SAAMUNƆ 79 - Bokobaru Bible

Wɛ̃nda ↄ́ↄdↄna Yerusalɛmu wina yã musu

Asafa lɛ̀.

¹ Luda, bori pãndenↄ sì n bùsun, aↄ̃ n kpɛ́ kɛ̀ à kú adona yàka, aↄ̃ Yerusalɛmu wìwi wà dàɛ.

² Aↄ̃ n zↄ̀blerinↄ gɛ̀ kpà bãanↄa, aↄ̃ n yãmarinↄ mɛ̀ tò nↄ̀bↄ pãsĩnↄnɛ pↄ́blee ũ.

³ Wà ń aru kwɛ̀ɛ lán í bà Yerusalɛmu bĩikpɛɛ, gbɛ̃ke kuu à ń vĩiro.

⁴ Wa gↄ̃ sↄ̃sↄ̃na pↄ́ ũ wa saɛdeenↄnɛ, fabona pↄ́ ũ gbɛ̃ kɛ̀ aↄ̃ↄ ligawazinↄnɛ.

⁵ Dii, nɛ́gↄ̃ pↄ fɛ̃ɛwazi ai bↄrɛmɛ? N pɛ̃tɛ̃ tɛ́ égↄ̃ kũu gurↄ píngin yↄ́?

⁶ Ǹ pↄfɛ̃ pita borii kɛ̀ aↄ̃ↄ n dↄ̃roonↄa, gbɛ̃ kɛ̀ aↄ̃è n sísiroonↄ bùsunↄa.

⁷ Zaakɛ aↄ̃ Yakubu boriinↄ blè, aↄ̃ ń bùsu dɛ̀.

⁸ Ǹton wa denↄ durunnↄ wí wa musuro. Ǹ wɛ̃nda dↄ̃we kpakpaa, zaakɛ wa busa wa gↄ̃ búgubugu.

⁹ Ǹ dↄwalɛ, Luda wa mìsiri. Ǹ wa mì sí lɛ n tↄ́ bↄ, ǹ wa durunnↄ kɛ̃we n tↄ́ yãnzi.

¹⁰ Bↄ́yãnzin nɛ́ tó bori pãndenↄ wa la wà be: Wa Ludaa kú mámɛee? Ǹ tó bori pãndenↄ gↄ̃ dↄ̃ wa wáa kɛ̀ nɛɛ̀ n zↄ̀blerinↄ dɛdɛna gɛ̃ɛ boḿma.

¹¹ Ǹ tó zĩ̀zↄnↄ ↄ́ↄdↄna gɛ̃ n swãn, ǹ gbɛ̃ kɛ̀ aↄ̃ↄ kú ga lɛ́zĩ pìnↄ bↄ kↄ̃n n gã̀sã gbãaao.

¹² Ǹ lalandi kɛ̀ bori pãnde kɛ̀ ligawazinↄↄ kɛ̀nnɛɛ fĩa boḿma gɛ̃̀n swɛɛplaa, Dii.

¹³ Wamↄwa n gbɛ̃nↄ, n kpàsa sãanↄ, wé gbasa wàgↄ̃ n sáabu kpaa gurↄ píngi, wégↄ̃ n tↄ́ tↄ̃kɛ̃ɛńnɛ ai wa boriia.