SAAMUNƆ 83 - Bokobaru Bible

Ibɛɛnↄ kpana Ludaa

Asafa lɛ̀.

¹ Luda, ǹtongↄ̃ yĩtɛnaro, n lɛ́ tóngↄ̃ nakↄ̃anaro, ǹton zɛ sitiigiro, Luda.

² Ǹ n ibɛɛnↄ gwa lán aↄ̃ fɛ̀ɛ wà zɛ̀ nà, n zangurinↄↄ e ń mì zuzuu.

³ Aↄ̃ↄe ↄ̃ndↄ̃ↄ kɛɛ n gbɛ̃nↄzi, aↄ̃ↄe lɛ́ kpaakↄ̃sↄ̃ n gbɛ̃ yenzideenↄzi.

⁴ Aↄ̃ↄe bee: À mↄ́ wà ń borii bↄ, lɛ aↄ̃ tↄ́ Isaraili tóngↄ̃ dↄ gbɛ̃ken dↄro.

⁵ Aↄ̃ lɛ́ kpàkↄ̃sↄ̃, aↄ̃ yã kↄ̃sɛ̀, aↄ̃ lɛdolɛ kɛ̀ kↄ̃o wà fɛɛnzi.

⁶ Ɛdↄmunↄ kↄ̃n Sumaila boriinↄ kↄ̃n Mↄabunↄ kↄ̃n Agyara boriinↄ

⁷ kↄ̃n Gebalideenↄ kↄ̃n Amↄninↄ kↄ̃n Amalɛkinↄ kↄ̃n Filisitininↄ kↄ̃n Tayadeenↄ.

⁸ Baa se Asirianↄ nàḿma dↄ, lɛ aↄ̃ ↄ da Lutu boriinↄa.

⁹ Ǹ kɛńnɛ lán ń kɛ̀ Midiãnↄnɛ nà, lán ń kɛ̀ Sisera kↄ̃n Yabĩonɛ nà Kisↄ̃zi.

¹⁰ N ń kɛ́ dúgudugu Ɛndↄ, ben aↄ̃ gↄ̃̀ kaɛna tↄↄtɛ lán busa bà.

¹¹ Ǹ kɛ ń wɛ̃ɛnɛnↄnɛ lán wà kɛ̀ Orɛbu kↄ̃n Zeebuonɛ nà. Ǹ kɛ ń kínɛnↄnɛ lán wà kɛ̀ Zɛba kↄ̃n Zalamunaonɛ nà.

¹² Aↄ̃pinↄ bé wà bè yã, wà Luda sãdãkii sɛ́ ń pↄ́ ũ.

¹³ Ma Luda, ǹ tó aↄ̃ gↄ̃ lán ĩampuu sɛ̃̀ bà lán ése ũkã kɛ̀ ĩa e sɛ́ɛɛ bà.

¹⁴ Lán dàko è tɛ́ kũ nà, kesↄ̃ lán tɛ́ è kpiiinↄ ble nà,

¹⁵ ǹ pɛ́ɛńzi kↄ̃n n zàga'ĩao, ǹ tó n ĩa pãsĩ swɛ̃̀ kɛ̃ńgu.

¹⁶ Ǹ tó wí gɛ̃ ń wɛ́ɛn, lɛ aↄ̃ↄ n gbãaa dↄ̃ Dii.

¹⁷ Wí égↄ̃ ń kũu gurↄ píngi kↄ̃n bídio, aↄ̃é bↄru kpɛɛ wà kaatɛ.

¹⁸ Ǹ tó aↄ̃gↄ̃ dↄ̃ kɛ̀ n tↄ́n Dii, ḿbe Luda Musude ũ anduna guu píngi.