SAAMUNƆ 19 - Bokobaru Bible

Ludambɛ gakui kↄ̃n Luda yã gakuio
Dauda lɛ̀.

¹ Musu è Luda gakui bↄ gupuraaa, bàtumapↄnↄ è à zĩi ↄdↄańnɛ.

² Lɛn èegↄ̃ yã oo lɛ lán guu e dↄↄ nà, è dↄ̃na kpáḿma gwãavĩ kↄ̃n gwãavĩo.

³ È yã oro, à yã'ona borii kuuro, wè à kĩi maro.

⁴ À kòto è da andunala píngi, à yã'ona è gá ai tↄↄtɛ lɛ́zɛkiia. Luda kpɛ́ bò ↄfãntɛ̃nɛ gwe,

⁵ è bↄ kpɛ́n à fɛɛ lán nↄsɛri bà, è fɛɛ táo kↄ̃n pↄnnaao lán gↄ̃sagbãaa bà.

⁶ È fɛɛ ludambɛlɛa kɛ̀, è bikũ à gá ai à lɛ́a kãa, pↄ́ke ègↄ̃ utɛna à puusunɛro.

⁷ Dii doka papana, è ń kuuna kɛkɛ à kɛńnɛ dↄ. Dii yã náanɛ vĩ, è lɛ́ da ↄ̃ndↄ̃saideenↄa.

⁸ Dii ↄdↄkii bé à súusu, è ń pↄↄ kɛ nna. Dii yãdiɛnanↄↄ gbãsĩ vĩro, è ń uu wereńnɛ.

⁹ Mìsiɛna Diinɛ zɛ́ pì wɛ́ɛbↄna, weégↄ̃ tɛ́zi gurↄ píngi, Dii yãkpaɛkɛna yãpuraa vĩ, ègↄ̃ maa wásawasa.

¹⁰ À maaa dɛ vurala, baa vura maaa, à nnaa dɛ zↄ́'ila, baa zↄ́ búsu.

¹¹ Beee musu nɛɛ̀ lɛ́ da mamↄma n zↄ̀bleria, gbɛ̃ kɛ̀ n yã kũna àre ègↄ̃ bíta.

¹² Dé bé eé fↄ̃ à yã kɛ̀ à zã̀anↄ dↄ̃ↄ? Ǹ sùu kɛmao kↄ̃n ma taari kɛ̀ utɛnamɛɛnↄ.

¹³ Ǹton tó mamↄma n zↄ̀bleri taari kɛnnɛ gĩanziro, ǹton tó durunnↄ kí blemaro, mɛ́gↄ̃ kuu wásawasa taari bíta sai.

¹⁴ Ǹ tó yã kɛ̀ èe bↄↄ ma lɛ́n kɛnnɛ kↄ̃n laasuu kɛ̀ kú ma swɛ̃̀ guuo, Dii, ma gbɛ̀si, ma mìsiri.

Lean sinn:

Ceanglaichean taic

Sanasan