SAAMUNƆ 25 - Bokobaru Bible

Luda wa dãkpari

Dauda lɛ̀.

¹ Dii, ḿbe ma a swɛ̃̀ kpàmma,

² Ma Luda, má n náanɛkɛna, ǹton tó wí ma kũro, ǹton tó ma ibɛɛnↄ ma nɛro.

³ Wí é gbɛ̃ kɛ̀ aↄ̃ wɛ́ɛ dↄnziinↄ kũ zikiro, sé gbɛ̃ kɛ̀ aↄ̃ bↄ̀ n kpɛɛ yãkↄdↄana sainↄ.

⁴ Dii, ǹ n zɛ́ ↄdↄamɛ, ǹ n yã dadamɛ.

⁵ Ǹ ma da n yãpura zɛ́a, ǹ à yã dadamɛ, zaakɛ Luda ma mìsirin n ũ, ma wɛ́ɛ ègↄ̃ dↄnzimɛ gurↄ píngi.

⁶ N wɛ̃nda kↄ̃n n yenzio gↄ̃ dↄngu, zaakɛ beenↄↄ kúnyo zaa zi, Dii.

⁷ Ǹton taari kɛ̀ má kɛ̀nↄ yã daro ke durun kɛ̀ má kɛ̀ ma gↄ̃kparɛkɛgurↄↄnↄ. Ǹ tó ma yã gↄ̃ dↄngu yenzi guu, kɛ̀ ń maa yãnzi, Dii.

⁸ Dii maa, è yã kɛ a zɛ́a, beee yãnzin è a yã dada durunkɛrinↄnɛzi.

⁹ È zĩndabusarinↄ da a zɛ́a, è yã maaa dadańnɛ.

¹⁰ Dii ègↄ̃ yenzi kↄ̃n náanɛo vĩ kↄ̃n gbɛ̃ kɛ̀ aↄ̃ a bà kuunańyo yã kũnanↄ.

¹¹ Baa kɛ̀ ma durun bíta Dii, ǹ kɛ̃mɛ n tↄ́bↄna yãnzi.

¹² Dé bé à Dii vĩa vĩi? Dii è adee da zɛ́ kɛ̀ dɛ à sɛ́a.

¹³ Adee égↄ̃ kú nnamana guu, à boriinↄ bé wégↄ̃ ń bùsu vĩ.

¹⁴ Dii ègↄ̃ nna kↄ̃n a vĩakɛrinↄ, è tó aↄ̃gↄ̃ a bà kuunańyo yã dↄ̃.

¹⁵ Ma wɛ́ɛ ègↄ̃ pɛ́ Diia, zaakɛ àmbe è ma gbá bↄ bàn.

¹⁶ Ǹ aɛ dↄma, nɛ́ ma wɛ̃nda gwa, zaakɛ má kú mado wɛ́ɛtãmma guu.

¹⁷ Ma yã'ↄ̃ammanↄ kàara ma nↄ̀sɛ guu, ǹ ma bↄ ma nawɛ̃a pìn.

¹⁸ Ǹ ma wɛ́ɛtãmma kↄ̃n ma pↄsiaao gwa, nɛ́ ma durunnↄ kɛ̃ma píngi.

¹⁹ Ǹ gwa lán ma ibɛɛnↄ dàgula nà, aↄ̃ zàmagu pãsĩpãsĩ.

²⁰ Ǹ ma wɛ̃̀ndi dãkpa, nɛ́ ma mì sí, ǹton tó wí ma kũro, zaakɛ ma nanzi.

²¹ Ǹ tó yãpura kↄ̃n kuuna maaao gↄ̃ ma dãkpaa, zaakɛ ma wɛ́ɛ ègↄ̃ dↄnzi.

²² Luda, ǹ Isarailinↄ bↄ ń nawɛ̃anↄn píngi.