SAAMUNƆ 78 - Bokobaru Bible

Lɛ̀ kɛ̀ Isarailinↄ yã wa gbao làakari

Asafa lɛ̀.

¹ Ma gbɛ̃nↄ, à ma yãdannɛna ma, à swã kpá ma yãzi.

² Mɛ́ yã oare kↄ̃n yáasio, mɛ́ yã kɛ̀ utɛna zaa zii bↄkↄ̃tɛ kɛare,

³ yã kɛ̀ wá mà bensↄ̃ wá dↄ̃, yã kɛ̀ wa denↄ tↄ̃kɛ̃̀wee.

⁴ Wé yã pì utɛ wa nɛ́nↄnɛro, wé Dii táakilɛna da wa dionↄnɛ, à gbãaa kↄ̃n yãbↄnsaɛ kɛ̀ à kɛ̀nↄ.

⁵ À yã dìɛ Yakubu boriinↄnɛ, à a doka dà Isarailinↄnɛ, à dìɛ wa dezinↄnɛ kɛ̀ aↄ̃ tó ń nɛ́nↄ gↄ̃ dↄ̃,

⁶ lɛ à gↄ̃ ń borii kɛ̀ aↄ̃ kpɛ́nↄnɛ fɛɛakaarayã ũ, aↄ̃ gbasa wà fɛɛ wà dada ń nɛ́nↄnɛ se,

⁷ lɛ aↄ̃ e wà Luda náanɛ kɛ, à yãkɛnanↄ tón sãńguro, mↄde aↄ̃égↄ̃ à yãdiɛnanↄ kũna.

⁸ Aↄ̃gↄ̃ dɛ lán ń dezinↄ bàro, zaakɛ aↄ̃ swãgbãaa kɛ̀ aↄ̃ gì Luda yãzi, aↄ̃ swɛ̃̀ kú Ludaaro, aↄ̃ yãpuraa vĩnɛro.

⁹ Ɛflaimu boriinↄ nɛ́ kàzurinↄmɛ, ben aↄ̃ bↄ̀ru kpɛɛ zĩ̀ guu.

¹⁰ Aↄ̃ↄe zɛ kↄ̃n Luda bà kuunańyo yãoro, aↄ̃ gì tɛ́ à dokazizi.

¹¹ À yãkɛnanↄ sã̀ńgu kↄ̃n yãbↄnsaɛ kɛ̀ à ↄ̀dↄańnɛnↄ.

¹² À dabuyãnↄ kɛ̀ aↄ̃ dezinↄ wáa Zoã wɛ́tɛ guu, Igipiti bùsun.

¹³ À ísiaa zↄ̃̀kↄ̃rɛ à bikũ̀ńyo, à tò í gↄ̃̀ zɛna lán bĩi bà.

¹⁴ À dↄ̀ńnɛ aɛ tɛ́luguu guu fãantɛ̃, gwãavĩ sↄ̃ kↄ̃n tɛ́ gupuraao.

¹⁵ À gbɛ̀si pàra gbáan, à í kpàḿma bíta lán ísia'i bà.

¹⁶ À tò í bↄ̀ńnɛ gbɛ̀n, à tò í bàa lɛ̀ lán swadaa bà.

¹⁷ Ben aↄ̃ↄ kpɛ́ wèe durun kɛɛnɛ, aↄ̃ gì Luda Musude yã mazi gbáan.

¹⁸ Aↄ̃ Luda yↄ̃̀ wà gwà kↄ̃n nↄ̀sɛplaaao, aↄ̃ ń pↄyezi pↄ́blee gbèkaa.

¹⁹ Aↄ̃ Luda zaa bò wà bè: Luda é fↄ̃ à wa gba pↄ́blee gbáan kɛ̀n yↄ́?

²⁰ Baa kɛ̀ à gbɛ̀ lɛ̀, í bↄ̀ à dàgula, eé fↄ̃ à pↄ́blee ke nↄ̀bↄ kpáwa dↄↄ́?

²¹ Kɛ̀ Dii yã pì mà, à pↄ fɛ̃̀, ben tɛ́ fɛ̀ɛ à dà Yakubu boriinↄla, à pↄfɛ̃ pìta Isarailinↄa.

²² Zaakɛ aↄ̃ↄe Luda yã síro, aↄ̃ↄe à mìsina gbãa náanɛ kɛro.

²³ Baa kↄ̃n beeeo à yã dìɛ bàtumanɛ, à musu zɛ́ wɛ̃̀,

²⁴ ben à mana kwɛ̀ɛńnɛ aↄ̃ↄ blè, à pↄ́blee kɛ̀ bↄ̀ musu kpàḿma.

²⁵ Aↄ̃ malaikanↄ pↄ́blee blè, à kũsãɛ kɛ̀ńnɛ, à gɛ̃̀ ↄla.

²⁶ À tò ĩa gbãaa bↄ̀ ↄfãntɛ̃bↄɛ kpa, à pɛ̀ sↄↄmɛtɛ kpa ĩaa dↄ kↄ̃n a gbãaao,

²⁷ ben à nↄ̀bↄ kwɛ̀ɛńnɛ pari lán lutɛ̃ bà, bãanↄ dàńla lán ísialɛ bùsu'ãatɛ̃ bà.

²⁸ À tò aↄ̃ pìtapita ń bùran, aↄ̃ gↄ̃̀ káɛ ligana ń kpɛ́nↄzi.

²⁹ Luda pↄ́ kɛ̀ aↄ̃ↄe à ni dɛɛnↄ kpàḿma, ben aↄ̃ↄ blè wà kã̀ gíngin.

³⁰ Lɛ à ni kpɛ́ à bↄńgu, gurↄↄ kɛ̀ pↄ́blee pì kpɛ́ da ń lɛ́n,

³¹ Luda pↄfɛ̃ fɛ̀ɛńzi, à Isaraili gↄ̃ gbãaanↄ dɛ̀dɛ, à ń gↄ̃kparɛnↄ lɛ̀ à nɛ̀.

³² Baa kↄ̃n beeeo aↄ̃ↄ kpɛ́ wèe durun kɛɛ, baa kↄ̃n à yãbↄnsaɛkɛnanↄ, aↄ̃ↄe à náanɛ kɛro.

³³ Ben à ń wɛ̃̀ndi kɛ̀ńnɛ pã lán lɛ́'ĩa bà, à tò mↄ́nzi ń lé.

³⁴ Tó à ń gbɛ̃kenↄ dɛ̀dɛ, ben aↄ̃è à kii wɛtɛ, aↄ̃è ɛara wà aɛ dↄa kↄ̃n wãaao.

³⁵ Ben aↄ̃ dↄ̀n sa kɛ̀ Ludan ń gbɛ̀si ũ, Luda Musudemɛ ń mìsiri ũ.

³⁶ Gurↄ mↄ̀a sa aↄ̃è lɛ́ maa, aↄ̃è ɛgɛɛ tonɛ,

³⁷ aↄ̃ swɛ̃̀ kúaro, aↄ̃ à bà kuunańyo yã gbòro.

³⁸ Àpi sↄ̃ ń wɛ̃nda gwà, à ń durun kɛ̃̀ńnɛ, èe ń kaatɛro. Ègↄ̃ a zĩnda pↄfɛ̃ kpaɛɛ baabↄrɛ, è a pɛ̃tɛ̃pitammana ↄzã gba.

³⁹ À ń gbɛ̃nteekɛɛ dↄ̃̀ḿma, kɛ̀ aↄ̃è gɛ̃tɛ suna sai lán ĩa bà.

⁴⁰ Aↄ̃ swãgbãaa kɛ̀nɛ gbáan gɛ̃̀n ũgbangba! Aↄ̃ à pↄↄ yàka sɛ̃̀tɛ gwe à kɛ̀ bíta.

⁴¹ Aↄ̃ Luda yↄ̃̀ wà gwà, aↄ̃ Luda yↄ̃̀ wà gwà, aↄ̃ Isarailinↄ Luda kɛ̀ kú adona pↄↄ fɛ̃̀.

⁴² À iko gbãaa sã̀ńgu, lán à ń sí ń ibɛɛnↄa nà,

⁴³ lán à dabuyãnↄ kɛ̀ Igipiti nà, bensↄ̃ à yãbↄnsaɛnↄ kɛ̀ Zoã bùsun.

⁴⁴ À ń swa ínↄ lì aru ũ, ben aↄ̃ↄe fↄ̃ wà à í mì dↄro.

⁴⁵ À ifĩinↄ kàńgu, aↄ̃ ń soso, kↄ̃n kasoonↄ dↄ, à mↄ́nzi kpàńzi.

⁴⁶ À tò kwaanↄ ń bura pↄ́wɛɛnↄ blè, à sutɛ̃nↄ kà ń burapↄnↄn.

⁴⁷ À tò lougbɛ ń geepi líkpɛnↄ kɛ̀ dúgudugu, zàga'ĩa ń kãkã línↄ ɛ̀'ɛ.

⁴⁸ À ń pↄ́kãdeenↄ kàatɛ kↄ̃n lougbɛo, laa pɛ̀ɛ ń kpàsanↄa.

⁴⁹ À a pↄfɛ̃ bíta bↄ̀bↄńzi, à kɛ̀ńyo ĩi kↄ̃n pↄfɛ̃o kↄ̃n pɛ̃tɛ̃o, à malaika kisiadeenↄ gbàrɛḿma.

⁵⁰ À a pↄfɛ̃ zɛ́ wɛ̃̀, èe gí gaanɛ dↄro, à gagyãa kàńgu.

⁵¹ À Igipiti daudunↄ dɛ̀dɛ ń píngi, Hamu bori nɛ́gↄ̃gbɛ̃ káakunↄ gàga.

⁵² Mↄde à bↄ̀ kↄ̃n a gbɛ̃nↄ lán sãanↄ bà, à dↄ̀ńnɛ aɛ gbáan lán sã kpàsanↄ bà.

⁵³ À tɛ́ńyo làakario kpáɛna vĩa sai, aↄ̃ ibɛɛnↄ sↄ̃, ísiaa dàńla.

⁵⁴ À kàńyo a bùsu lɛ́zi, gusĩsĩdee kɛ̀ à sì kↄ̃n a gbãaao pì.

⁵⁵ À pɛ̀ńnɛ boriinↄa, ben à ń bùsu kpàatɛtɛńnɛ ń pↄ́ ũ, à ua kpàkpa Isaraili boriinↄa.

⁵⁶ Ben aↄ̃ Luda yↄ̃̀ wà gwà aↄ̃ gì à yã mazi, aↄ̃ↄ Luda Musude yãdiɛnanↄ kũnaro.

⁵⁷ Aↄ̃ ɛ̀ara wà bↄ̀ à kpɛɛ lán ń denↄ bà, aↄ̃ náanɛ vĩro lán sá kotina bà.

⁵⁸ Aↄ̃ à pↄↄ fɛ̃̀ kↄ̃n ń sa'okiinↄo, aↄ̃ à nↄ̀sɛgↄ̃aanↄ fɛ̀ɛ kↄ̃n ń tãanↄ.

⁵⁹ Kɛ̀ Ludaa dↄ̃̀ lɛ, ben à pↄ fɛ̃̀, à gì Isarailinↄzi zaazaa.

⁶⁰ À a bisakutaa tò zaa Silo gwe, à bɛɛ kɛ̀ à dↄ̀ gbɛ̃nteenↄ tɛ́ pì.

⁶¹ À tò aↄ̃ wɛdɛrinↄ mↄ̀ wà a àkpati sɛ̀, àmbe à gbãa kↄ̃n à gakuibↄkiio ũ.

⁶² À tò wà a gbɛ̃nↄ dɛ̀dɛ kↄ̃n fɛ̃ɛdaao, à pↄ fɛ̃̀ borii kɛ̀ ń sɛ́zi.

⁶³ Aↄ̃ gↄ̃kparɛnↄ tɛ́ kũ̀ zĩ̀ guu, aↄ̃ nↄkparɛnↄↄ e e wà zãkɛlɛ sì dↄro.

⁶⁴ Wà ń sa'orinↄ dɛ̀dɛ kↄ̃n fɛ̃ɛdaao, aↄ̃ gyaanↄnↄↄ e fↄ̃ wà ↄ́ↄ dↄ̀ro.

⁶⁵ Ben Dii fɛ̀ɛ sa lán i'ori bà, lán gↄ̃sa kɛ̀ vù kↄ̃n wɛ̃'iio bà.

⁶⁶ À ń wɛdɛrinↄ gbɛ̃̀, aↄ̃ bↄ̀ru kpɛɛ, à tò aↄ̃ gↄ̃̀ kↄ̃n wíyão gurↄ píngi.

⁶⁷ À gì Ɛflaimu boriinↄzi, èe Yusufu borii pì sɛ́ dↄro.

⁶⁸ Yuda boriin à sɛ̀ sa kↄ̃n Zayↄn kpiii kɛ̀ à yezio.

⁶⁹ À a kúkii bò musumusu gwe, eégↄ̃ kuu gurↄ píngi lán anduna kaɛna bà.

⁷⁰ Ben à a zↄ̀bleri Dauda sɛ̀, à à bↄ̀ sãkpasan.

⁷¹ À à bↄ̀ sãdãn, à dↄ̀ Isarailinↄnɛ aɛ, Luda gbɛ̃ Yakubu boriinↄ kínamɛ.

⁷² Dauda ń kpá a kpɛɛ kↄ̃n nↄ̀sɛo do, à dↄ̀ńnɛ aɛ kↄ̃n a ↄ aubarikadeeo.