SAAMUNƆ 80 - Bokobaru Bible

Isarailinↄ suna ń gwena ziia aduakɛna

Asafa lɛ̀.

¹ Ǹ swã kpá, Isarailinↄ Dↄn'aɛde, mmↄn kɛ̀ nɛɛ̀ Yusufu boriinↄ dã lán sãa bà. Ǹ bↄ ǹ mↄ́, mmↄn kɛ̀ ń vɛ̃ɛna kɛrubunↄ dagura,

² ǹ dↄ Ɛflaimu boriinↄnɛ aɛ kↄ̃n Bɛyãmi boriinↄ kↄ̃n Manase boriinↄ. Ǹ fɛɛ kↄ̃n n gbãaao, ǹ mↄ́ ǹ wa mì sí!

³ Luda, ǹ tó wà ɛara wà su wa gwena ziin, ǹ uu werewa, ǹ wa mì sí.

⁴ Dii Luda Zĩ̀kpɛde, nɛ́ fɛ̃ ǹ gí n gbɛ̃nↄ aduakɛna sízi ai bↄrɛmɛ?

⁵ N wɛ́ɛ'i dↄ̀ńnɛ ń pↄ́mina ũ, n ń wɛ́ɛ'i yↄ̃̀ńnɛ à pↄ́ pà, aↄ̃ↄ mì.

⁶ Ń tò wa gↄ̃ fabona pↄ́ ũ wa saɛdeenↄnɛ, wa ibɛɛnↄↄ e wa lalandi kɛɛ.

⁷ Luda Zĩ̀kpɛde, ǹ tó wà su wa gwena ziia, ǹ uu werewa ǹ wà mì sí.

⁸ N geepi lí wùrɛ Igipiti, n pɛ boriinↄa, ben ń lí pì pɛ̀ aↄ̃ gbɛ̀n.

⁹ N guu kɛ̀kɛnɛ à kãsãa pɛ̀ɛ, ben à ↄ tà à guu sì.

¹⁰ À ↄra dà kpiiinↄla, à gã̀nↄ dɛ sida lí bítanↄla.

¹¹ À ↄ tà à kà ai ísia lɛ́a, à ↄnɛnↄ kà ai Yuflatizi.

¹² Bↄ́yãnzin n à kara gbòrozi lɛ gbɛ̃ kɛ̀ aↄ̃ↄe gɛ̃tɛɛnↄ gↄ̃ ↄ maɛɛ à nɛ́zi?

¹³ Kyàkpanↄ è lɛ́ kázi wà bi, nↄ̀bↄsɛ̃tɛnↄ è mↄ́ wà à lá ble.

¹⁴ N yã nna! Luda Zĩ̀kpɛde, ǹ ɛara ǹ aɛ dↄwa! Zaa musu ǹ wɛ́ɛ kpáɛ ǹ gwa! Ǹ làakari dↄ geepi lí kɛ̀a,

¹⁵ borii kɛ̀ ń pɛ̀ n zĩndaa, nɛ́ kɛ̀ ń sì n pↄ́ ũu pì.

¹⁶ Wà n geepi lí pì zↄ̃̀, wà tɛ́ sↄ̃̀a, n wɛ́ɛ tɛ̃aa pìtiḿma, ben aↄ̃ↄe kaatɛɛ.

¹⁷ Ǹ ↄ kúɛ gbɛ̃ kɛ̀ kú n ↄplaazia, gbɛ̃ntee nɛ́ kɛ̀ ń sɛ̀ n pↄ́ ũu pì,

¹⁸ wé kɛ̃mma dↄro. Ǹ wa kuuna kɛkɛ ǹ kɛwe, wé n sísi.

¹⁹ Dii Luda Zĩ̀kpɛde, ǹ tó wà su wa gwena ziia, ǹ uu werewa ǹ wa mì sí.