SAAMUNƆ 18 - Bokobaru Bible

Zĩ̀blena sáabu

Lɛ̀ kɛ̀ Dii zↄ̀bleri Dauda sìnɛ gurↄↄ kɛ̀ à à bↄ̀ Solu kↄ̃n a ibɛɛ kpaaanↄo ↄzĩ.

¹ Má yenzi Dii, ḿbe ma gbãaa ũ.

² Diin ma gbɛ̀si ũ kↄ̃n ma zɛki gbãaao, ma mìsirimɛ. Ma Ludan ma gbɛ̀si ũ, mɛɛ̀ nazi. Àmbe ma sɛngbango ũ, ma mìsiri gbãa kↄ̃n ma gulezĩo.

³ Dii kà wà à sáabu kpá. Mɛɛ̀ à sísi, è ma bↄ ma ibɛɛnↄ ↄzĩ.

⁴ Góro'itɛ vlɛ̃̀ɛmao, ísↄ̃ kɛ̀ è ń kaatɛ e ma blee.

⁵ Mira bànↄ lìgamazi, gaa takutɛɛ kpàkpamɛ ma aɛ.

⁶ Kɛ̀ má kú nawɛ̃a guu, ma Dii sìsi, ma wii pɛ̀ ma Ludazi, ben à ma kòto mà zaa a bɛ, ma wiii kà à kiia, à gɛ̃̀ à swãn.

⁷ Tↄↄtɛ lùgaluga à nìgãnigã, kpiiinↄ dègedege ai ń kãsãan. Aↄ̃ lùgaluga kɛ̀ à pↄ fɛ̃̀ yãnzi.

⁸ Tɛ́sukpɛ bↄ̀ à yĩzĩ, tɛ́ kɛ̀ è ń kpata bↄ̀ à lɛ́n, à yↄ̃̀nↄↄ e tɛ́ kɛɛ à aɛ.

⁹ À musu wɛ̃̀ à pìta, lou sìsi à gbá gĩzĩ.

¹⁰ Èe vĩaa dina kɛrubu kpɛɛ, èe yàa paa ĩala.

¹¹ À gusiaa dà a zĩndala, ludambɛ sia kũ à kúkiila.

¹² Zaa à gakui tɛ́kɛna guu lou e sisii, lougbɛ e kwɛɛ, lou e pii pãsĩpãsĩ.

¹³ Dii pàta zaa musu, Luda Musude kòto dↄ lapatana ũ.

¹⁴ À kà fã̀ ma ibɛɛnↄa à ń fãakↄ̃a, à tò lou pìḿma à pɛ̀ḿma.

¹⁵ Kɛ̀ n pataḿma, Dii, kɛ̀ n pↄ́ bↄ̀ n yĩzĩ, ísiaa tↄↄtɛ bↄ̀ gupuraaa, anduna kãsãa gↄ̃̀ kaɛna pↄ̃tɛ̃.

¹⁶ À ↄ bↄ̀ zaa musu à ma kũ, à ma bↄ swadaa guu.

¹⁷ À ma si ma ibɛɛ gbãaa ↄzĩ kↄ̃n ma zanguri kɛ̀ aↄ̃ gbãaa dɛmalaanↄ.

¹⁸ Aↄ̃ lɛ̀ɛma ma mↄ́nzikɛgurↄ, mↄde Dii zɛ̀mao.

¹⁹ À ma bↄ à ma gba mɛ̀porokii, à ma mì sì kɛ̀ à yemazi yãnzi.

²⁰ Dii yã kɛ̀mɛ ma nↄ̀sɛ maa lɛ́n, à fĩa bòmɛ ma gbãsĩsaikɛ lɛ́n.

²¹ Zaakɛ má Luda yãdiɛnanↄ kũna, mɛ́ɛ à zaaa kɛ ma a Luda tònlo.

²² À dokayãnↄ ègↄ̃ dↄↄmɛ aɛ píngi, mɛ́ɛ kpɛɛ li yã kɛ̀ à dìɛnↄnɛro.

²³ Ma kuuna taari vĩ Diinɛro, má a zĩnda kũna durun sai.

²⁴ Dii fĩa bòmɛ ma nↄ̀sɛ maa lɛ́n, zaakɛ à è má kuu gbãsĩ sai.

²⁵ Náanɛdeen n ũ náanɛdeenↄnɛ, taarisaideen n ũ taarisaideenↄnɛ.

²⁶ Ń wásawasa gbɛ̃ wásawasanↄnɛ, mↄde nɛɛ̀ íbɛtɛ kpá kↄ̃n gbɛ̃ dↄ̀rↄsaideenↄo.

²⁷ Nɛɛ̀ zĩndabusarinↄ mì sí, nɛɛ̀ gbɛ̃ kɛ̀ aↄ̃è ń zĩnda sɛ́ lezĩnↄ sↄ̃ɛ.

²⁸ Dii, nɛɛ̀ ma fitia tɛ́ tó nana, ma Luda, nɛɛ̀ ma gusiaa liɛ gupuraa ũ.

²⁹ Kↄ̃n n gbãaao mɛ́ fↄ̃ mà kù kpá karaa, ma Luda gãzĩ mɛ́ fↄ̃ mà vĩ gũ̀la.

³⁰ Luda kɛ̀kii sↄ̃ yãkɛna bↄɛzina, Dii yã see vĩro, à wásawasa, à dɛ sɛngbango ũ gbɛ̃ kɛ̀ aↄ̃ nàzinↄnɛ.

³¹ Dii baasiro, dén Luda ũu? Wa Luda baasiro, dén gbɛ̀si ũu?

³² Luda bé è ma gba gbãaa, àmbe è zɛ́ poromɛ súusu.

³³ È tó ma gbá kãi gↄ̃ nna lán zↄ̃ pↄ́ bà, è tó màgↄ̃ táa oo gulezĩnↄ musu.

³⁴ È zĩ̀kana dadamɛ ai ma gã̀sã fↄ̃ à mↄ̀gotɛ̃ sá gá.

³⁵ Nɛɛ̀ n zĩ̀blesɛngbango kpáma, ń ma kũna kↄ̃n n ↄplaao, nɛɛ̀ naɛ ǹ ma tↄ́ bↄ.

³⁶ Nɛɛ̀ ma zɛ́ yàasa kũmɛ lɛ ma gbá tón sataro.

³⁷ Ma pɛɛ ma ibɛɛnↄzi ma ń kũkũ, mɛ́ɛ ɛara ma suro, sé kɛ̀ ma gaa ma ń dɛdɛ.

³⁸ Ma ń wíwi, aↄ̃ↄe fↄ̃ wà fɛ̀ɛ dↄro, aↄ̃ lɛ̀ɛ wà gↄ̃̀ kaɛna ma gbá gĩzĩ.

³⁹ N ma gba gbãaa ma zĩ̀ kào, ń tò ma ibɛɛnↄ mì nàɛmɛ.

⁴⁰ Ń tò ma zangurinↄ kpɛɛ lì, ben ma a ibɛɛ pìnↄ kàatɛ.

⁴¹ Aↄ̃ wii lɛ̀, gbɛ̃kee e ń mì síro, aↄ̃ lɛ́ zù Diizi, èe weńlaro.

⁴² Ma ń kɛ́ tíkɛtikɛ lán bùsuti kɛ̀ ĩa sɛ̀ɛ bà, ma táa òḿma lán zɛ́ guu bↄtↄnga bà.

⁴³ N ma bↄ gbɛ̃ kɛ̀ aↄ̃ fɛ̀ɛmaziinↄ ↄzĩ, n ma kɛ boriinↄ mìdee ũ. Borii kɛ̀ má ń dↄ̃roonↄ è zↄ̀ blemɛ,

⁴⁴ bori zĩ̀tↄnↄ è na ń sàsaa ma aɛ. Tó aↄ̃ ma yã mà, aↄ̃è mì siɛmɛ.

⁴⁵ Aↄ̃ kã è ga, aↄ̃è bↄ ń zɛki gbãaanↄn kↄ̃n luganao.

⁴⁶ Dii kuu! Aubarikadeen ma gbɛ̀si ũ! Wà Luda ma mìsiri tↄ́ bↄ.

⁴⁷ Luda bé è gɛ̃ɛ bomɛ, è tó boriinↄ mì siɛmɛ,

⁴⁸ è tò mà piti ma ibɛɛnↄn. N ma gba gbãaa dɛ ma zangurinↄla, n ma bↄ gbɛ̃ pãsĩnↄ ↄzĩ.

⁴⁹ Beee yãnzi mɛ́ n sáabu kpá boriinↄ tɛ́, mɛ́ n tↄ́ kpá, Dii.

⁵⁰ Dii è zĩ̀ bíta ble kína kɛ̀ à à sɛ̀nɛ, è gbɛ̃kɛɛ kɛ kína kɛ̀ à à kànɛ, mamↄma Dauda kↄ̃n ma boriinↄo ai gurↄ píngi.