SAAMUNƆ 27 - Bokobaru Bible

Diin ma gupuraa ũ

Dauda lɛ̀.

¹ Diin ma gupuraa ũ kↄ̃n ma mìsirio, dén mɛ́ vĩa kɛnɛ? Diin ma utɛkii ũ, dé vĩa bé eé ma kũu?

² Tó gbɛ̃ zaaanↄ lɛ̀ɛma lɛ wà ma kɛ gyáigyai ke tó ma ibɛɛnↄ kↄ̃n ma zangurinↄ fɛ̀ɛmazi, aↄ̃é gɛ̃̀n sí wà lɛ́ɛ.

³ Baa tó zĩ̀karinↄ lìgamazi, ma kù é vĩro, baa tó gbɛ̃nↄ fɛ̀ɛmazi kↄ̃n zĩ̀o, ma làakari égↄ̃ kpaɛnamɛ.

⁴ Yã mɛ̀n don mɛ́ɛ gbekaa Diia, yã pìn mɛ́ɛ wɛtɛɛ maamaa. Má yezi màgↄ̃ kú Dii ua ai ma wɛ̃̀ndi lɛ́n, lɛ màgↄ̃ à wɛ́ɛ wɛtɛ à kpɛ́n gwe, mɛ́ wɛ́ɛ pɛ́ à maakɛɛa.

⁵ Eé ma utɛ a kpɛ́n nawɛ̃akɛgurↄ, eé ma gwa a bisakutaan, eé ma zɛ gbɛ̀ musu aafia.

⁶ Ma mì é gbã à dɛ ma ibɛɛ kɛ̀ aↄ̃ↄ ligamaziinↄ pↄ́la, mɛ́ saa o Dii ua kↄ̃n gudakɛnao, mɛ́ lɛ̀ sí mà à sáabu kpá.

⁷ Tó ma n sisi Dii, ǹ wemala, ǹ ma wɛ̃nda gwa, nɛ́ ma yã ma.

⁸ Ma nↄ̀sɛ e lɛ́ daama mà n wɛ́ɛ wɛtɛ, Dii, mɛ́ɛ n wɛ́ɛ wɛtɛɛ.

⁹ Ǹton mìkpɛɛ zu mamↄma n zↄ̀blerinɛro, ǹton kpɛɛ limɛ kↄ̃n pↄfɛ̃oro. Ma dↄnlɛrin n ũ, ǹton ma zĩnnaro, Luda ma mìsiri, ǹton ma tónlo.

¹⁰ Tó ma de kↄ̃n ma dao pã kpàmazi, Dii é ma sí.

¹¹ Dii, ǹ n yãzɛdee damɛ, ǹ dↄmɛ aɛ zɛ́ súusu guu ma wɛ́ɛtãmmarinↄ yãnzi.

¹² Ǹton tó ma ibɛɛnↄ pↄyeziyã kɛ ma musuro, zaakɛ sèeda ɛgɛdeenↄↄ e yã diima, gbɛ̃ pãsĩnↄↄ e pↄ́ bↄↄ ń yĩzĩ.

¹³ Má yã kɛ̀kii náanɛkɛna, kɛ̀ Dii é à maaa kɛmɛ anduna kɛ̀ guu.

¹⁴ Ǹ wɛ́ɛ dↄ Diizi, ǹ zɛ gbãa, nɛ́ n làakari kpáɛ, ǹ wɛ́ɛ dↄ Diizi.