SAAMUNƆ 51 - Bokobaru Bible

Yãnza wɛ́ɛkɛna Ludaa
Lɛ̀ kɛ̀ Dauda dà gurↄↄ kɛ̀ annabi Natã gàa à kiia à zinakɛna kↄ̃n Basɛbao gbɛra

¹ Luda, ǹ ma wɛ̃nda gwa n yenzi guu, ǹ ma taarinↄ gogo n maa bíta yãnzi.

² Ǹ ma yã zaaa kɛ̃ma mà gↄ̃ wásawasa, ǹ ma durun kɛ̃mɛ míↄmiↄ.

³ Má a taarinↄ dↄ̃ sa, ma durun ègↄ̃ sãamaguro.

⁴ Ḿbe ma durun kɛ̀nnɛ, ma yã kɛ̀ ń yeziroo kɛ̀. Tó n yã ò, n yã égↄ̃ zɛ́ vĩ, tó n yãkpaɛ kɛ̀mao, n yã égↄ̃ nna.

⁵ Zaa ma da nↄ̀sɛn má zaa, má durun vĩ zaa ma igurↄmɛ.

⁶ Nↄ̀sɛ maaa bé è kánnɛ, ǹ ↄ̃ndↄ̃ↄ damɛ ma swɛ̃̀ guu.

⁷ Ǹ ma zú o kↄ̃n saboo lɛ mà zɛ̃ wásawasa, ǹ ma nↄ̀sɛ pípimɛ lɛ mà gↄ̃ pú fénfen.

⁸ Ǹ tó mà pↄnnaa kɛ kↄ̃n yáadↄnao, ǹ tó ma wá kɛ̀ ń bùsanↄ were.

⁹ Ǹton ma durunnↄ yã daro, ǹ ma yã zaaanↄ bↄ ǹ zĩnna píngi.

¹⁰ Luda, ǹ nↄ̀sɛpuraa damɛ, ǹ ɛara ǹ tó ma làakari gↄ̃ kpaɛna.

¹¹ Ǹton ma zĩnnaro, ǹton n Ninii símaro.

¹² Ǹ ɛara ǹ tó ma pↄↄ kɛ nna kɛ̀ n ma mì sì yãnzi. Ǹ ma ninii gbaa màgↄ̃ n yã maa

¹³ mɛ́ gbasa mà n yã dada zaakɛrinↄnɛ, durunkɛrinↄ é ɛara wà aɛ dↄmma.

¹⁴ Ǹ ma bↄ gbɛ̃dɛna yãn, Luda, Luda ma mìsiri, mɛ́ lɛ̀ sí n yãkɛna a zɛ́a musu.

¹⁵ Dii, ǹ ma gba lɛ́ mà n sáabu kpá.

¹⁶ Sa'ona è kɛnnɛ nnaro, tó lɛnlo lɛ má ò. Sa'opↄ kɛ̀ wè ká tɛ́n à tɛ́ kũ è kánnɛro.

¹⁷ Saa kɛ̀ mɛ́ɛ oommaan ma nↄ̀sɛyĩi ũ, nɛɛ̀ kya ká wɛ̃ndade sùudeenlo.

¹⁸ Luda, ǹ aubarika da Zayↄn n pↄyezi maaa guu, ǹ Yerusalɛmu bĩi gba gbãaa,

¹⁹ sa'ona a zɛ́a é gbasa à kánnɛ kↄ̃n sa'opↄ kɛ̀ wè ká tɛ́n à tɛ́ kũo, weé saa o kↄ̃n zùswareenↄ n gbãgbãkiia.

Lean sinn:

Ceanglaichean taic

Sanasan