 - Bokobaru Bible

Luda sáabukpana kɛ̀ è yã kɛkɛ gbɛ̃nↄnɛ yãnzi
Dauda lɛ̀.

¹ Dii, mɛ́ n sáabu kpá kↄ̃n nↄ̀sɛo do, mɛ́ n yãbↄnsaɛkɛnanↄ kpàakpa kɛńnɛ.

² Mɛ́ pↄnnaa kɛ mà ĩa dã n yã musu, Luda Musude, mɛ́ n tↄ́ kpá kↄ̃n lɛ̀sinao.

³ Ma ibɛɛnↄ è kpɛɛ li, aↄ̃è lɛɛ wà gaga n aɛ.

⁴ Zaakɛ n zɛmao n yã nnaa kpàma, vɛ̃ɛna n tintia n yã gↄ̃̀gↄ̃ a zɛ́a.

⁵ N kpãkɛ̃ boriinↄzi, n gbɛ̃ zaaanↄ kàatɛ n ń tↄ́ dɛ̀dɛ míↄmiↄ.

⁶ N mↄ́nzi kɛ̀ è yãaroo kpà ma zangurinↄzi, n ń wɛ́tɛnↄ gbòro, aↄ̃ yã dↄ gbɛ̃ken dↄro.

⁷ Dii è kí ble gurↄ píngi, à a kpata dìɛ yãkpaɛkɛna yãnzi.

⁸ Eé yãkpaɛ kɛ kↄ̃n anduna gbɛ̃nↄ súusu, eé kí ble boriinↄa a zɛ́a.

⁹ Diin utɛkii ũ gbɛ̃ kɛ̀ wèe gbãaa mↄↄńnɛnↄnɛ, à dɛńnɛ aafia'ekii ũ nawɛ̃akɛgurↄ.

¹⁰ Dii, gbɛ̃ kɛ̀ aↄ̃ↄ n tↄ́ dↄ̃ↄnↄↄ n náanɛ vĩ, nɛɛ̀ n kii wɛ̀tɛrinↄ zĩnnaro.

¹¹ À lɛ̀ sí Diinɛ, èe kí blee zaa Zayↄn, à à yãkɛnanↄ kpàakpa kɛ bori pínginɛ.

¹² Zaakɛ è gɛ̃ɛ bo gbɛ̃dɛria, yã è sãnlo, è takaasideenↄ wiilɛna yã da.

¹³ Dii, ǹ gwa lán ma ibɛɛnↄↄ e ĩa daama nà, ǹ ma wɛ̃nda gwa ǹ ma bↄ gaa lɛ́zĩ,

¹⁴ lɛ mà n tↄ́ kpá Zayↄn bĩilɛa, mà pↄnnaa kɛ kɛ̀ n ma mì sì yãnzi.

¹⁵ Boriinↄ sì wɛ̀ɛ kɛ̀ aↄ̃ↄ yↄ̃̀n, aↄ̃ gbá zù bà kɛ̀ aↄ̃ↄ kpàkpa guu.

¹⁶ Wà Dii dↄ̃ kↄ̃n yãkpaɛkɛna a zɛ́ao, è tó gbɛ̃ zaaa yãkɛna wí à musu.

¹⁷ Gbɛ̃ zaaanↄ è tá gɛ̀wãan, borii kɛ̀ aↄ̃è Luda yã daroo pìnↄ.

¹⁸ Wɛ̃ndadeenↄ yã é sãn zikiro, takaasidee sↄ̃ wɛ́ɛdↄzina yãana vĩro.

¹⁹ Ǹ fɛɛ Dii, ǹton tó gbɛ̃ntee n gã̀ fĩro, ǹ bori píngi kakↄ̃a ǹ yãkpaɛ kɛńyo.

²⁰ Dii, ǹ tó vĩa boriinↄ kũ, lɛ aↄ̃ e wà dↄ̃ kɛ̀ gbɛ̃nteenↄn ń ũ.

Lean sinn:

Ceanglaichean taic

Sanasan