SAAMUNƆ 65 - Bokobaru Bible

Bori píngi wɛ́ɛ dↄ Ludazi

Dauda lɛ̀.

¹ Luda, à kↄ̃ sìo wà n táaki lɛ́ Zayↄn, wà lù kɛ̀ wà sɛ̀nnɛɛnↄ fĩa bo.

² Mmↄn kɛ̀ nɛɛ̀ aduakɛna ma, n kiian bori píngi é sun.

³ Wa yã zaaanↄ wa fu, ben n wa taarinↄ kɛ̃̀we.

⁴ Aubarikadeen gbɛ̃ kɛ̀ ń sɛ̀ n gɛ̃o n ua ũ. N kpɛ́ pↄ́ maaanↄ mↄ̀wa, n kpɛ́ kɛ̀ kú adona pì.

⁵ Nɛɛ̀ wewala kↄ̃n yã maa naasideenↄ, Luda wa Mìsiri. Andunalɛzɛkideenↄ kↄ̃n ísiabaadeenↄ wɛ́ɛ dↄnzi ń píngi.

⁶ N gbãaa dànla, n kpiiinↄ kɛ̀ kↄ̃n n ikoo.

⁷ Nɛɛ̀ ísia kↄ̃n a sↄ̃nↄ kĩi kpáɛ, nɛɛ̀ boriinↄ zↄka yãańnɛ.

⁸ N dabuyãnↄ è swɛ̃̀ kɛ̃ gbɛ̃ kɛ̀ aↄ̃ↄ kú zaa tↄↄtɛlɛanↄn, wè guda dↄmma zaa ↄfãntɛ̃bↄɛ kpa kↄ̃n a gɛ̃kpɛn kpaao.

⁹ Nɛɛ̀ làakari dↄ andunaa, nɛɛ̀ à gba í, nɛɛ̀ taaki ká tↄↄtɛnɛ, n swaanↄↄ pa kↄ̃n ío, nɛɛ̀ tó blɛwɛɛ kɛ, zaakɛ lɛn ń dìɛ lɛ.

¹⁰ Nɛɛ̀ í dagula ai búgbarunↄ pa, nɛɛ̀ guunↄ foo fↄ̃ kↄ̃n louo, nɛɛ̀ aubarika da pↄ́ kɛ̀ bↄ̀ɛnↄn.

¹¹ Nɛɛ̀ aubarika da burazĩin wɛ̃̀ kↄ̃n wɛ̃̀o, blɛ nↄ́sidee è kwɛ́ɛ n tuuban.

¹² Pↄ́dãdãkiinↄ sɛ̃̀ lá bↄ̀rↄ kù sɛ̃̀tɛ, sĩ̀sĩnↄ pↄnnaa dà uta ũ.

¹³ Pↄ́kãdeenↄ dàgula ń dãdãkiinↄa, blɛwɛɛ dàgula sĩ̀sĩgɛɛzi. Wèe pↄnna wii lɛɛ, wèe lɛ̀ sii.