SAAMUNƆ 77 - Bokobaru Bible

Luda dↄnlɛ bɛgɛkɛna nawɛ̃a guu

Asafa lɛ̀.

¹ Ma wii pɛ̀ Ludazi ma à sìsi, ma wii pɛ̀ Ludazi lɛ à ma yã ma.

² Kɛ̀ má kú nawɛ̃a guu ma Dii kii wɛ̀tɛ, ma ↄ sɛ̀ musu gwãavĩ kámmabona sai, ma làakari wè à kpáɛro.

³ Kɛ̀ ma laasuu tà Luda kiia, ben ma ã'ã, kɛ̀ ma à yã wàari pà, ben ma suuna kɛ̀.

⁴ N ma wɛ́ɛ tɛ̃̀ iii, ma gↄ̃ bídi guu ma kora yãzi mà o.

⁵ Ma dↄ yã ziinↄn kↄ̃n wɛ̃̀ kɛ̀ gɛ̃̀tɛnↄ.

⁶ Ma laasuu lɛ̀ ma swɛ̃̀ guu gwãavĩ, ma a zĩnda là mà wɛtɛ mà dↄ̃.

⁷ Ma bè: Dii gìwazi mámmann yↄ́? À pↄↄ é kɛwa nna dↄroo?

⁸ À gbɛ̃kɛɛ yã̀a mámmann yↄ́? À yã égↄ̃ fɛɛna gurↄ píngin yↄ́?

⁹ Wa wɛ̃ndagwana yã sã̀ Ludann yↄ́? À pↄ fɛ̃̀wazi, eé sósobi kɛwao dↄroo?

¹⁰ Ben ma bè: Yã kɛ̀ ↄ̃̀maan yɛ̀. Luda Musude ↄↄ bùsawe.

¹¹ Mɛ́ laasuu lɛ́ Dii yãbↄnsaɛnↄa, mɛ́ dↄ yã kɛ̀ à kɛ̀ yãanↄn.

¹² Mɛ́ n dabuyãkɛnanↄ wàari pá píngi, mɛ́ n yãbitakɛnanↄ da ma swɛ̃̀n.

¹³ Luda, n zɛ́ kú adona. Dii kpare bíta bè à kà lán wa Luda bà?

¹⁴ Ḿbe Luda yãbↄnsaɛkɛri ũ, n n gbãaa mↄ̀ boriinↄnɛ.

¹⁵ N n gbɛ̃nↄ mì sì kↄ̃n n gã̀sã gbãaao, wamↄwa Yakubu kↄ̃n Yusufu boriinↄ.

¹⁶ Kɛ̀ ísia wɛ́ɛ sìnlɛ Luda, kɛ̀ ísia wɛ́ɛ sìnlɛ, ben à kↄ́tↄ kpà, à dègedege ai a lↄ̀n.

¹⁷ Ludambɛɛ í kwɛ̀ɛ, lapatana kĩi gↄ̃ dↄ musu, n kànↄↄ e fãa loupina ũ.

¹⁸ N pũtãna kĩi dↄ zàga'ĩa guu, n loupina anduna pù píngi, tↄↄtɛ kɛ̀ gìri, à nìgãnigã.

¹⁹ N zɛ́ bↄ̀ ísiaan, n gɛ̃kii kɛ̀ í bítanↄ dagura, wèe n kɛ̀sɛgbɛ ero.

²⁰ N dↄ n gbɛ̃nↄnɛ aɛ lán sã kpàsa bà Musa kↄ̃n Arunao gãzĩ.