SAAMUNƆ 132 - Bokobaru Bible

Dauda boriinↄↄ vɛ̃ɛna kpatan Zayↄn

Gana Yerusalɛmu lɛ̀.

¹ Dii, ǹ tó Dauda yã gↄ̃ dↄngu kↄ̃n nawɛ̃a kɛ̀ à kɛ̀nↄ píngi.

² À la dà Diinɛ, à lù sɛ̀ Yakubu Luda gbãadeenɛ à bè,

³ é gɛ̃ kpɛ́nlo, é daɛ a gádoaro,

⁴ é we à igoba páro, é tó ii na a wɛ́ɛnlo,

⁵ ai à gá guu eo Diinɛ à kpɛ́ dↄ Yakubu Luda gbãadeenɛ.

⁶ Wa à baaru mà Ɛflata bùsun, wa bↄa Yarimu bura.

⁷ Wà gá à kúkiia, wà kúɛ à tinti aɛ.

⁸ Dii, ǹ fɛɛ ǹ su n pitakiia, mpi kↄ̃n n ikokɛ àkpatio.

⁹ N gbã̀gbãrinↄ maakɛɛ da uta ũ, n yãmarinↄ guda gↄ̃ dↄ.

¹⁰ Ǹton mìkpɛɛ zu kína kɛ̀ ń kànɛro n zↄ̀bleri Dauda yãnzi.

¹¹ Dii sì kↄ̃n a kuunao Daudanɛ, à náanɛ vĩ, eé lɛ́ liɛro, à bè: Mɛ́ n boriinↄ doke ká n kpatan.

¹² Tó n boriinↄ ma bà kuunańyo yã dà, tó aↄ̃ yã kɛ̀ má dàńnɛnↄ kũna, aↄ̃ boriinↄ égↄ̃ vɛ̃ɛ n kpatan gurↄ píngi.

¹³ Zaakɛ Dii Zayↄn sɛ̀, à yezi àgↄ̃ dɛ a vɛ̃ɛkii ũ, à bè:

¹⁴ Guu kɛ̀n mɛ́gↄ̃ kún gurↄ píngi, gura kɛ̀n mɛ́gↄ̃ vɛ̃ɛnan, zaakɛ à ma pↄↄ gbàmɛ.

¹⁵ Mɛ́ aubarika dan maamaa, mɛ́ pↄ́blee kpá à takaasideenↄa à mↄ́ḿma.

¹⁶ Mɛ́ mìsina da à sa'orinↄnɛ uta ũ, ma yãmarinↄ guda égↄ̃ dↄ.

¹⁷ Gwen mɛ́ Dauda bori kína gbãadee bↄn, gwen kína kɛ̀ má kà tɛ́ égↄ̃ dↄn.

¹⁸ Mɛ́ wí da à ibɛɛnↄa, à kífura égↄ̃ tɛ́ kɛɛ à mìa.