SAAMUNƆ 115 - Bokobaru Bible

Dii bé è aubarika dańgu

¹ Èe kɛ wámbeero Dii, èe kɛ wámbeero, ḿbe ń dɛ wà n tↄ́ bↄ n gbɛ̃kɛ kↄ̃n n náanɛo yãnzi.

² À kɛ̀ dia boriinↄ è wa la wà be wa Ludaa kú mámɛ?

³ Wa Ludaa kú musu, pↄ́ kɛ̀ à yezin è kɛ.

⁴ Aↄ̃ ń tãanↄ pì kↄ̃n kondogio kↄ̃n vurao, gbɛ̃ntee ↄzĩimɛ.

⁵ Aↄ̃ↄ lɛ́ vĩ, mↄde aↄ̃è yã oro, aↄ̃ↄ wɛ́ɛ vĩ, mↄde aↄ̃è guu ero.

⁶ Aↄ̃ↄ swã vĩ, mↄde aↄ̃è yã maro, aↄ̃ↄ yĩ vĩ, mↄde aↄ̃è pↄ́ gũu maro.

⁷ Aↄ̃ↄ ↄↄ vĩ, mↄde aↄ̃è pↄ́ kũro, aↄ̃ↄ gbá vĩ, mↄde aↄ̃è táa oro, aↄ̃è kòto kɛkɛro.

⁸ Aↄ̃ pìrinↄↄ sɛ̃nkpɛńyomɛ kↄ̃n gbɛ̃ kɛ̀ aↄ̃ↄe ń náanɛ kɛɛnↄ ń píngi.

⁹ Isarailinↄ, à Dii náanɛ kɛ! Àmbe a dↄnlɛri ũ kↄ̃n a sɛngbangoo.

¹⁰ Aruna boriinↄ, à Dii náanɛ kɛ! Àmbe a dↄnlɛri ũ kↄ̃n a sɛngbangoo.

¹¹ Dii vĩakɛrinↄ, à Dii náanɛ kɛ! Àmbe a dↄnlɛri ũ kↄ̃n a sɛngbangoo.

¹² Dii dↄ̀ wa yãn, eé aubarika dawagu. Eé aubarika da Isaraili boriinↄn, eé aubarika da Aruna boriinↄn,

¹³ eé aubarika da a vĩakɛrinↄn, nɛ́ féte gbɛ̃nsi.

¹⁴ Dii a bori kↄ̃are, apinↄ kↄ̃n a nɛ́nↄ.

¹⁵ Dii aubarika daagu, àmↄ kɛ̀ musu kↄ̃n tↄↄtɛo kɛ̀.

¹⁶ Musu nɛ́ Dii pↄ́mɛ, mↄde à tↄↄtɛ nà gbɛ̃nteenↄnɛ ń ↄzĩ.

¹⁷ Èe kɛ gɛ̀nↄ bé wè Dii táaki lɛ́ro, kesↄ̃ gbɛ̃ kɛ̀ aↄ̃ lɛ́ yĩtɛnↄ.

¹⁸ Wámbe, wégↄ̃ Dii sáabu kpaa zaa tia ai gurↄ píngi. Aleluya!