SAAMUNƆ 71 - Bokobaru Bible

Mare ìsi aduakɛna

¹ Dii, ḿbe ma nanzi, ǹton tó wí ma kũ zikiro.

² Ǹ ma bↄ ǹ ma mì sí n maakɛna yãnzi, ǹ swã kpámazi ǹ ma faaba kɛ.

³ Ǹgↄ̃ dɛ ma utɛki gbɛ̀ kɛ̀ mɛ́gae gá utɛn ũ. Ń dìɛ ǹ ma mì sí, zaakɛ ma gbɛ̀si kↄ̃n ma zɛki gbãaaon n ũ.

⁴ Ma Luda, ǹ ma bↄ zaakɛrinↄ ↄzĩ, ǹ ma si gbɛ̃ zaa pãsĩnↄa.

⁵ Ḿbe ma wɛ́ɛ dↄnzi, Dii Luda, ḿbe má n náanɛkɛna zaa ma gↄ̃kparɛkɛgurↄ.

⁶ Ma gbãa èmma zaa ma igurↄ, ḿbe n ma bↄ ma da gbɛɛɛn. N táakin mɛɛ̀gↄ̃ lɛɛ.

⁷ Ma kuuna dɛ yãbↄnsaɛ ũ gbɛ̃nↄnɛ pari, zaakɛ ḿbe ma utɛki gbãaa ũ.

⁸ N táakilɛna ègↄ̃ da ma lɛ́n, mɛɛ̀gↄ̃ n maakɛɛ boo kↄngↄ kↄ̃n uusiɛo.

⁹ Ǹton ma tón ma zikũkɛɛ yãnziro, ǹton ma zĩnna ma gbãa yãana yãnziro.

¹⁰ Zaakɛ ma ibɛɛnↄↄ e ma pee, ma wɛdɛrinↄↄ e lɛ́ kpaakↄ̃sↄ̃mazi ma wɛ̃̀ndi bↄna yãnzi.

¹¹ Aↄ̃ bè: Luda gìzimɛ nɛ́, wà pɛ́a wà kũ, gbɛ̃ke kuu kɛ̀ à à mì síro.

¹² Luda, ǹton kɛmao zã̀ro, ma Luda, ǹ kɛ kpaa ǹ mↄ́ ǹ dↄmalɛ.

¹³ Ǹ tó wí gbɛ̃ kɛ̀ aↄ̃ↄe yã diimaanↄ kũ lɛ aↄ̃ kaatɛ, ǹ tó sↄ̃sↄ̃ da gbɛ̃ kɛ̀ aↄ̃ↄe wɛ́ɛ tãmaanↄla lɛ aↄ̃ tↄ́ yaka.

¹⁴ Mapi sↄ̃, ma wɛ́ɛ égↄ̃ dↄnzi, mɛ́gↄ̃ n táaki lɛɛ màgↄ̃ gaa.

¹⁵ N maakɛna égↄ̃ da ma lɛ́n gurↄ píngi kↄ̃n n mìsina kɛ̀ má à lɛ́ dↄ̃rooo.

¹⁶ Mɛ́ mↄ́ mà n gbãabitakɛyãnↄ o, Dii Luda, n mɛ̀n do maakɛɛn mɛ́ à kpàakpa kɛ gbɛ̃nↄnɛ.

¹⁷ N yã dàmɛ zaa ma gↄ̃kparɛkɛgurↄ, Luda, ai tia mɛ́ɛ n yãbↄnsaɛnↄ oo.

¹⁸ Baa kɛ̀ ma zi kũ̀, ma mìkã pura, ǹton ma tónlo, Luda, lɛ mà e mà n gbãaa tↄ̃kɛ̃ tiadeenↄnɛ, mà n gbãakɛyã da gbɛ̃ kɛ̀ aↄ̃ↄe fɛɛnↄnɛ ń píngi.

¹⁹ Luda, n maakɛna zↄ̃̀ sↄsↄnɛnↄa, n yã bíta kɛ̀, dén weé lɛ́kↄ̃zinyo?

²⁰ Ń tò nawɛ̃a pãsĩ ma le paripari, mↄde nɛ́ ɛara ǹ ma gba wɛ̃̀ndi dↄ, nɛ́ ɛara ǹ ma bↄ tↄↄtɛ guu.

²¹ Nɛ́ ma bɛ̀ɛ kaaramɛ, nɛ́ ɛara ǹ ma làakari kpáɛmɛ dↄ.

²² Ma Luda, mɛ́ n sáabu kpá kↄ̃n mↄrↄo n náanɛkɛɛ yãnzi. Isarailinↄ Luda kɛ̀ ń kú adona, mɛ́ n táaki lɛ́ kↄ̃n kungidio.

²³ Guda égↄ̃ dↄ ma lɛ́n, mamↄma kɛ̀ n ma mì sì mɛ́ n táaki lɛ́.

²⁴ Mɛ́gↄ̃ n yãmaakɛna oo gurↄ píngi, zaakɛ wí gbɛ̃ kɛ̀ aↄ̃ ma wɛtɛ zaaaonↄ kũ̀, aↄ̃ gↄ̃̀ kↄ̃n bídio.