SAAMUNƆ 62 - Bokobaru Bible

Ludan utɛkii ũ

Dauda lɛ̀.

¹ Luda ado bé à tò ma làakari kpáɛna, àmbe è ma mì sí.

² Àmbe ma gbɛ̀si ũ kↄ̃n ma mìsirio, mɛɛ̀ gbãa ea, mɛ́ nigã zikiro.

³ Gɛ̃̀n ũgban égↄ̃ fɛɛɛ gbɛ̃zi? É à nɛ lán gũ̀ kɛ̀ ɛ̀ à kpán ke kara zi wↄ̀kↄwↄkↄ bàn yↄ́?

⁴ À guna a tíla lɛ́n ée kpaakↄ̃sↄ̃, ɛgɛtona bé è kɛare nna. Eè sa maaa o gbɛ̃nɛ kↄ̃n lɛ́omɛ, ben eè ń ká a swɛ̃̀ guu.

⁵ Luda ado bé à tò ma làakari kpáɛna, zaakɛ àpin ma wɛ́ɛ dↄzi.

⁶ Àmbe ma gbɛ̀si ũ ma mìsiri ũ, mɛɛ̀ gbãa ea, mɛ́ nigã zikiro,

⁷ Ma aafia kↄ̃n ma bɛ̀ɛo è bↄ à kiiamɛ, àmbe ma gbɛ̀si gbãaa ũ, ma utɛkii ũ.

⁸ Gbɛ̃nↄ, àgↄ̃ à náanɛ kɛɛ gurↄ píngi, à a swɛ̃̀ wɛ̃nɛ, àmbe wa utɛkii ũ.

⁹ Talakanↄↄ dɛ lán lɛ́'ĩa bàmɛ, gbãadeenↄ e ká pↄ́ke lɛ́zĩro. Tó wà ń yↄ̃ kilooa, aↄ̃ píngi égↄ̃ dɛ fákuumɛ.

¹⁰ Àton gbɛ̃ble'ↄↄ náanɛ kɛro, àton ĩa dã kↄ̃n kpãi pↄ́oro. Tó a auziki e kↄ̃ↄ, àton tó a swɛ̃̀ gↄ̃ kúaro.

¹¹ Yã mɛ̀n doon Ludaa ò, yã mɛ̀n plaaa kɛ̀nↄn má mà: Luda, ḿbe ń gbãaa vĩ,

¹² Dii, ḿbe ń gbɛ̃kɛɛ vĩ, ben nɛɛ̀ fĩa bo baadenɛ a yãkɛnaa.