SAAMUNƆ 119 - Bokobaru BibleLuda yã sɛna lezĩ 1 Aubarikadeenↄn gbɛ̃ kɛ̀ aↄ̃ kuu taari sai wà Dii doka kũnanↄ ũ. 2 Aubarikadeenↄn gbɛ̃ kɛ̀ aↄ̃ↄ Dii yã kũna wà à kii wɛtɛ kↄ̃n nↄ̀sɛo doonↄ ũ. 3 Aↄ̃è yã kpɛɛgãnda kɛro, aↄ̃ègↄ̃ tɛ́ à zɛ́ guu. 4 N n ↄdↄkii ↄ̀dↄawe, lɛ wàgↄ̃ tɛ́zi kↄ̃n làakario. 5 Má yezi màgↄ̃ kú ma dↄ̀rↄa màgↄ̃ n yãdannɛnanↄ kũna. 6 Tó má n yãdiɛnanↄ kũna píngi, bee é tó wí ma kũro. 7 Gurↄↄ kɛ̀ mɛ́ɛ n dokayã maaanↄ dadaa, mɛ́ n sáabu kpá kↄ̃n nↄ̀sɛpuraao. 8 Mɛ́gↄ̃ n yãdannɛnanↄ kũna, ǹton ma tón mámmanlo. 9 Dian gↄ̃kparɛ e àgↄ̃ kuu gbãsĩ sai nà? Séde à yãkɛna kↄ̃ sɛ́ kↄ̃n n yão. 10 Mɛ́ɛ n kii wɛtɛɛ nↄ̀sɛo do, ǹton tó mà zã n yãdiɛnanↄaro. 11 Ma n yã dà ma swɛ̃̀ guu lɛ màton durun kɛnnɛro yãnzi. 12 Aubarikadeen mmↄn Dii ũ, ǹ n yãdiɛnanↄ damɛ. 13 Dokayã kɛ̀ aↄ̃ bↄ̀ n lɛ́nnↄ píngi, mɛ́ tↄ̃kɛ̃ńnɛ kↄ̃n ma lɛ́o. 14 Mɛɛ̀ pↄnnaa kɛ kↄ̃n n yãnↄ lán wè kɛ kↄ̃n auziki bítao nà. 15 Mɛɛ̀ laasuu lɛ́ n ↄdↄkiia, ma wɛ́ɛ kú n zɛ́nↄa. 16 Ma pↄↄ kɛ̀ nna n yãdiɛnanↄa, n yã é sãmaguro. 17 Ǹ yã maaa kɛ mↄma n zↄ̀blerinɛ lɛ màgↄ̃ kuu wɛ̃̀ndio, mɛ́gↄ̃ n yã kũna. 18 Ǹ ma wɛ́ɛ kɛ̃mɛ lɛ mà wɛ́ɛ si yãbↄnsaɛnↄlɛ n dokan. 19 Nibↄn ma ũ anduna guu, ǹton n yãdiɛnanↄ utɛmɛro. 20 N dokayãnↄ nidɛna baabↄrɛ ma swɛ̃̀ blè. 21 Nɛɛ̀ kpãkɛ̃ wadadeenↄ kɛ̀ lɛ́ ń kũnↄzi, gbɛ̃ kɛ̀ aↄ̃ zã̀ n yãdiɛnanↄanↄ. 22 Ǹ ma bↄ sↄ̃sↄ̃nan kↄ̃n dↄkɛnyoo, zaakɛ má n yãnↄ kũna. 23 Baa kɛ̀ kínɛnↄ vɛ̃̀ɛ wà lɛ́ kpàkↄ̃sↄ̃mazi, ma laasuu égↄ̃ kú n yãdannɛnanↄa. 24 N yãnↄ è ma pↄↄ kɛ nna, n yã pì è lɛ́ dama. 25 Ma gↄ̃ daɛna tↄↄtɛ, ǹ ma wɛ̃̀ndi dãkpa lán ń ò nà. 26 Ma a yãkɛnanↄ dↄ̀dↄnnɛ, ben n wemala, ǹ n yãdannɛnanↄ damɛ. 27 Ǹ tó mà n ↄdↄkiinↄ dↄ̃, ma laasuu égↄ̃ kú n yãbↄnsaɛnↄa. 28 Ma pↄↄ sia à kɛ̀ bíta, ǹ ma gba gbãa lán ń ò nà. 29 Ǹ ma kɛ̃ mↄnafiki zɛ́a, ǹ ma gba zɛ́ mà zɛ kↄ̃n n dokao. 30 Ma yãpura zɛ́ sɛ̀, ma swɛ̃̀ ègↄ̃ kú n dokaa. 31 Má n yãnↄ kũna ↄplaplaa, ǹton tó wí ma kũro, Dii. 32 Mɛɛ̀ wã n yãdiɛnanↄ zɛ́zi, zaakɛ n ma làakari kpàɛmɛ. 33 Dii, ǹ n yãdannɛnanↄ zɛ́ ↄdↄamɛ lɛ màgↄ̃ kũna ai ma wɛ̃̀ndi lɛ́n. 34 Ǹ ma gba ↄ̃ndↄ̃ↄ màgↄ̃ n doka kũna, màgↄ̃ zĩi kɛa kↄ̃n nↄ̀sɛo do. 35 Ǹ ma da n yãdiɛnanↄ zɛ́n, zaakɛ bee bé è kámagu. 36 Ǹ tó ma swɛ̃̀ gↄ̃ kú n yãnↄa, àton tá bĩni zɛ́nlo. 37 Ǹ ma wɛ́ɛ go pↄ́ pãanↄa, ǹ ma wɛ̃̀ndi dãkpa lán ń ò nà. 38 Ǹ yã kɛ̀ ń ò papa mↄma n zↄ̀blerinɛ, lɛ́ kɛ̀ ń gbɛ̃̀ n vĩakɛrinↄnɛ. 39 Ǹ tó sↄ̃sↄ̃na kɛ̀ mɛɛ̀ à vĩa kɛɛ gomala, zaakɛ n dokayãnↄↄ maa. 40 Má ye n ↄdↄkiizi fá, ǹ ma wɛ̃̀ndi dãkpa n maakɛɛ guu. 41 Dii, ǹ mↄ́ ǹ gbɛ̃kɛɛ kɛmɛ, ǹ ma mì sí lán ń ò nà, 42 gbasa mà yã sí ma sↄ̃̀sↄ̃rila, zaakɛ mɛ́ɛ n yã náanɛ kɛɛ. 43 Ǹton yãpura yã sí ma lɛ́nlo, zaakɛ n yãzɛdeen má wɛ́ɛ dↄzi. 44 Mɛ́gↄ̃ n doka kũna ai gurↄ píngi, 45 Mɛ́gↄ̃ tɛ́ aafia, zaakɛ ma n ↄdↄkii wɛ̀tɛ. 46 Mɛ́ n yãnↄ o kínanↄ aɛ, wí é ma kũ sↄ̃ro. 47 N yãdiɛnanↄ è kɛ ma pↄↄnɛ, zaakɛ má ye yã pìnↄzi. 48 Ma gã̀ sɛ̀ n yãdiɛna kɛ̀ má yezinↄnɛ, mɛɛ̀ laasuu lɛ́ n yãdannɛnanↄa. 49 Ǹ dↄ yã kɛ̀ ń ò n zↄ̀blerinɛn, zaakɛ ń tò ma wɛ́ɛ dↄzi. 50 Yã kɛ̀ è ma làakari kpáɛ ma nawɛ̃akɛnan yɛ̀, n lɛ́gbɛ̃na bé è ma wɛ̃̀ndi dãkpa. 51 Wadadeenↄↄ e ma faboo yãana sai, baa kↄ̃n beeeo mɛɛ̀ zã n dokaaro. 52 Mɛɛ̀ dↄ n dokayã kɛ̀ kú zaa ziinↄn, ben aↄ̃è ma nↄ̀sɛ yĩi kũmɛ, Dii. 53 Mɛɛ̀ pↄ fɛ̃ maamaa, kɛ̀ zaakɛrinↄ è pã kpá n dokazi yãnzi. 54 Mɛɛ̀ lɛ̀ sí n yãdannɛnanↄ musu ma kuuna anduna kɛ̀kii guu. 55 N yã ègↄ̃ dↄmagu gwãavĩ, Dii, mɛɛ̀gↄ̃ n dokayãnↄ kũna. 56 Ma yã beeenↄ kↄ̃ dↄ̃̀, zaakɛ mɛɛ̀gↄ̃ n ↄdↄkii gwaa. 57 Dii, ḿbe ma baka ũ, ma lɛ́ gbɛ̃̀ kɛ̀ mɛ́ n yã ma. 58 Mɛɛ̀ kúɛ kɛnnɛ kↄ̃n nↄ̀sɛo do, ǹ sùu kɛmao lán ń ò nà. 59 Ma a yãkɛnanↄ laasuu lɛ̀, ben ma sↄkpa n dokayãnↄa. 60 Mɛ́ wã, mɛ́ gbá gáɛro, lɛ mà n yãdiɛnanↄ da. 61 Baa kɛ̀ gbɛ̃ zaaanↄ bà fĩ̀kãmazi, n dokayãnↄ é sãmaguro. 62 Mɛɛ̀ fɛɛ mà sáabu kɛnnɛ lezãndo n dokayã maaanↄ musu. 63 N vĩakɛri píngi gbɛ̃nnan ma ũ, gbɛ̃ kɛ̀ aↄ̃è n ↄdↄkii gwaanↄ. 64 Dii, n gbɛ̃kɛɛ anduna pà, ǹ n yãdiɛnanↄ damɛ. 65 N à maaa kɛ̀ mↄma n zↄ̀blerinɛ, lán ń ò nà, Dii. 66 Ǹ wɛ́ɛzɛ̃ɛ kↄ̃n dↄ̃nao damɛ, zaakɛ ma n yãdiɛnanↄ sì. 67 Lɛ ń kpɛ́ ǹ ↄ tↄ̃ma, má sãsãnamɛ, mↄde tia sa má n yã kũna. 68 Ń maa bensↄ̃ n yãkɛnanↄↄ maa, ǹ n yãdiɛnanↄ damɛ. 69 Baa kɛ̀ wadadeenↄ yãsiaa nàma, mɛɛ̀gↄ̃ n ↄdↄkii gwaa kↄ̃n nↄ̀sɛo do. 70 Aↄ̃ swã gbã̀gbã, èe yã maro, mↄma sↄ̃ ma pↄↄ nna n dokaa. 71 N ↄtↄ̃mana kɛ̀mɛ maa, lɛ mà e mà n yãdannɛnanↄ dada. 72 Doka kɛ̀ bↄ̀ n lɛ́n maamɛ dɛ vura kↄ̃n kondogi bↄrↄ ũgbangbanↄla. 73 N ↄↄ ma í kàsa à ma kɛ, ǹ ma gba ↄ̃ndↄ̃ↄ mà n yãdiɛnanↄ dada. 74 N vĩakɛrinↄ é ma e wà pↄnnaa kɛ, zaakɛ n yãn ma tãmaa dↄa. 75 Dii, má dↄ̃ kɛ̀ n dokayãnↄↄ maa, kɛ̀ ń náanɛ vĩ yãnzin n ↄ tↄ̃̀mazi. 76 Ǹ gbɛ̃kɛɛ kɛmɛ lɛ ma nↄ̀sɛ kpáɛ, lán ń ò mↄma n zↄ̀blerinɛ nà. 77 Ǹ mↄ́ ǹ wɛ̃nda dↄ̃mɛ lɛ màgↄ̃ kuu, zaakɛ n dokayãnↄn ma pↄnnaa ũ. 78 Ǹ tó wí wadadee kɛ̀ aↄ̃ taari kɛ̀mɛ pãnↄ kũ, mapi sↄ̃ mɛ́ laasuu lɛ́ n ↄdↄkiia. 79 N vĩakɛrinↄ su ma kiia, gbɛ̃ kɛ̀ aↄ̃ↄ n yãnↄ dↄ̃ↄnↄ. 80 Ǹ tò ma nↄ̀sɛ gↄ̃ pura n yãnↄ musu lɛ wí tón ma kũro yãnzi. 81 N mìsina yã e ma swɛ̃̀ blee, n yãn ma wɛ́ɛ dↄzi. 82 Ma wɛ́ɛ dↄ̀ n lɛ́gbɛ̃nazi ai ma kpasa, bↄrɛn nɛ́ ma nↄ̀sɛ yĩi kũmɛɛ? 83 Má dɛ lán báa bↄ̀kↄ kɛ̀ tɛ́sukpɛ mà bà, baa kↄ̃n beeeo n yãdiɛnanↄ è sãmaguro. 84 Mↄma n zↄ̀bleri mɛ́gↄ̃ n dãa ai bↄrɛmɛ? Bↄrɛn nɛ́ ĩa da ma wɛ́ɛtãmmarinↄa? 85 Wadadeenↄ è wɛ̀ɛ yↄ̃mɛ mà zun, aↄ̃ yã è kↄ̃ sɛ́ kↄ̃n n dokaoro. 86 N yãdiɛnanↄ píngi náanɛ vĩ, ǹ dↄmalɛ, zaakɛ wèe wɛ́ɛ tãama pãmɛ. 87 À gↄ̃̀ féte kɛ̀ aↄ̃é yãamao anduna guu, mↄma sↄ̃ mɛ́ɛ pã kpá n ↄdↄkiiziro. 88 Ǹ ma wɛ̃̀ndi dãkpa n gbɛ̃kɛ yãnzi, mɛ́ n yãnↄ da. 89 Dii, n yã ègↄ̃ kuu gurↄ píngi, à kãsãa pɛɛna zaa musu. 90 Ń náanɛ vĩ wɛ̃̀ kↄ̃n wɛ̃̀o, n anduna kàɛ, ben à kpɛ́ kuu. 91 Pↄ́ píngi kpɛ́ kuu gbã̀a n doka musu, zaakɛ pↄ́ píngi è dↄnzi. 92 Tó n dokan ma pↄnnaa ũ yãro, lɛ ma kaatɛ ma nawɛ̃akɛna guu. 93 N ↄdↄkii é sãmagu zikiro, zaakɛ à gãzĩn n ma wɛ̃̀ndi dã̀kpa. 94 N pↄ́n ma ũ, ǹ ma mì sí, zaakɛ ma n ↄdↄkii wɛ̀tɛ. 95 Gbɛ̃ zaaanↄↄ e ma kpákpaa wà ma dɛ, mↄde ma làakari kú n yãnↄa. 96 Má è kɛ̀ pↄ́ maa píngi zaka lɛ́ kuumɛ, mↄde n yãdiɛnanↄ bíta lɛ́ vĩro. 97 Má ye n dokazi à kɛ̀ bíta fá, mɛɛ̀gↄ̃ laasuu lɛɛa zaa kↄngↄ ai uusiɛ. 98 N yãdiɛnanↄ è tó ma ↄ̃ndↄ̃ↄ gↄ̃ dɛ ma ibɛɛnↄ pↄ́la, zaakɛ à kú ma swɛ̃̀n gurↄ píngi. 99 Ma wɛ́ɛzɛ̃ɛ dɛ ma yãdannɛrinↄ pↄ́la ń píngi, zaakɛ ma laasuu ègↄ̃ kú n yãnↄamɛ. 100 Ma ↄ̃ndↄ̃ↄ dɛ mareenↄ pↄ́la, zaakɛ mɛɛ̀gↄ̃ n ↄdↄkiinↄ gwaa. 101 Mɛɛ̀ mì kɛ̃ zɛ́ zaa píngia lɛ mà e màgↄ̃ n yã kũna yãnzi. 102 Mɛ́ɛ kɛ̃ n dokayãnↄaro, zaakɛ ḿbe ń dàmɛ. 103 N yãnↄ nnamɛ à kɛ̀ bíta, à nna dɛ zↄ́la ma lɛ́n. 104 N ↄdↄkii è ma gba làakari, Beee yãnzin ma za sãsãna zɛ́ pínginzi. 105 N yãn fitia ũ ma gbánɛ, è guu pumɛ zɛ́n. 106 Ma la dà ma sↄ̃ zɛo, kɛ̀ mɛ́gↄ̃ tɛ́ n dokayã maaanↄzi. 107 Ma wɛ́ɛtãmmana kɛ̀ bíta, Dii. ǹ ma wɛ̃̀ndi dãkpa lán ń ò nà. 108 Ǹ ma sáabukpana sí, gbasa ǹ n dokayãnↄ damɛ, Dii. 109 Mɛɛ̀gↄ̃ ma zĩnda da kari guu, baa kↄ̃n beeeo n dokayãnↄ è sãmaguro. 110 Zaakɛrinↄ takutɛɛ kpàkpamɛ, mↄde mɛ́ɛ zã n ↄdↄkiiaro. 111 N yãnↄn ma túbi ũ ai gurↄ píngi, aↄ̃mbe ma pↄnnaa ũ. 112 Ma swɛ̃̀ kú n yãdannɛnanↄ kɛnaa ai ma wɛ̃̀ndi lɛ́n. 113 Ma za nↄ̀sɛplaadeenↄn, n dokan má yezi. 114 Ḿbe ma utɛki kↄ̃n ma sɛngbangoo ũ, n yãn ma wɛ́ɛ dↄzi. 115 À gumala a zaakɛrinↄ lɛ màgↄ̃ ma Luda yãdiɛnanↄ kũna. 116 Ǹgↄ̃ ma kũna lán ń ò nà, mɛ́gↄ̃ kuu, ǹton tó tãmaa ma nɛro. 117 Ǹ ma sɛ́ musu lɛ mà bↄ aafia, ma wɛ́ɛ égↄ̃ pɛ́ n yãdannɛnanↄa. 118 Nɛɛ̀ gí gbɛ̃ kɛ̀ aↄ̃ zã̀ n yãdannɛnaanↄzi, aↄ̃ mↄnafikikɛna nɛ́ pãmɛ. 119 Nɛɛ̀ anduna zaakɛrinↄ kwɛ́ɛ lán mↄ̀gbↄ̃ bà, beee yãnzin má ye n yãnↄzizi. 120 Ma mɛ̀ è fɛɛ n vĩa yãnzi, n dokayãnↄↄ naasi vĩmɛ. 121 Ma yã kɛ̀ a zɛ́a súusu, ǹton ma tó ma wɛ́ɛtãmmarinↄnɛro. 122 Ǹ kpɛ́gaau sɛ́ mamↄma n zↄ̀blerinɛ lɛ mà bↄ maa, ǹton tó wadadeenↄ wɛ́ɛ tãmaro. 123 Ma wɛ́ɛ dↄ n mìsinazi ai ma kpasa, má sↄ̃kpa n lɛ́gbɛ̃na maaazi. 124 Ǹ yã kɛmɛ n gbɛ̃kɛɛ guu, ǹ n yãdannɛnanↄ da mamↄma n zↄ̀blerinɛ. 125 N zↄ̀blerin ma ũ, ǹ ma gba làakari lɛ mà n yãnↄ dↄ̀rↄ dↄ̃. 126 Yãkɛna gurↄↄ kà, Dii, zaakɛ wèe bↄↄ n doka kpɛɛ. 127 Má ye n yãdiɛnanↄzi dɛ vurala, baa vura baasana. 128 Má è n ↄdↄkii maa, beee yãnzin sãsãna zɛ́ píngi è kɛmɛrozi. 129 N yãnↄↄ dɛmɛ yãbↄnsaɛ ũ, beee yãnzin má kũna ma swɛ̃̀nzi. 130 N yã bↄkↄ̃tɛna è guu puńnɛ, è nↄ̀sɛdodeenↄ gba làakari. 131 Ma lɛ́ aɛna, mɛ́ɛ wesaa boo fɛ̀kuufɛkuu, zaakɛ n dokayãnↄ nii e ma dɛɛ. 132 Ǹ aɛ dↄma ǹ sùu kɛmao, lán nɛɛ̀ kɛ gbɛ̃ kɛ̀ aↄ̃ↄ ye n tↄ́zinↄnɛ nà. 133 Ǹ ma da zɛ́a lán ń ò nà, ǹton tó yã zaa ke kí blemaro. 134 Ǹ ma bↄ gbɛ̃ takiikɛrinↄ ↄzĩ lɛ mà n ↄdↄkii gwa. 135 Ǹ uu were mamↄma n zↄ̀bleria, ǹ tó mà n yãdannɛnanↄ dↄ̃. 136 Wɛ́ɛ'i e plaa ma wɛ́ɛn kɛ̀ wà n doka kũnaro yãnzi. 137 Dii, ń maa, n dokayãnↄↄ zɛ́ vĩ. 138 N n yãnↄ dìɛ a zɛ́a, aↄ̃ náanɛ vĩ maamaa. 139 Ma ibɛɛnↄ sã̀ n yãn, ben aↄ̃ yã ma kũ gbãa maamaa. 140 Wà n yã yↄ̃̀ wà gwà à see ke vĩro, mamↄma n zↄ̀bleri, má yezi maamaa. 141 Pↄ́ken ma ũro, wè kya kámagu, baa kↄ̃n beeeo n ↄdↄkii è sãmaguro. 142 N yãmaakɛna yãana vĩro, n doka yãpuraa vĩ. 143 Nawɛ̃a kↄ̃n yã'ↄ̃ammao ma le, mↄde n yãdiɛnanↄn ma pↄnnaa ũ. 144 N yãnↄↄ maa gurↄ píngi, ǹ ma gba làakari lɛ màgↄ̃ kuu. 145 Mɛɛ̀ n sísi kↄ̃n nↄ̀sɛo do Dii, ǹ wemala, mɛ́gↄ̃ n yãdiɛnanↄ kũna. 146 Mɛɛ̀ wiipɛnzi ǹ ma mì sí, mɛ́gↄ̃ n yãnↄ kũna. 147 Mɛɛ̀ fɛɛ idɛ'idɛ mà wii pɛ́nzi, n yãn ma wɛ́ɛ dↄzi. 148 Ii è na ma wɛ́ɛn gwãavĩro lɛ mà e mà laasuu lɛ́ n yãa yãnzi. 149 Ǹ ma yã ma n gbɛ̃kɛ yãnzi, Dii, ǹ ma wɛ̃̀ndi dãkpa lán n yãzɛdekɛɛ dɛ nà. 150 Gbɛ̃ kɛ̀ aↄ̃è lɛ́ kpaakↄ̃sↄ̃maziinↄↄ kĩimao, mↄde aↄ̃ↄ zã̀ kↄ̃n n dokao. 151 Ń kĩimao Dii, n yãdiɛnanↄ píngi yãpuraa vĩ. 152 Zaa gìkɛna má dↄ̃̀ n yãnↄa kɛ̀ ń dìɛ àgↄ̃ kuu gurↄ píngi. 153 Ǹ ma nawɛ̃akɛna gwa ǹ ma mì sí, zaakɛ n doka e sãmaguro. 154 Ǹ zɛmao ǹ ma bo, ǹ ma wɛ̃̀ndi dãkpa lán n à lɛ́ gbɛ̃̀ nà. 155 N mìsina zã̀ kↄ̃n zaakɛrinↄ, zaakɛ aↄ̃è n yãdannɛnanↄ wɛtɛro. 156 N wɛ̃ndaa bíta, Dii, ǹ ma wɛ̃̀ndi dãkpa lán n yãzɛdekɛɛ dɛ nà. 157 Ma ibɛɛ kɛ̀ aↄ̃è wɛ́ɛ tãmaanↄↄ pari, mↄde mɛ́ɛ zã n yãnↄaro. 158 Má ye n náanɛsaideenↄ kãziro, kɛ̀ aↄ̃ↄ n yã kũnaro yãnzi. 159 Ǹ gwa lán má ye n ↄdↄkiizi nà. Dii, ǹ ma wɛ̃̀ndi dãkpa n gbɛ̃kɛɛ yãnzi. 160 N yã píngipingi nɛ́ yãpuraamɛ, n dokayãnↄↄ maa aↄ̃ↄ yãana vĩro. 161 Gbãadeenↄ è wɛ́ɛ tãma pã, mↄde n yã vĩa è ma kũ. 162 Mɛɛ̀ pↄnnaa kɛ kↄ̃n n lɛ́gbɛ̃nao, lán ma auziki bíta sɛ̀ɛ zĩ̀ guu bà. 163 Ma za mↄnafikin, má ye à yãziro, n dokan má yezi. 164 Mɛɛ̀gↄ̃ n táaki lɛɛ gurↄ do gɛ̃̀n swɛɛplaplaa kɛ̀ n dokayãnↄↄ maa yãnzi. 165 Gbɛ̃ kɛ̀ aↄ̃ↄ ye n dokazinↄ aafia bíta, yãke è tó aↄ̃ furo. 166 Ma wɛ́ɛ dↄzi ǹ ma mì sí, Dii, mɛɛ̀ tɛ́ n yãdiɛnanↄzi. 167 Má n yãnↄ kũna, zaakɛ má yezi maamaa. 168 Mɛɛ̀ n ↄdↄkii gwa mɛɛ̀ n yãnↄ ma, zaakɛ ma yãkɛna píngi kú n ↄzĩmɛ. 169 Ǹ tó ma wiipɛna n kii le, Dii, ǹ ma gba làakari lán ń ò nà. 170 Ǹ tó ma aduakɛna ká n kiia, ǹ ma mì sí lán n lɛ́ gbɛ̃̀ nà. 171 N táakilɛna gↄ̃ da ma lɛ́n, zaakɛ nɛɛ̀ n yãdannɛnanↄ damɛ. 172 Mɛ́ lɛ̀ sí n lɛ́gbɛ̃na musu, zaakɛ n yãdiɛnanↄↄ maa píngi. 173 Ǹgↄ̃ kú soruo ǹ ↄ dↄmalɛ, zaakɛ ma zɛ kↄ̃n n ↄdↄkiio. 174 Mɛ́ɛ à ni dɛɛ ǹ ma mì sí, Dii, n dokan ma pↄnnaa ũ. 175 Ǹ tó màgↄ̃ kuu, mɛ́gↄ̃ n táaki lɛɛ, ǹ tó n dokayãnↄ gↄ̃ ma kũna. 176 Ma kɛ̃ zɛ́a lán sãa kɛ̀ sã̀sã bà, ǹ mamↄma n zↄ̀bleri wɛtɛ, zaakɛ n yãdannɛnanↄↄ e sãmaguro. |
Bokobaru Bible with New Testament and OT Portions © Sim International, 2005.