SAAMUNƆ 86 - Bokobaru Bible

Dↄnlɛ wɛ́ɛkɛna Ludaa

Dauda lɛ̀.

¹ Dii, ǹ swã kpá ma yãzi ǹ wemala, zaakɛ takaaside wɛ̃ndadeen ma ũ.

² Ǹ ma wɛ̃̀ndi dãkpa, zaakɛ má a zĩnda kpàmma. Ǹ mamↄma n zↄ̀bleri mì sí, zaakɛ mɛ́ɛ n náanɛ kɛɛ. Ḿbe ma Luda ũ.

³ Ǹ sùu kɛmao, Dii, zaakɛ mɛɛ̀gↄ̃ n sisii kↄngↄ kↄ̃n uusiɛo.

⁴ Ǹ mamↄma n zↄ̀bleri pↄↄ kɛ nna, zaakɛ ma làakari tà n kiia, Dii.

⁵ Ń maa bensↄ̃ ń sùu vĩ, Dii, n gbɛ̃kɛ bíta n sìsirinↄnɛ.

⁶ Dii, ǹ swã kpá ma wɛ́ɛkɛnazi, ǹ làakari dↄ ma wɛ̃nda wiiia.

⁷ Mɛ́ n sísi ma nawɛ̃akɛgurↄↄ zĩ, zaakɛ nɛɛ̀ wemala.

⁸ Tãa ke é sí lɛ́kↄ̃zinyoro, Dii, gbɛ̃kee è fↄ̃ à n kɛna kɛro.

⁹ Borii kɛ̀ ń kɛ̀nↄ é mↄ́ wà kúɛnnɛ, aↄ̃ n tↄ́ bↄ ń píngi.

¹⁰ Zaakɛ ń bíta bensↄ̃ nɛɛ̀ dabuyãnↄ kɛ, ḿbe Luda ũ ndo.

¹¹ Ǹ n zɛ́ ↄdↄamɛ, Dii, mɛ́gↄ̃ táa oo n yãpuraa guu, ǹ ma laasuu kɛmɛ do, lɛ màgↄ̃ n vĩa vĩ.

¹² Mɛ́ n sáabu kpá kↄ̃n nↄ̀sɛo do, Dii ma Luda, mɛ́gↄ̃ n tↄ́ bↄↄ gurↄ píngi.

¹³ Zaakɛ gbɛ̃kɛɛ kɛ̀ ń kɛ̀mɛɛ bíta, n ma wɛ̃̀ndi bↄ̀ gɛ̀wãa lↄ̀n.

¹⁴ Luda, karambaanideenↄↄ e fɛɛɛmazi, gbɛ̃ pãsĩnↄↄ e ma wɛɛ, aↄ̃è n yã daro.

¹⁵ N Dii, Luda sósobideen n ũ, ń sùu vĩ bensↄ̃ n pↄↄ è fɛ̃ kpaaro, n gbɛ̃kɛ kↄ̃n n náanɛo bíta.

¹⁶ Ǹ aɛ dↄma ǹ ma wɛ̃nda gwa, ǹ n zↄ̀bleri gba gbãaa, ǹ mapi n zↄ̀nↄkpare nɛ́ mì sí.

¹⁷ Ǹ yãmaakɛna gbɛ̀ ↄdↄamɛ lɛ ma zangurinↄ e, wí ń kũ, zaakɛ Dii, n dↄmalɛ, n ma làakari kpàɛmɛ.