SAAMUNƆ 88 - Bokobaru Bible

Kuuna gaa lɛ́zĩ aduakɛna

Ɛzɛra bori Emani lɛ̀.

¹ Dii Luda ma Mìsiri, mɛ́ɛ wii pɛɛnzi fãantɛ̃ kↄ̃n gwãavĩo.

² Ǹ tó ma aduakɛna ká n kiia, ǹ swã kpá ma wiipɛnazi.

³ Zaakɛ yã'ↄ̃amma ma nↄ̀sɛ pà, ma wɛ̃̀ndi kú gaa lɛ́zĩ.

⁴ Wà ma da gbɛ̃ kɛ̀ aↄ̃ↄe sii gɛ̀wãannↄ tɛ́, ma gↄ̃ gbãasaidee ũ.

⁵ Wà pã kpàmazi wà ma da gɛ̀nↄ tɛ́ lán gbɛ̃ kɛ̀ aↄ̃ↄ daɛna miran sↄ̀rↄrↄnↄ bà, lán gbɛ̃ kɛ̀ aↄ̃ yã dↄngu dↄro aↄ̃ bà kúnyo dↄroonↄ bà.

⁶ N ma zu wɛ̀ɛ zã̀n ai tↄↄtɛ tú kokotɛ̃wɛɛ gusiaan.

⁷ N pↄfɛ̃ tↄ̃̀ma, à ísↄ̃ dàmala.

⁸ Ń tò ma gbɛ̃nↄ ma zĩnna, ń tò aↄ̃ↄ ye ma kãziro. Wà ma kagura kɛ̀, bↄkii kuuro,

⁹ nawɛ̃a ma wɛ́ɛ sìsi. Mɛ́ɛ n sisii zaa kↄngↄ ai uusiɛ, ma ↄↄnↄↄ dↄnzi.

¹⁰ Gɛ̀nↄn nɛɛ̀ yãbↄnsaɛ kɛńnɛↄ́? Gɛ̀wãadeenↄ bé wè fɛɛ wà n sáabu kpáↄ́?

¹¹ Wè n gbɛ̃kɛɛ tↄ̃kɛ̃ mira guun yↄ́? Wè n náanɛkɛyã o gɛ̀wãann yↄ́?

¹² Wà n dabuyãnↄ dↄ̃ gusiaa guun yↄ́? N maakɛnanↄ dↄ̃na kú yãsãngukii guun yↄ́?

¹³ Dii, mɛ́ɛ wii pɛɛnzi, ma aduakɛna kↄngↄ è ká n kiia.

¹⁴ Bↄ́yãnzin nɛ́ɛ giimazizi, Dii? À kɛ̀ dia n mìkpɛɛ zùmɛɛ?

¹⁵ Má kú gaa lɛ́zĩ wɛ̃ndawɛ̃nda zaa ma gↄ̃kparɛkɛgurↄ, n yã pãsĩnↄ tↄ̃̀ma, ma gↄ̃ sã̀ii.

¹⁶ N pↄfɛ̃namazii dàmala, n vĩapↄnↄ ma kaatɛ.

¹⁷ Aↄ̃ dàmala lán í bà zaa kↄngↄ ai uusiɛ, aↄ̃ lìgamazi mámmam.

¹⁸ Ń tò ma gbɛ̃nↄ kↄ̃n ma gbɛ̃nnanↄ ma zĩnna, gusiaa bé à gↄ̃̀ ma kpàasi ũ.