SAAMUNƆ 140 - Bokobaru Bible

Aduakɛna gbɛ̃ zaaanↄ musu

Dauda lɛ̀.

¹ Dii, ǹ ma sí gbɛ̃ zaaanↄa, ǹ ma dãkpa gbɛ̃ pãsĩnↄ yãnzi.

² Aↄ̃è yã zaaa laasuu lɛ́ ń swɛ̃̀ guu, swèen aↄ̃ègↄ̃ wɛtɛɛ gurↄ píngi.

³ Aↄ̃è ń lɛ́ kɛkɛ lán mlɛ̃̀ bà, aↄ̃ lɛ́gbɛ nɛ́ pitigoo sɛwɛɛmɛ.

⁴ Dii, ǹton tó gbɛ̃ zaaanↄ ↄ namaro, ǹ ma sí gbɛ̃ pãsĩnↄa, aↄ̃è lɛ́ kpakↄ̃sↄ̃ lɛ wà ma pãɛ.

⁵ Wadadeenↄ wɛ̀ɛ yↄ̃̀mɛ, aↄ̃ takutɛɛ kpàkpamɛ, aↄ̃ bà kpàmɛ zɛ́n.

⁶ Dii, ma bènnɛ: Ma Ludan n ũ, ǹ swã kpá ma wɛ̃nda wiiizi, Dii.

⁷ Dii Luda, ma mìsiri gbãaa, mmↄn kɛ̀ nɛɛ̀ ↄ kúmala zĩ̀lan,

⁸ ǹton tó gbɛ̃ zaaanↄ ń pↄyezi zɛ́ ero, Dii, ǹton tó aↄ̃ lɛ́kpakↄ̃sↄ̃na kↄ̃ sɛ́ro.

⁹ Gbɛ̃ kɛ̀ aↄ̃ↄ ligamaziinↄ, yã zaaa kɛ̀ aↄ̃ↄe ma kpákpaao wí ń musu.

¹⁰ Tɛ́yↄ̃ wãaa kúḿma, wà ń zu tɛ́n, aↄ̃ si wɛ̀ɛ kɛ̀ aↄ̃é bↄnloo guu.

¹¹ Ǹton tó gbɛ̃yakarinↄ zɛkii e anduna guuro, ǹ tó kisira gↄ̃ gbɛ̃ pãsĩnↄ wɛɛ zɛna sai.

¹² Má dↄ̃ kɛ̀ Dii è yã nnaa kpá wɛ̃ndadeenↄa, è yã kɛkɛ takaasideenↄnɛ a zɛ́a.

¹³ Yãpura, gbɛ̃ maaanↄ é n tↄ́ bↄ, nↄ̀sɛpuradeenↄ égↄ̃ kú n aɛzĩ.