SAAMUNƆ 81 - Bokobaru Bible

Isarailinↄ zĩbaa lɛ̀
Asafa lɛ̀.

¹ À guda dↄ Luda wa gbãaaa, à pↄnna wii pɛ́ Yakubu boriinↄ Ludaa.

² À lɛ̀ dↄ à bata lɛ́ kↄ̃n mↄrↄ'ↄ nnaao kↄ̃n kuntigio.

³ À kuu pɛ́ mↄ dufu bↄnao, à pɛ́ tó mↄↄ ↄzi kɛ̀ wa zĩbaagurↄ,

⁴ zaakɛ à dɛ doka ũ Isarailinↄnɛmɛ. yã kɛ̀ Yakubu boriinↄ Ludaa dìɛn gwe.

⁵ À yã pì dà Yusufu boriinↄnɛ gurↄↄ kɛ̀ à vĩ̀ Igipiti bùsula. Aↄ̃ kòto kɛ̀ wà dↄ̃roo mà à bè:

⁶ Ma asoo gò a gã̀n, ma a ↄↄ bↄ̀ɛ ɛ̃ɛbona zĩin.

⁷ A wii pɛ̀mazi nawɛ̃akɛgurↄ, ben ma a bↄ, ma weala zaa louvĩnan, ma a lɛ ma a gwa zaa Mɛriba í kiia.

⁸ À swã kpá ma gbɛ̃nↄ, mɛ́ lɛ́ daawa, amↄa Isarailinↄ, tó é ma yã ma dé!

⁹ Àtongↄ̃ bori zĩ̀tↄnↄ tãa vĩ a tɛ́ro, àton kúɛ dii pãndenɛro.

¹⁰ Mámbe Dii a Luda ũ, ma a bↄɛ Igipiti. À a lɛ́ wɛ̃, mɛ́ tó àgↄ̃ kãna.

¹¹ Mↄde Isarailinↄ gì ma yã mazi, ma gbɛ̃ pìnↄↄ e mì siɛmɛro.

¹² Ben ma ń tó kↄ̃n ń swãgbãakɛɛo, aↄ̃ↄ tɛ́ ń zĩnda pↄyezizi.

¹³ Tó wà be Isarailinↄ é ma yã ma, tó ma gbɛ̃nↄↄ tɛ́ ma yãzi,

¹⁴ lɛ mɛ́ ń ibɛɛnↄ sↄ̃ɛ gↄ̃ↄgↄ̃ↄ, mɛ́ ↄ sↄ̃ ń zangurinↄzi.

¹⁵ Ma zangurinↄ é na ń sàsaa ma aɛ, aↄ̃ wɛ́ɛtãmmana égↄ̃ yãana vĩro.

¹⁶ Mɛ́ gbasa mà a gwa kↄ̃n pↄ́wɛɛ maaao, mɛ́ ɛara mà gbɛ̀ zↄ́'i kpáawa à mↄ́awa.

Lean sinn:

Ceanglaichean taic

Sanasan