SAAMUNƆ 147 - Bokobaru Bible

Pↄ́ píngi kú Luda ↄzĩ

¹ Aleluya! Lɛ̀sina wa Ludanɛ maa, à nna bensↄ̃ à kↄ̃ sìo wà à táaki lɛ́.

² Dii e Yerusalɛmu fɛɛɛ dↄ, èe Isaraili zĩ̀zↄnↄ kaakↄ̃a, èe ɛara à suńyo.

³ È gbɛ̃ kɛ̀ aↄ̃ nↄ̀sɛ yàkanↄ làakari kpáɛńnɛ, è ń bↄ̀ pípińnɛ.

⁴ À sↄsↄnɛnↄ lɛ́ dↄ̃, è ń baade sísi a tↄ́a.

⁵ Wa Dii bíta, à iko vĩ maamaa, à ↄ̃ndↄ̃ↄ lɛ́ vĩro.

⁶ Dii è zĩndabusarinↄ gba gbãaa, mↄde è ↄ tↄ̃ zaakɛrinↄa ai tↄↄtɛa.

⁷ À lɛ̀ sí Diinɛ kↄ̃n à sáabukɛnao, à wa Luda táaki lɛ́ kↄ̃n mↄrↄo.

⁸ È tó lou sisi, è tↄↄtɛ gba lou, è tó sɛ̃̀ bↄɛ sĩ̀sĩnↄa.

⁹ È pↄ́blee kpá nↄ̀bↄnↄa kↄ̃n gbáa kãnkãna nɛ́nↄ, tó aↄ̃ↄe wii pɛɛ.

¹⁰ Èe kɛ sↄ̃ gbãakɛɛ bé è kánɛro, èe kɛ gↄ̃sagbãakɛɛ bé è kɛnɛro.

¹¹ Gbɛ̃ kɛ̀ aↄ̃ↄ à vĩa vĩinↄ bé è kánɛ, gbɛ̃ kɛ̀ aↄ̃ wɛ́ɛ dↄ à gbɛ̃kɛɛzinↄ.

¹² Yerusalɛmudeenↄ, à Dii tↄ́ bↄ, Zayↄndeenↄ, à a Luda táaki lɛ́.

¹³ Zaakɛ è aubarika daagu, è a wɛ́tɛ bĩilɛnↄ gbãaa kaaraare.

¹⁴ È a gba aafia ai a bùsulɛ lɛ́n, è pↄ́bori maaa kpáawa à mↄ́awa.

¹⁵ È yã o à kpãsã tↄↄtɛnɛ, à yã è ká gↄ̃ↄgↄ̃ↄ.

¹⁶ È tó lougbɛ kwɛ́ púu lán buu bà, è tó kpíi kpá lán túbu bà,

¹⁷ è lougbɛ fã lán gbɛ̀kↄsↄ bà. Dé bé eé fↄ̃ à zɛ à ĩa yĩizi?

¹⁸ È yã o à kpãsã, lougbɛ è yↄ́, è ĩa gbarɛ, à í è bàa lɛ́.

¹⁹ È tó Yakubu boriinↄ gↄ̃ a yã dↄ̃, è doka kɛ̀ a dìɛnↄ da Isarailinↄnɛ.

²⁰ Èe beee kɛ bori pãnde kenɛro, aↄ̃ↄ à yãdiɛnanↄ dↄ̃ro. Aleluya!