SAAMUNƆ 42 - Bokobaru Bible

Zĩ̀zↄ ↄ́ↄdↄna

Kora boriinↄ lɛ̀.

¹ Lán zↄ̃ ègↄ̃ swasaɛ ni dɛɛ nà, lɛn n nii kú ma swɛ̃̀n lɛ, Luda.

² Ma ninii e Luda ni dɛɛ, Luda Wɛ̃̀ndide pì, bↄrɛn mɛ́ e mà gá wɛ́ɛ siàlɛɛ?

³ Wɛ́ɛ'i bé à gↄ̃̀ ma pↄ́blee ũ fãantɛ̃ kↄ̃n gwãavĩo. Wègↄ̃ beemɛ gurↄ píngi: N Ludaa kú mámɛee?

⁴ Ma nↄ̀sɛ wɛ̃̀nnɛ, ben yã kɛ̀kiinↄ dↄ̀magu, lán mɛɛ̀ gá parii guu nà ai Luda ua, gbɛ̃nↄ ègↄ̃ tɛ́tɛ ma kpɛɛ kↄ̃n gudakɛnao, zĩbaakɛrinↄ ègↄ̃ tɛ́ ma kpɛɛ kↄ̃n sáabukpanao.

⁵ Bↄ́yãnzin ma nↄ̀sɛ yàkazi? À kɛ̀ dia ma làakari fɛ̀ɛɛ? Séde màgↄ̃ wɛ́ɛ dↄↄ Ludazi, zaakɛ mɛ́ ɛara màgↄ̃ à sáabu kpaa, ma Mìsiri, ma Luda.

⁶ Ma nↄ̀sɛ yàka, ben n yã dↄ̀magu zaa Miza kpiigɛɛzi ai Yoda mìa, zaa Ɛmↄni gbɛ̀nↄ musu.

⁷ Nɛɛ̀ tó ísↄ̃pɛɛna kĩi gↄ̃ dↄ, í lↄ̀nↄↄ e lɛ́ zuukↄ̃zi. Ń tò í e daamala, à sↄ̃ e taamao.

⁸ Dii è yenzi ↄdↄamɛ fãantɛ̃, à lɛ̀ ègↄ̃ da ma lɛ́n gwãavĩ, mɛ́ɛ wɛ́ɛ kɛɛ Luda kɛ̀ dɛ ma wɛ̃̀ndi ũua.

⁹ Mɛɛ̀ be Luda ma gbɛ̀sinɛ: Bↄ́yãnzin ma yã sã̀nguzi? À kɛ̀ dia ń tò màgↄ̃ tɛ́ kↄ̃n pↄsiaao ma ibɛɛ wɛ́ɛtãmma yãnzii?

¹⁰ Ma ĩadammarinↄ è ma sↄ̃sↄ̃, beee yãnzi ma wánↄ ègↄ̃ wii, aↄ̃ègↄ̃ beemɛ gurↄ píngi: N Ludaa kú mámɛee?

¹¹ Bↄ́yãnzin ma nↄ̀sɛ yàkazi? À kɛ̀ dia ma làakari fɛ̀ɛɛ? Séde màgↄ̃ wɛ́ɛ dↄↄ Ludazi, zaakɛ mɛ́ ɛara màgↄ̃ à sáabu kpaa, ma Mìsiri, ma Luda.