SAAMUNƆ 146 - Bokobaru Bible

Dii làakaridↄna wɛ̃ndadeenↄa

¹ Aleluya! Ma swɛ̃̀, ǹ Dii táaki lɛ́.

² Mɛ́gↄ̃ Dii táaki lɛɛ ai ma wɛ̃̀ndi lɛ́n, mɛ́gↄ̃ lɛ̀ sii ma Ludanɛ ai ma kuuna lɛ́n.

³ Àton náanɛ dↄ gbãadeenↄaro, mìsina kú gbɛ̃ntee kiiaro.

⁴ Tó aↄ̃ wɛ̃̀ndi tà, aↄ̃è ɛara wà gɛ̃ bùsun, zĩ beeean yã kɛ̀ aↄ̃ↄe pɛɛa è yãa.

⁵ Aubarikadeen gbɛ̃ kɛ̀ Yakubu Luda de à dↄnlɛri ũu ũ, kɛ̀ à wɛ́ɛ dↄ Dii a Ludazi,

⁶ musu kↄ̃n tↄↄtɛo Kɛ̀ri, ísia kↄ̃n pↄ́ kɛ̀ kú à guunↄ píngi. Dii náanɛ vĩ gurↄ píngi,

⁷ è yã sí kↄ̃n gbɛ̃ kɛ̀ wèe gbãaa mↄↄńnɛnↄo, è pↄ́blee kpá nↄadɛrinↄa. Dii è bà poro gbɛ̃ kɛ̀ aↄ̃ↄ yinanↄa,

⁸ Dii è vĩ̀anↄ wɛ́ɛ wɛ̃ńnɛ, Dii è gbɛ̃ kɛ̀ nawɛ̃a tↄ̃̀ḿmanↄ fɛɛ, Dii ègↄ̃ ye gbɛ̃ maaanↄzi.

⁹ Dii è bↄ̀amↄnↄ gwa, è ↄ da gyaanↄnↄa kↄ̃n tonɛnↄ, mↄde è zɛ́ yãkↄ̃tɛ gbɛ̃ zaaanↄnɛ.

¹⁰ Dii ègↄ̃ kí blee gurↄ píngi, Zayↄndeenↄ, a Luda ègↄ̃ kuu ai a boriia. Aleluya!