SAAMUNƆ 74 - Bokobaru Bible

Wiipɛna Ludazi à kpɛ́ kɛ̀ wà wì yãnzi

Asafa lɛ̀.

¹ Luda, bↄ́yãnzin n giwazi ai gurↄ píngizi? À kɛ̀ dia n pɛ̃tɛ̃ e fɛɛɛ n kpàsa sãanↄzi?

² Ǹ tó gbɛ̃ kɛ̀ n ń sí zaa ziinↄ yã dↄngu, borii kɛ̀ ń bò aↄ̃ gↄ̃̀ n pↄ́ ũunↄ kↄ̃n Zayↄn kpiii kɛ̀ ń kɛ̀ n kúkii ũuo.

³ N ibɛɛnↄ n kúkii gbɛ̃̀ wà dàɛ mámmam, ǹ dↄdↄzi ǹ gwa, à gbòro píngi

⁴ N zangurinↄ zↄka dↄ guu kɛ̀ weè danlɛn, aↄ̃ ń zĩnda tuutanↄ pɛ̀ɛ gwe sèeda ũ.

⁵ Wá è, aↄ̃ kpása dↄ musu, aↄ̃ↄe kɛɛ lán wègↄ̃ dàko kɛ̃ɛɛ nà.

⁶ Lí ana maaa kɛ̀ wà nàna n kpɛ́ gũ̀a, aↄ̃ↄ gbɛ̃̀ wà gbòro kↄ̃n kpásao kↄ̃n aadao.

⁷ Aↄ̃ tɛ́ sↄ̃̀ n kúkiia à kwɛ̀, aↄ̃ↄ tò kpɛ́ kɛ̀ n tↄ́ kúa pì gbãsĩ lɛ̀.

⁸ Aↄ̃ bè ń nↄ̀sɛn: Wà ↄ tↄ̃ḿma mámmam. Aↄ̃ tɛ́ sↄ̃̀ wa bùsu aduakɛkpɛnↄa.

⁹ N kpɛ́ sèedanↄ kuu dↄro, annabi ke kuu dↄro. Wégↄ̃ kuu lɛ ai bↄrɛmɛ? Wa gbɛ̃kee dↄ̃ro.

¹⁰ Luda, nɛ́ tó n ibɛɛnↄ gↄ̃ n yáa dↄↄ ai bↄrɛmɛ? N zangurinↄ égↄ̃ kya kaangu yãana sain yↄ́?

¹¹ Bↄ́yãnzin n ↄ kpà n kùlazi? Ǹ ↄ bↄɛ n utan ǹ ń dɛdɛ.

¹² Ludan ma kína ũ zaa káaku, àmbe è gbɛ̃ mì sí anduna guu.

¹³ Ḿbe n ísiaa zↄ̃̀kↄ̃rɛ kↄ̃n n gbãaao, n kùkuku mìnↄ wìwi í guu.

¹⁴ N Igipitinↄ kàatɛ gwe, n ń gɛ̀nↄ kpà gbáa nↄ̀bↄnↄa pↄ́blee ũ.

¹⁵ N swaanↄ bↄ̀ n zɛ́ wɛ̃̀ bianↄnɛ, n swaa kɛ̀ à í babana vĩroo zↄ̃̀kↄ̃rɛ.

¹⁶ Fãantɛ̃ kↄ̃n gwãavĩo kú n pↄ́ ũ, n mↄvura kↄ̃n ↄfãntɛ̃o kúkii kɛ̀ńnɛ.

¹⁷ Ḿbe n anduna gulɛzɛkinↄ kɛ̀ píngi, n kwɛɛ kↄ̃n buusiɛo gurↄↄ dìɛ.

¹⁸ N yá kɛ̀ n ibɛɛnↄ dↄ̀ yãa dↄngu Dii, yↄ̃nkↄↄnↄ kya kà n tↄ́n.

¹⁹ Ǹton n pↄ̃tɛ̃ɛ kpá nↄ̀bↄ pãsĩnↄaro, n gbɛ̃ wɛ̃ndadeenↄ yã tón sãnguro.

²⁰ Ǹ làakari dↄ n bà kuunawaoa, zaakɛ wa bùsu gusaɛnↄↄ pãsĩ píngi.

²¹ Ǹton tó wa gwenawɛ̃ndadeenↄ bↄru kpɛɛ kↄ̃n wíoro, ǹ tó takaasideenↄ kↄ̃n pↄ́nidɛrinↄ n táaki lɛ́.

²² Luda, ǹ fɛɛ ǹ gí kↄ̃n n zĩndao, ǹ n yá kɛ̀ yↄ̃nkↄↄnↄↄ e dↄↄ zɛna sai ma dé!

²³ Ǹton zↄka kɛ̀ n ibɛɛnↄↄ e kaanzi kpá swãkotoro, n zangurinↄ kĩi dìgↄ̃ dↄ yãana sai.